គីម ជុងអ៊ុន-ពូទីន ប្តេជ្ញាបង្កើនកិច្ចសហប្រតិបត្តិការ ខណៈអាមេរិក បារម្ភថា កូរ៉េខាងជើង កំពុងផ្តល់អាវុធឲ្យរុស្ស៊ី

តាមសេចក្តីរាយការណ៍ លោក ពូទីន និងលោក គីម ជុងអ៊ុន បានផ្ញើសារឲ្យគ្នា និងប្តេជ្ញាបង្កើនកិច្ចសហប្រតិបត្តិការ រវាងប្រទេសទាំងពីរ ចំពេលមានក្តីបារម្ភថា កូរ៉េខាងជើង កំពុងផ្តល់អាវុធឲ្យរុស្ស៊ី សម្រាប់សង្គ្រាមនៅអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ អ្នកនាំពាក្យសន្តិសុខជាតិសេតវិមាន លោក John Kirby បានប្រាប់សន្និសីទសារព័ត៌មានមួយកាលពីថ្ងៃពុធទី៣០ខែសីហាថា សហរដ្ឋអាមេរិកបារម្ភថា ការចរចាអាវុធរវាងរុស្ស៊ី និងកូរ៉េខាងជើង កំពុងដំណើរការទៅមុខយ៉ាងរលូន។

លោក Kirby និយាយថា រដ្ឋមន្ត្រីការពារជាតិរុស្ស៊ី លោក Sergei Shoigu ថ្មីៗនេះ បានធ្វើដំណើរទៅកាន់ប្រទេសកូរ៉េខាងជើង ដើម្បីព្យាយាមបញ្ចុះបញ្ចូលទីក្រុងព្យុងយ៉ាង ឲ្យលក់គ្រាប់កាំភ្លើងធំទៅរុស្ស៊ី។

លោកក៏អះអាងដែរថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន និងមេដឹកនាំកូរ៉េខាងជើង គីម ជុងអ៊ុន បានផ្ញើសារឲ្យគ្នាទៅវិញទៅមក ដោយសន្យាថានឹងបង្កើនកិច្ចសហប្រតិបត្តិការទ្វេភាគី ហើយ សហរដ្ឋអាមេរិកទទួលបានព័ត៌មានសម្ងាត់ដែលបង្ហាញថា មន្ត្រីរុស្ស៊ីមួយក្រុមផ្សេងទៀត បានធ្វើដំណើរទៅកាន់ទីក្រុងព្យុងយ៉ាង បន្ទាប់ពីទស្សនកិច្ចរបស់រដ្ឋមន្ត្រីការពារជាតិ។

យោងតាមលោក Kirby, នៅក្រោមកិច្ចព្រមព្រៀងនេះ រុស្ស៊ីនឹងទទួលបានអាវុធដែលយោធាត្រូវប្រើប្រាស់ក្នុងសង្គ្រាមជាមួយអ៊ុយក្រែន។ កិច្ចព្រមព្រៀងក៏អាចរួមបញ្ចូលវត្ថុធាតុដើម ដែលនឹងជួយដល់មូលដ្ឋានឧស្សាហកម្មការពារជាតិរបស់រុស្ស៊ីទៀតផង។

លោក Kirby បានឲ្យដឹងទៀតថា “កិច្ចព្រមព្រៀងសព្វាវុធណាមួយរវាងរុស្ស៊ីនិងកូរ៉េខាងជើង នឹងបំពានលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ យើងសូមជំរុញឲ្យកូរ៉េខាងជើង បញ្ឈប់ការចរចាអាវុធរបស់ខ្លួនជាមួយរុស្ស៊ី និងគោរពតាមការប្តេជ្ញាចិត្តជាសាធារណៈ ដែលទីក្រុងព្យុងយ៉ាងបានអះអាង ក្នុងការមិនផ្តល់ឬលក់អាវុធឲ្យរុស្ស៊ី”។

ទោះបីជាយ៉ាងណាក៏ដោយ លោក Kirby បានបដិសេធរៀបរាប់លម្អិតអំពីវិធីដែលមន្ត្រីអាមេរិក ប្រមូលបានព័ត៌មានសម្ងាត់ទាំងនោះ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ លោក គីម ជុងអ៊ុន ហៅថ្នាក់ដឹកនាំអាមេរិក កូរ៉េខាងត្បូង និងជប៉ុន ថា “មេក្រុមជើងកាង”