លោក ថាក់ស៊ីន ត្រូវបញ្ជូនចេញពីពន្ធនាគារទៅមន្ទីរពេទ្យទាំងកណ្ដាលយប់

នាយកដ្ឋានពន្ធនាគារថៃនិយាយនៅថ្ងៃពុធនេះថា អតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត់ត្រា ត្រូវបានបញ្ជូនចេញពីពន្ធនាគារ Remand ក្នុងទីក្រុងបាងកក ទៅកាន់មន្ទីរពេទ្យប៉ូលិសទាំងកណ្តាលយប់ ដើម្បីព្យាបាលជំងឺលើសឈាម ។

យោងតាមសេចក្តីថ្លែងការណ៍របស់នាយកដ្ឋានបានឲ្យដឹងថា លោក ថាក់ស៊ីន ត្រូវបានដឹកតាមឧទ្ធម្ភាគចក្រឆ្ពោះទៅមន្ទីរពេទ្យប៉ូលិសក្នុងសង្កាត់ Pathum Wan នៃទីក្រុងបាងកក នៅវេលាម៉ោងប្រហែល ១ រំលងអធ្រាត្រឈានចូលថ្ងៃពុធ បន្ទាប់ពីលោកមានអាការតឹងទ្រូង និងគេងមិនលក់ ។

ក្រោយការពិនិត្យរូចហើយ មន្ត្រីពេទ្យបានរកឃើញថា សម្ពាធឈាមរបស់លោក ថាក់ស៊ីន ឡើងខ្ពស់ និងកម្រិតអុកស៊ីសែននៅក្នុងឈាមចុះទាប ដោយតម្រូវឲ្យមន្ត្រីពន្ធនាគារធ្វើការតាមដានសុខភាពរបស់លោកយ៉ាងដិតដល់ ក្នុងអំឡុងពេលសម្រាកព្យាបាល ។

នាយកដ្ឋានពន្ធនាគារកាលពីថ្ងៃអង្គារ បានដាក់លោក ថាក់ស៊ីន នៅដាច់ដោយឡែកពីគេក្នុងមន្ទីរពេទ្យពន្ធនាគារទីក្រុងបាងកក បន្ទាប់ពីគ្រូពេទ្យបានធ្វើរោគវិនិច្ឆ័យឃើញថា អតីតនាយករដ្ឋមន្ត្រីវ័យ ៧៤ ឆ្នាំរូបនេះមានជំងឺរួមគ្នាចំនួន ៤ មុខដូចជា ជំងឺសរសៃឈាមបេះដូង Ischemia, ជំងឺសួតធ្ងន់ធ្ងរ, ជំងឺលើសឈាម និងជំងឺឆ្អឹងខ្នង ។

គួរបញ្ជាក់ថា លោក ថាក់ស៊ីន ត្រូវបានតុលាការកំពូលផ្ដន្ទាទោសដាក់ពន្ធនាគាររយៈពេល ៨ ឆ្នាំក្នុងសំណុំរឿងផ្លូវច្បាប់ចំនួន ៣ ករណី បន្ទាប់ពីចុះចតភ្លាមៗនៅទីតាំង VIP មួយកន្លែងក្នុងព្រលានយន្តហោះដនមឿងរបស់ទីក្រុងបាងកក ក្រោយសម្រេចវិលត្រលប់ចូលស្រុកវិញកាលពីថ្ងៃទី២២ ខែសីហា ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ សេណារីយ៉ូដ៏ពិសេសមួយអាចឲ្យលោក ថាក់ស៊ីន បន្ថយការជាប់ឃុំក្នុង ពន្ធនាគារ