ទុរេនថៃដណ្តើមជើងឯកពីការនាំចេញខ្ពស់បំផុតតាមរយៈរថភ្លើងល្បឿនលឿន ចិន-ឡាវ

ទុរេនថៃបានដណ្តើមពានជើងឯកក្នុងនាំចេញខ្ពស់បំផុតតាមរយៈផ្លូវរថភ្លើងល្បឿនលឿន (ចិន-ឡាវ) ដោយបានកាត់បន្ថយពេលវេលានៃការដឹកជញ្ជូនមកនៅត្រឹម១៥ម៉ោង ស្របពេលដែលរដ្ឋាភិបាលឆ្ពោះទៅមុខជាមួយនឹងផែនការតភ្ជាប់ប្រព័ន្ធផ្លូវដែកដើម្បីបង្កើនឱកាសនាំចេញផលិតផលថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី២០ ខែសីហា ឆ្នាំ២០២៣ អ្នកនាំពាក្យរដ្ឋាភិបាលថៃបាននិយាយថា លោកនាយករដ្ឋមន្ត្រី ប្រាយុទ្ធ ចាន់អូចា បានសម្តែងក្តីសប្បាយរីករាយយ៉ាងខ្លាំងចំពោះតម្លៃនៃការនាំចេញរបស់ផលិតផលថៃទៅកាន់ប្រទេសចិនតាមរយៈរថភ្លើងល្បឿនលឿន (ចិន-ឡាវ) បានកើនឡើងជាបន្តបន្ទាប់ដែលមានតម្លៃសរុបចំនួន ២,៨៤៨.៤១លានបាតក្នុងរយៈពេល ៥ខែដំបូង (ខែមករា-ឧសភា ឆ្នាំ២០២៣) ពោលគឺកើនឡើងចំនួនជាង២៦០% ពីឆ្នាំ២០២២ ជាមួយនឹងផ្លែឈើថៃកាន់តែពេញនិយមនៅក្នុងទីផ្សារប្រទេសចិន ជាពិសេសគឺទុរេន ដែលដឹកជញ្ជូនតាមរយៈផ្លូវរថភ្លើងល្បឿនលឿន (ចិន-ឡាវ) អាចជួយកាត់បន្ថយពេលវេលាដឹកជញ្ជូនមកនៅត្រឹម១៥ម៉ោង ដែលពីមុនត្រូវចំណាយពេលប្រហែល២ថ្ងៃនៅលើផ្លូវជាតិ (R3A)។

ទន្ទឹមនឹងនេះ រដ្ឋាភិបាលថៃបាននិងកំពុងពន្លឿនផែនការតភ្ជាប់ប្រព័ន្ធផ្លូវដែករវាង ថៃ-ឡាវ-ចិន ដើម្បីបង្កើនឱកាសនាំចេញផលិតផលថៃ ត្រួសត្រាយផ្លូវដើម្បីក្លាយជាមជ្ឈមណ្ឌលដឹកជញ្ជូនក្នុងតំបន់នាពេលអនាគត។

ប្រភពដដែលបន្តថា រដ្ឋាភិបាលថៃបានប្តេជ្ញាចិត្តក្នុងការអភិវឌ្ឍហេដ្ឋារចនាសម្ព័ន្ធរបស់ប្រទេសលើគ្រប់វិស័យ ជាពិសេសហេដ្ឋារចនាសម្ព័ន្ធផ្លូវដែក ដែលជាការដឹកជញ្ជូនដែលអាចកាត់បន្ថយការចំណាយពេលវេលា និងថ្លៃដឹកជញ្ជូន ជួយលើកកំពស់សមត្ថភាពការប្រកួតប្រជែងរបស់អ្នកនាំចេញថៃ និងមានជំនឿថា ការអភិវឌ្ឍហេដ្ឋារចនាសម្ព័ន្ធយ៉ាងគ្រប់ជ្រុងជ្រោយ ដូចដែលរដ្ឋាភិបាលបានអនុវត្តន៍ នឹងដើរតួយ៉ាងសំខាន់ឆ្ពោះទៅរកការអភិវឌ្ឍសេដ្ឋកិច្ចជាតិ និងជំរុញប្រទេសថៃឱ្យក្លាយជាមជ្ឈមណ្ឌលដឹកជញ្ជូនក្នុងតំបន់នាពេលអនាគត៕

ប្រែសម្រួល៖ គង់ សំអាន

ប្រភព៖ naewna

ចុចអាន៖ ចិននឹងពង្រីកកិច្ចសហប្រតិបត្តិការជាមួយថៃលើវិស័យជាច្រើន

ចុចអាន៖ វៀតណាមផ្ដល់ប្រាក់កម្ចីឲ្យអតីតអ្នកទោស ដើម្បីកសាងជីវិតថ្មី