គ្រោះរញ្ជួយដី និងព្យុះត្រូពិក វាយប្រហាររដ្ឋកាលីហ្វ័រញ៉ា ក្នុងពេលតែមួយ

ការរញ្ជួយដីកម្រិត៥.១រ៉ិចទ័រ ត្រូវបានគេរាយការណ៍នៅរសៀលថ្ងៃអាទិត្យទី២០ខែសីហា (ពេលវេលានៅអាមេរិក) ក្នុងតំបន់ Ventura នៃរដ្ឋកាលីហ្វ័រញ៉ា ហើយបន្ទាប់មកមានការរញ្ជួយតូចៗជាច្រើនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមក្រុមស្ទាបស្ទង់ភូមិសាស្ត្រសហរដ្ឋអាមេរិក, ការរញ្ជួយដី បានកើតឡើងនៅម៉ោង២:៤១រសៀល ក្នុងជម្រៅ១៤.៤គីឡូម៉ែត្រ មានចម្ងាយប្រហែល៧គីឡូម៉ែត្រ ភាគអាគ្នេយ៍ទីក្រុង Ojai។

ប៉ុន្មានវិនាទីបន្ទាប់ពីការរញ្ជួយដីខាងលើ មានការរញ្ជួយយ៉ាងតិច១២ដងទៀត ត្រូវបានរាយការណ៍នៅ Ojai ជាមួយកម្លាំងចន្លោះពី ២.៥ទៅ ៣.៩រ៉ិចទ័រ។

ការរញ្ជួយដីជាបន្តបន្ទាប់នេះ បានកើតឡើងចំពេលភាគខាងត្បូង រដ្ឋកាលីហ្វ័រញ៉ា ជួបប្រទះ ព្យុះត្រូពិក Hilary។

ប្រធាននាយកដ្ឋានពន្លត់អគ្គិភ័យទីក្រុង Los Angeles លោកស្រី Kristin Crowley និយាយថា គិតត្រឹមពេលនេះ មិនមានរបាយការណ៍អំពីការអ្នករងរបួស ឬការខូចខាតធ្ងន់ធ្ងរដោយសារព្យុះត្រូពិកទេ ប៉ុន្តែមានរបាយការណ៍​មួយ​ចំនួន ​អំពី​ការ​ដាច់​ខ្សែ​ភ្លើង បំណាក់ដី និងការបាក់រលំដើមឈើ។

មុនមកដល់សហរដ្ឋអាមេរិក ព្យុះត្រូពិក Hilary បានវាយប្រហារនិងបណ្តាលឲ្យបាក់នៅរដ្ឋBaja California ក្នុងប្រទេសម៉ិកស៊ិក ហើយបច្ចុប្បន្ន សហរដ្ឋអាមេរិក បានចេញការព្រមានដល់ប្រជាជន ៤២លាននាក់នៅភាគខាងត្បូងរដ្ឋកាលីហ្វ័រញ៉ា។

គួរបញ្ជាក់ថា Hilary បានក្លាយជាព្យុះត្រូពិកទីមួយ ដែលវាយប្រហារតំបន់នេះ ចាប់តាំងពីព្យុះ Nora ក្នុងឆ្នាំ១៩៩៧៕

ប្រែសម្រួល៖ Vann Vann

ប្រភព៖ ABC, FOX10

ចុចអាន៖ រដ្ឋកាលីហ្វ័រញ៉ា ចេញការព្រមានដ៏កម្រអំពីព្យុះសង្ឃរា ដែលមានល្បឿនខ្យល់ ២១៥គីឡូម៉ែត្រក្នុងមួយម៉ោង