Apple ខាតបង់ ២០០ ពាន់លានដុល្លារ ក្រោយ ចិន ហាមមិនឲ្យប្រើ iPhone

ភាគហ៊ុនរបស់ក្រុមហ៊ុន Apple កាលពីថ្ងៃព្រហស្បតិ៍បានធ្លាក់ចុះ ២.៩ ភាគរយ ហើយជាការខាតបង់តម្លៃប្រមាណ ២០០ ពាន់លានដុល្លារ ត្រឹមតែពេល ២ ថ្ងៃប៉ុណ្ណោះ បន្ទាប់ពីមានរបាយការណ៍ថា ចិនគ្រោងនឹងពង្រីកការហាមឃាត់ការប្រើប្រាស់ iPhone ដល់ភ្នាក់ងារ និងក្រុមហ៊ុនដែលគាំទ្រដោយរដ្ឋាភិបាល ។

ប្រទេសចិន គឺជាទីផ្សារបរទេសដ៏ធំបំផុតសម្រាប់ផលិតផល Apple ដែលការលក់នៅចិន មានតម្លៃប្រហែល ១ ភាគ ៥ នៃប្រាក់ចំណូលសរុបរបស់ក្រុមហ៊ុនកាលពីឆ្នាំមុន ។ អ្នកវិភាគនៅក្រុមហ៊ុនស្រាវជ្រាវ TechInsights ប៉ាន់ប្រមាណថា នៅត្រីមាសមុននៃឆ្នាំនេះ ការលក់ iPhone នៅក្នុងប្រទេសចិន មានចំនួនច្រើនជាងនៅអាមេរិកទៅទៀត ។

ចំពោះការហាមប្រាម​ពីសំណាក់ចិនត្រូវបានគេសង្កេតឃើញថា កៀកទៅនឹងថ្ងៃដែល​ក្រុមហ៊ុន Apple គ្រោងប្រកាសពីការចេញលក់ផលិតផល iPhone 15 របស់ខ្លួននាពេលឆាប់ៗខាងមុខនេះ ។  

គួរបញ្ជាក់ថា កាលពីថ្ងៃពុធ កាសែត Wall Street Journal បានរាយការណ៍ពីការហាមឃាត់របស់ចិនលើការប្រើប្រាស់ទូរស័ព្ទ iPhone សម្រាប់មន្ត្រីថ្នាក់កណ្តាល ។ ទន្ទឹមនឹងនេះសារព័ត៌មាន Bloomberg ក៏បានចុះផ្សាយកាលពីថ្ងៃព្រហស្បតិ៍ផងដែរថា ការហាមឃាត់ទាំងនោះ ត្រូវបានពង្រីកដល់ក្រុមហ៊ុនដែលគាំទ្រដោយរដ្ឋ រួមទាំងក្រុមហ៊ុនថាមពលយក្ស PetroChina ដែលផ្តល់ការងារដល់កម្មកររាប់លាននាក់ និងគ្រប់គ្រងផ្នែកដ៏ធំនៃសេដ្ឋកិច្ចចិន ៕

ប្រែសម្រួល៖​ នាង រតនៈ

ប្រភព៖ CNN