សាលារៀនទាំងអស់នៅទីក្រុងមួយរបស់ថៃបើកមិនទាន់បានមួយម៉ោងត្រូវបិទវិញ ក្រោយសិស្សតេស្តវិជ្ជមានកូវីដ

សាលារៀនទាំង ១៥ នៅទីក្រុង Mae Sot ប្រទេសថៃត្រូវបានបញ្ជាឲ្យបិទកាលពីព្រឹកថ្ងៃចន្ទនេះពោលមិនដល់មួយម៉ោងផង បន្ទាប់ពីបើកសាជាថ្មី ក្រោយរកឃើញថាមានកុមារមួយចំនួនបានធ្វើតេស្តវិជ្ជមានចំពោះជំងឺកូវីដ ១៩ ។

ទីក្រុង Mae Sot ស្ថិតក្នុងខេត្ដ Tak នៃប្រទេសថៃជាប់ព្រំដែនជាមួយប្រទេសមីយ៉ាន់ម៉ា ។

ថ្ងៃនេះជាថ្ងៃដំបូងដែលសាលារៀននៅទូទាំងប្រទេសថៃត្រូវបានអនុញ្ញាតឲ្យបើកដំណើរការឡើងវិញដោយមជ្ឈមណ្ឌលគ្រប់គ្រងស្ថានភាពជំងឺកូវីដ ១៩ (CCSA) បន្ទាប់ពីរលកថ្មីនៃករណីឆ្លងជំងឺកូវីដ ១៩ បានរាយការណ៍ចាប់តាំងពីខែធ្នូបានធ្លាក់ចុះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានមួយបានបង្ហើបឲ្យដឹងថា ការបញ្ជានេះធ្វើឡើង បន្ទាប់ពីអាជីវករម្នាក់នៅស្រុក Mae Sot បានធ្វើតេស្តវិជ្ជមានចំពោះជំងឺកូវីដ ១៩ ហើយត្រូវបានបញ្ជូនទៅមន្ទីរពេទ្យ Mae Sot រួមជាមួយមនុស្ស ២៥ នាក់ដែលមានទំនាក់ទំនងជិតស្និទ្ធជាមួយគាត់ ។

ប្រភពដដែលបាននិយាយថា “កាលពីយប់មិញថ្ងៃទី ៣១ ខែមករា លទ្ធផលតេស្តបន្ថែមបានបង្ហាញថាកុមារ ៥ នាក់ដែលទាក់ទងនឹងអ្នកជំងឺក៏ឆ្លងជំងឺនេះដែរ ។ ហេតុនេះហើយទើបបណ្តាលឲ្យមានការបិទសហគមន៍ដែលអ្នកជំងឺរស់នៅក៏ដូចជាសាលារៀនចំនួន ១៥ នៅក្នុងក្រុងផងដែរ” ។

គិតត្រឹមថ្ងៃចន្ទនេះខេត្ត Tak បានរាយការណ៍ថាមានករណីឆ្លងជំងឺកូវីដ ១៩ ចំនួន ១៤៤ ករណីក្នុងអំឡុងពេលនៃការផ្ទុះឡើងថ្មីដោយមានអ្នកជំងឺ ៤៩ នាក់កំពុងត្រូវបានព្យាបាល ៩៣ នាក់បានជាសះស្បើយ និងមានមនុស្សស្លាប់ ២ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation