នាយករដ្ឋមន្ត្រីចាំផ្ទះ ប្រាយុទ្ធ ចាន់អូចា កោះប្រជុំបន្ទាន់ដើម្បីរុះរើប្រមុខ​យោធា

នាយករដ្ឋមន្ត្រីចាំផ្ទះ និងជារដ្ឋមន្ត្រីការពារជាតិលោក ប្រាយុទ្ធ ចាន់អូចា នៅថ្ងៃពុធនេះបានអំពាវនាវឲ្យមានកិច្ចប្រជុំជាបន្ទាន់មួយដើម្បីធ្វើការរុះរើប្រមុខយោធា ពោលត្រឹមតែរយៈពេលមួយថ្ងៃប៉ុណ្ណោះ បន្ទាប់ពីការបោះឆ្នោតនាយករដ្ឋមន្ត្រី ។

ដើមឡើយ កិច្ចប្រជុំ​នេះ​គ្រោង​នឹងធ្វើ​នៅ​ថ្ងៃ​ទី២៤ ខែ​សីហា ប៉ុន្តែ​ត្រូវ​បាន​កំណត់​យក​នៅ​ថ្ងៃ​នេះវិញ ដោយសារតែថៃរកបាននាយករដ្ឋមន្ត្រីថ្មី ស្របពេលដែលប្រមុខ​កង​កម្លាំង​ប្រដាប់​អាវុធចំនួន ៣ ​រូប និង​មេបញ្ជាការ​កង​កម្លាំង​ការពារ​ជាតិ​គ្រោង​នឹង​ចូល​និវត្តន៍​នៅ​ចុង​ខែ​កញ្ញានេះ ។

ពាក់ព័ន្ធនឹងនឹងការរុះរើយោធាប្រចាំឆ្នាំនេះដែរ នឹងមិនត្រូវបានបញ្ជូនបន្តទៅគណៈរដ្ឋមន្ត្រីដើម្បីអនុម័តនោះទេ ។ ផ្ទុយទៅវិញ ក្រុមប្រឹក្សាដែលមានសមាជិក ៧ រូបដឹកនាំដោយលោក ប្រាយុទ្ធ នឹងពិនិត្យមើលបញ្ជីរុះរើឡើងវិញ ហើយក៏នឹងបញ្ជូនបញ្ជីនេះភ្លាមៗទៅកាន់ព្រះមហាក្សត្រដើម្បីឲ្យទ្រង់អនុម័តផងដែរ ។

គួរបញ្ជាក់ថា លោក ស្រេតថា ថាវីស៊ីន បេក្ខភាពមកពីគណបក្សភឿថៃ ត្រូវបានសមាជិករដ្ឋសភា និងព្រឹទ្ធសភាបោះឆ្នោតជ្រើសរើសជានាយករដ្ឋមន្ត្រីទី៣០ របស់ប្រទេសជាមួយនឹងសំឡេងគាំទ្រចំនួន ៤៨២, ប្រឆាំង ១៦៤ និងអនុបវាទចំនួន ៨១ សំឡេង ក្នុងចំណោមសមាជិកសភាទាំងពីរដែលមានចំនួនសរុប ៧២៨ រូប ៕

ប្រែសម្រួលដោយ ៖ ជីវ័ន្ត

ប្រភព ៖ Thai Enquirer

ចុចអាន ៖ លោក ថាក់ស៊ីន ត្រូវបញ្ជូនចេញពីពន្ធនាគារទៅមន្ទីរពេទ្យទាំងកណ្ដាលយប់