លោក ប្រាយុទ្ធ ចង់ក្លាយជាពលរដ្ឋសាមញ្ញម្នាក់ដោយគ្មានឯកសិទ្ធិពិសេស 

កាលពីថ្ងៃអង្គារទី២៩ខែសីហា នាយករដ្ឋមន្ត្រីផុតអាណត្តិរបស់ប្រទេសថៃ លោក ប្រាយុទ្ធ ចាន់អូចា បានធ្វើជាប្រធានកិច្ចប្រជុំគណៈរដ្ឋមន្ត្រីចុងក្រោយរបស់លោក ដោយនិយាយថា លោកពេញចិត្តចំពោះការអនុវត្តរបស់រាជរដ្ឋាភិបាល ក្នុងរយៈពេល៤ឆ្នាំកន្លងមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់​ពី​ជំនួប​នោះ លោក​ ប្រាយុទ្ធ បាន​ថត​រូប​ជាមួយ​គណៈរដ្ឋមន្ត្រី​ចាស់ មន្ត្រី​រដ្ឋាភិបាល និង​កម្មករ បន្ទាប់​មកអ្នកទាំងអស់ ​បានទទួលទាន​អាហារ​ថ្ងៃត្រង់​ជាមួយ​គ្នា។

នៅ​ពេលអ្នកកាសែត​សួរថា តើ​លោក​ចង់​ឲ្យ​រដ្ឋាភិបាលថ្មីធ្វើ​អ្វីខ្លះ លោក​​ ប្រាយុទ្ធ ឆ្លើយ​ថា “គួរ​ទុក​ឲ្យ​រដ្ឋាភិបាល​ថ្មី​ធ្វើ​អ្វីដែលពួកគេគិតថាសម”។

ហើយនៅពេលសួរថាតើលោកនឹងធ្វើអ្វី ក្រោយពេលចុះចេញពីតំណែង លោក ប្រាយុទ្ធ និយាយថា “ខ្ញុំចង់សម្រាក និងចំណាយពេលច្រើនជាមួយគ្រួសារ។ ខ្ញុំនឹងក្លាយជាពលរដ្ឋសាមញ្ញម្នាក់ដោយគ្មានឯកសិទ្ធិពិសេស”។

គួរបញ្ជាក់ថា លោក ប្រាយុទ្ធ បានឡើងកាន់អំណាច បន្ទាប់ពីធ្វើរដ្ឋប្រហារយោធាទម្លាក់រដ្ឋាភិបាលជាប់ឆ្នោតរបស់គណបក្សភឿថៃដឹកនាំដោយលោកស្រី យីងឡាក់ ស៊ីណាវ៉ាត់ត្រា កាលពីខែឧសភា ឆ្នាំ២០១៤។

ក្រោយមកលោក ប្រាយុទ្ធ បានបន្តតំណែងនាយករដ្ឋមន្ត្រីសាជាថ្មីនៅឆ្នាំ២០១៩ បន្ទាប់ពីគណបក្ស ប៉ាឡាង ប្រាឆារ៉ាត់ តែងតាំងលោកជាបេក្ខជននាយករដ្ឋមន្ត្រីរបស់ខ្លួន និងបានបង្កើតរដ្ឋាភិបាលចម្រុះ ក្រោយការបោះឆ្នោតសកលនៅឆ្នាំនោះ ប៉ុន្តែនៅឆ្នាំ២០២៣នេះ លោកបានប្រកាសចូលនិវត្តន៍ពីឆាកនយោបាយ ក្រោយគណបក្សថៃរួបរួមជាតិដែលបានតែងតាំងលោកជាបេក្ខជននាយករដ្ឋមន្ត្រី រងបរាជ័យយ៉ាងធ្ងន់ធ្ងរក្នុងការបោះឆ្នោតសកលថ្ងៃទី១៤ ខែឧសភា៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ប្រទេស ថៃ រយៈពេល ៩ ឆ្នាំក្រោមការកាន់អំណាចរបស់នាយករដ្ឋមន្ត្រីផុត អាណត្តិ ប្រាយុទ្ធ ចាន់អូចា