អូស្រ្តាលីអំពាវនាវឲ្យដាក់ទណ្ឌកម្មលើឧត្តមសេនីយ៍មីយ៉ាន់ម៉ា បន្ទាប់ពីរដ្ឋប្រហារ

រដ្ឋាភិបាលអូស្រ្តាលីកំពុងអំពាវនាវឲ្យដាក់ទណ្ឌកម្មថ្មីលើឧត្តមសេនីយ៍កំពូលៗរបស់មីយ៉ាន់ម៉ារួមបញ្ចូលទាំងមេដឹកនាំយោធាលោក Min Aung Hlaing ផងដែរ បន្ទាប់ពីមានរដ្ឋប្រហារកាលពីថ្ងៃចន្ទ ។

កាលពីថ្ងៃចន្ទយោធាមីយ៉ាន់ម៉ាបានដណ្តើមអំណាចនៅក្នុងប្រទេសអាស៊ីអាគ្នេយ៍មួយនេះ បន្ទាប់ពីបានឃុំខ្លួនមេដឹកនាំស៊ីវិលរួមមានទាំងលោកស្រី អ៊ុងសាន ស៊ូជី មេដឹកនាំនៃគណបក្សកាន់អំណាចដែលបានជាប់ឆ្នោតតាមបែបប្រជាធិបតេយ្យនៅក្នុងការវាយឆ្មក់មុនពេលព្រលឹម ។

ប្រទេសជាច្រើនបានថ្កោលទោសចំពោះការចលនានេះ ហើយប្រធានាធិបតីអាមេរិក Joe Biden បានគំរាមដាក់ទណ្ឌកម្មសាជាថ្មីលើមេដឹកនាំយោធាមីយ៉ាន់ម៉ាដោយអំពាវនាវឲ្យមានការលូកដៃជាអន្តរជាតិរួមគ្នាដើម្បីដាក់សម្ពាធឲ្យពួកគេបោះបង់អំណាច ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានេះក្រុមប្រឹក្សាសន្តិសុខ UN ក៏បានប្រកាសផងដែរថា ខ្លួននឹងបើកកិច្ចប្រជុំបន្ទាន់មួយលើរដ្ឋប្រហារនៅថ្ងៃអង្គារនេះ ។

ក្រុមសកម្មជនយុត្តិធម៍សម្រាប់មីយ៉ាន់ម៉ាបានអំពាវនាវដល់ប្រទេសនានាឲ្យអនុវត្តការដាក់ទណ្ឌកម្មជាបន្ទាន់ និងទ្រង់ទ្រាយធំប្រឆាំងនឹងយោធាមីយ៉ាន់ម៉ា មេដឹកនាំ និងអ្នកសមគំនិតរបស់ពួកគេ ។

ក្រុមនេះបាននិយាយនៅក្នុងសេចក្តីថ្លែងការណ៍មួយថា “រដ្ឋប្រហារយោធាបង្ហាញពីការបរាជ័យជាប្រព័ន្ធក្នុងរបៀបដែលសហគមន៍អន្តរជាតិបានដោះស្រាយជាមួយមីយ៉ាន់ម៉ាក្នុងប៉ុន្មានឆ្នាំថ្មីៗនេះដែលធ្វើឲ្យយោធា និងអាជីវកម្មរបស់មីយ៉ាន់ម៉ាមានសភាពធម្មតាវិញ ទោះបីពួកគេបានប្រព្រឹត្តអំពើប្រល័យពូជសាសន៍ ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងនឹងមនុស្សជាតិក៏ដោយ” ។

ហើយការអំពាវនាវនោះត្រូវបានគាំទ្រដោយអ្នកតស៊ូមតិនៅអូស្រ្តាលីដែលកំពុងទាមទារឲ្យរដ្ឋាភិបាលសហព័ន្ធកាត់បន្ថយកម្មវិធីសហប្រតិបត្តិការយោធាជាមួយមីយ៉ាន់ម៉ា និងពង្រីកទណ្ឌកម្មដែលមានស្រាប់លើឧត្តមសេនីយ៍កំពូលៗរបស់មីយ៉ាន់ម៉ា ។

ទន្ទឹមនោះអូស្ត្រាលីក៏បានដាក់ទណ្ឌកម្ម និងហាមឃាត់ការធ្វើដំណើររួចហើយទៅលើឧត្តមសេនីយ៍មីយ៉ាន់ម៉ា ៥ រូបដែលត្រូវបានចោទប្រកាន់ថាបានដឹកនាំការបង្ក្រាបដ៏កាចសាហាវទៅលើជនជាតិភាគតិចរ៉ូហ៊ីងយ៉ានៅក្នុងឆ្នាំ ២០១៧ ។

អូស្ត្រាលីមានកិច្ចសហប្រតិបត្តិការយោធាជាមួយមីយ៉ាន់ម៉ាអស់រយៈពេលជាច្រើនឆ្នាំមកហើយ ។ រដ្ឋាភិបាលសហព័ន្ធបានសម្តែងការព្រួយបារម្ភយ៉ាងខ្លាំងអំពីសកម្មភាពរបស់យោធានៅក្នុងប្រទេសមីយ៉ាន់ម៉ា និងបានទាមទារឲ្យដោះលែងមេដឹកនាំស៊ីវិលភ្លាមៗ ។

កាលពីថ្ងៃចន្ទរដ្ឋមន្រ្តីក្រសួងការបរទេសអូស្ត្រាលីលោកស្រី Marise Payne បាននិយាយថា អូស្រ្តាលីកំពុងឃ្លាំមើលព្រឹត្តិការណ៍នានានៅក្នុងប្រទេសមីយ៉ាន់ម៉ាយ៉ាងជិតស្និទ្ធ ។

ប៉ុន្តែរដ្ឋមន្រ្តីក្រសួងពាណិជ្ជកម្មលោក Dan Tehan បាននិយាយថា វាឆាប់ពេកហើយសម្រាប់រដ្ឋាភិបាលក្នុងការពិចារណាលើការដាក់ទណ្ឌកម្មបន្ថែមទៀត ។ លោកបាននិយាយថា “មើលទៅវាមិនមែនជាអ្វីដែលយើងបានពិចារណានៅដំណាក់កាលនេះទេ” ។

លោកបន្តថា “រឿងមួយដែលអ្នកត្រូវធ្វើគឺត្រូវពិចារណាយ៉ាងខ្លាំងជាមួយនឹងវិធីសាស្រ្តដែលអ្នកធ្វើទៅនឹងប្រភេទទាំងនេះ ។ ដូច្នេះអ្វីដែលយើងត្រូវធ្វើគឺគ្រាន់តែបញ្ឈប់ ផ្អាក មើលអ្វីដែលកំពុងកើតឡើង ហើយបន្ទាប់មកនៅពេលដែលយើងឆ្លងកាត់រាល់ព័ត៌មានលម្អិតយើងអាចធ្វើការសម្រេចចិត្តបន្ថែមទៀតបាន” ៕

ប្រែសម្រួលដោយ ៖ ជីវ័ន្ត

ប្រភព ៖ abc.net

ចុចអាន ៖ រឿងរ៉ាវនៅមីយ៉ាន់ម៉ា និងរុស្ស៊ី ជាបញ្ហាដំបូងបំផុតដែលសាកល្បងគោលនយោបាយការបរទេសរបស់ Biden

ចុចអាន ៖ មកមើលស្ថានភាពនៅក្នុងរដ្ឋធានីមីយ៉ាន់ម៉ា បន្ទាប់ពីយោធាដណ្តើមអំណាច (មានវីដេអូ)