អ៊ីតាលី ថា ការសម្លាប់លោក Gaddafi គឺជាកំហុសដ៏ធំ

អ្នកការទូតកំពូលរបស់ប្រទេសអ៊ីតាលី និយាយថា មហាអំណាចលោកខាងលិច បានប្រព្រឹត្តកំហុសដ៏ធំមួយ ដោយការជួយទម្លាក់មេដឹកនាំលីប៊ីលោក Muammar Gaddafi នៅក្នុងប្រតិបត្តិការផ្លាស់ប្តូររបបឆ្នាំ២០១១។ អ្នកការទូតរូបនេះទទួលស្គាល់ថា ការស្លាប់របស់លោក Gaddafi បានបង្កឲ្យមានភាពវឹកវរ និងជម្លោះរ៉ាំរ៉ៃច្រើនឆ្នាំ នៅក្នុងប្រទេសអាហ្វ្រិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅខាងក្រៅព្រឹត្តិការណ៍មួយក្នុងទីក្រុង Tuscany កាលពីថ្ងៃពុធទី១៦ខែសីហា រដ្ឋមន្ត្រីការបរទេសអ៊ីតាលី និងជាឧបនាយករដ្ឋមន្ដ្រីលោក Antonio Tajani បានរៀបរាប់អំពីបញ្ហារបស់ប្រទេសលីប៊ី ចាប់តាំងពីលោក Gaddafi ត្រូវបានផ្ដួលរំលំ និងធ្វើឃាត។

លោក​និយាយ​ថា “​វា​ជា​កំហុស​ដ៏​ធ្ងន់ធ្ងរ​មួយ ​ដែល​អនុញ្ញាត​ឲ្យ​លោក Gaddafi ​ត្រូវ​គេ​សម្លាប់។ គាត់ប្រហែលជាមិនមែនជាជើងឯកនៃលទ្ធិប្រជាធិបតេយ្យទេ ប៉ុន្តែនៅពេលគាត់បាត់រូបកាយ អស្ថិរភាពនយោបាយក៏បានមកដល់ប្រទេសលីប៊ី និងទ្វីបអាហ្រ្វិក។

លោក Gaddafi ត្រូវបានសម្លាប់យ៉ាងឃោរឃៅដោយពួកយុទ្ធជនឧទ្ទាម ចំពេលយុទ្ធនាការទម្លាក់គ្រាប់បែករបស់អង្គការណាតូ ដែលធ្វើឡើងក្រោមលេសនៃការដាក់តំបន់គ្មានការហោះហើរ អំឡុងពេលសង្គ្រាមស៊ីវិលឆ្នាំ២០១១របស់ប្រទេសលីប៊ី។

ថ្វីបើទីក្រុងវ៉ាស៊ីនតោននិងសម្ព័ន្ធមិត្ត ពណ៌នាបេសកកម្មនោះថាជាកិច្ចខិតខំប្រឹងប្រែងមនុស្សធម៌ ដើម្បីបញ្ចប់ការវាយប្រហាររបស់រដ្ឋាភិបាលលើជនស៊ីវិលក៏ដោយ ប៉ុន្តែការស៊ើបអង្កេតរបស់សភាចក្រភពអង់គ្លេស ក្រោយមកបានរកឃើញថា “ការគំរាមកំហែងដល់ជនស៊ីវិល គឺត្រូវបានគេបំផ្លើស ហើយថា មហាអំណាចលោកខាងលិច មិនអើពើនឹងក្រុមឥស្លាមនិយម”។

បន្ទាប់ពីប្រតិបត្តិការផ្លាស់ប្តូររបបនេះ ប្រទេសលីប៊ី ត្រូវបានបែងចែករវាងរដ្ឋាភិបាលប្រកួតប្រជែងជាច្រើន ដែលរដ្ឋាភិបាលនីមួយៗទាមទារភាពស្របច្បាប់ក្នុងការគ្រប់គ្រង។

ចាប់តាំងពីពេលនោះមក បក្សពួកទាំងឡាយបានបន្តប្រយុទ្ធគ្នា ហើយទីបំផុតបានបង្រួបបង្រួមក្រោមជំរំចំនួនពីរ ដែលមួយជារដ្ឋាភិបាលកិច្ចព្រមព្រៀងជាតិ ដឹកនាំដោយអង្គការសហប្រជាជាតិ និងមួយទៀត ជាកងកម្លាំងដែលស្មោះត្រង់នឹងឧត្តមសេនីយ៍ Khalifa Haftar ហើយចាប់តាំងពីការស្លាប់របស់លោក Gaddafi អំពើភេរវកម្ម ក៏បានកកើតឡើងវិញផងដែរនៅទូទាំងទ្វីបអាហ្រ្វិកខាងជើង ៕

ប្រែសម្រួល៖ Vann Vann

ប្រភព៖ RT

ចុចអាន៖ កូនប្រុស Gaddafi ឈរឈ្មោះបោះឆ្នោតប្រធានាធិបតី ៦ឆ្នាំបន្ទាប់ពីត្រូវកាត់ទោសប្រហារជីវិត