ណាតូ អាចដាក់ពង្រាយកម្លាំង ៣.៥លាននាក់ប្រសិនបើត្រូវវាយប្រហារ

យោងតាមផែនការការពារថ្មីរបស់ខ្លួន, អង្គការណាតូ អាចដាក់ពង្រាយទាហាន ៣០ម៉ឺននាក់ ក្នុងខែដំបូងនៃការវាយប្រហារលើប្លុកនេះ ខណៈចំនួនយោធាសរុបរបស់សម្ព័ន្ធភាពដែលដាក់ពង្រាយ អាចឈានដល់៣.៥លាននាក់។ នេះបើយោងតាមប្រធានគណៈកម្មាធិការយោធាណាតូ លោក Rob Bauer គូសបញ្ជាក់កាលពីថ្ងៃអាទិត្យទី១៧ខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Bauer ប្រាប់អ្នកយកព័ត៌មានក្នុងសន្និសីទសារព័ត៌មាន ជាមួយប្រមុខការពារជាតិន័រវេស លោកឧត្តមសេនីយ៍ Eirik Kristoffersen ថា “ប្រសិនបើយើងនិយាយអំពីការការពារសមូហភាព អ្នកមិនមានពេលវេលាដើម្បីរៀបចំការវាយប្រហារទេ បើវាកើតឡើងមែននោះ ។ វាមិនមែនជាយើងឡើយ ដែលរៀបចំការវាយប្រហារគេនោះ តែគូប្រជែងយើងទេដែលរៀបចំការវាយប្រហា​រមកលើយើង។ ប្រសិនបើពួកគេវាយប្រហារ យើងត្រូវការទាហានបន្ថែមដើម្បីប្រុងជើងការ”។

លោកបន្តថា “យើងកំពុងនិយាយនៅក្នុងអង្គការណាតូទាំងមូល ប្រសិនបើហ្វាំងឡង់ និងស៊ុយអែតបានចូលរួម នោះមានទាហានប្រហែល ៣.៥ លាននាក់នៅក្នុងសម្ព័ន្ធភាពនេះ ។ ដូច្នេះ ៣០ ម៉ឺននាក់គឺជាចំនួនទាហាន ដែលនឹងដាក់ពង្រាយសម្រាប់រយៈពេល ៣០ ថ្ងៃដំបូង ប្រសិនបើចាំបាច់”។

គួរបញ្ជាក់ជាថ្មី កាលពីខែកក្កដា អគ្គលេខាធិការអង្គការណាតូ លោក Jens Stoltenberg និយាយថា ប្លុកនេះបានអនុម័តផែនការការពារជាតិថ្មី នៅក្នុងកិច្ចប្រជុំកំពូលទីក្រុង វីលនីញ៉ូស ដែលក្រោមផែនការនេះ អង្គការណាតូនឹងមានទាហាន ៣០ ម៉ឺននាក់ត្រូវប្រុងជើងការខ្ពស់ ហើយរដ្ឋជាសមាជិកនឹងវិនិយោគយ៉ាងតិច ២ ភាគរយនៃផលិតផលក្នុងស្រុកសរុប (GDP) ជារៀងរាល់ឆ្នាំក្នុងវិស័យការពារជាតិ៕

ប្រែសម្រួល៖ Vann Vann

ប្រភព៖ Sputnik

ចុចអាន៖ ប្រមុខណាតូ ព្រមានឲ្យលោកខាងលិច ត្រៀមខ្លួនសម្រាប់សង្រ្គាមរយៈពេលវែង