ម្ចាស់ហាងនំប៉័ងសាច់នៅ វៀតណាម ជួបវិបត្តិផ្លូវចិត្ត ក្រោយភ្ញៀវពុលអាហារជាង ១០០ នាក់

ម្ចាស់ហាង Banh Mi Phuong ដែលជាភោជនីយដ្ឋាននៅទីក្រុង Hoi An បាននិយាយថា គាត់មានបញ្ហាផ្លូវចិត្ត ព្រោះមនុស្ស ១៤១ នាក់ រួមទាំងជនបរទេស ៣៣ នាក់​ពុលអាហារហាងរបស់គាត់ ។

Truong Thi Phuong អាយុ ៦០ ឆ្នាំបានឲ្យដឹងថា ចាប់តាំងពីការពុលអាហារបានកើតឡើងមក គាត់មានការធ្លាក់ទឹកចិត្តយ៉ាងខ្លាំង ជួនកាលមិនព្រមញ៉ាំអ្វីទាល់តែសោះ និងចង់ឲ្យជនរងគ្រោះឆាប់ជាសះស្បើយប៉ុណ្ណោះ ។

ហាងនំប៉័ងនេះ ឈរជើងមករយៈពេល ៣៤ ឆ្នាំហើយ ដល់ថ្ងៃទី ១១ ខែកញ្ញា នៅពេលដែលការពុលអាហារបានកើតឡើង ហាងខាងលើបានលក់នំប៉័ងជាង ១ ៩០០ ដុំឯណោះ ។

ក្រុមអ្នកត្រួតពិនិត្យសុខភាពដែលបានមកពិនិត្យកន្លែងលក់កាលពីថ្ងៃទី ១៣ ខែកញ្ញា ក៏បាននិយាយដែលថា កន្លែងចម្អិនអាហារមិនស្របតាមតម្រូវការអនាម័យទេ ហើយគេបានរក្សាទុកសាច់ឆៅ និងអាហាររួមគ្នាទៀតផង ។

ពេលនេះហាង Banh Mi Phuong ត្រូវបានផ្អាកដំណើរការ បន្ទាប់ពីឧបទ្ទវហេតុ ហើយមណ្ឌលសុខភាពក្នុងតំបន់ក៏បានយកគំរូអាហារពីហាងនំប៉័ងដើម្បីធ្វើតេស្តផងដែរ ៕

ប្រែសម្រួល៖ វារី

ប្រភព៖ vnexpress

ចុចអាន៖ មនុស្ស ៩១ នាក់ ពុលនំប៉័ងសាច់ពីហាងដ៏ល្បីនៅ វៀតណាម