មានតែគ្រូបង្រៀនប៉ុន្មានប្រទេសនេះប៉ុណ្ណោះ ដែលទទួលបានប្រាក់ឈ្នួលច្រើនបំផុតលើលោក

ប្រាក់បៀវត្សរ៍គ្រូបង្រៀនប្រែប្រួលពីប្រទេសមួយទៅប្រទេសមួយ អាស្រ័យលើប្រាក់បៀវត្សរ៍ និងច្បាប់ស្តីពីប្រាក់បំណាច់របស់ប្រទេស កម្រិតបទពិសោធន៍ និងកម្រិតនៃការបង្រៀន ក្នុងចំណោមកត្តាផ្សេងៗទៀត។

ខាងក្រោមនេះគឺជាតារាងប្រាក់បៀវត្សរ៍គ្រូបង្រៀន​តាម​ប្រទេស ដើម្បីជួយអ្នកក្នុង​ការសម្រេចចិត្តថាតើអ្នក​អាចធ្វើការជាគ្រូបង្រៀននៅកន្លែង​មួយ​ណា។

១ ប្រទេស លុចសំបួរ

យោងតាមរបាយការណ៍របស់ OECD លុចសំបួរ មានគ្រូបង្រៀនដែល​មានប្រាក់ខែ​ខ្ពស់បំផុត​នៅ​លើពិភពលោក។ ប្រភពមួយផ្សេងទៀតបង្ហាញថា អ្នកកាន់សញ្ញាបត្របរិញ្ញាបត្រ​មានសិទ្ធិទទួលបានប្រាក់ខែដំបូង ៧០ ៣២៣ ២០ ដុល្លារ​អាមេរិក ក្នុងមួយឆ្នាំ នៅពេល​ចាប់ផ្តើម​អាជីពបង្រៀនរបស់ពួកគេ។

ប្រាក់ខែត្រូវបានរំពឹងថានឹងកើនឡើងដល់ ២០ ៩៩២ ដុល្លារ និង ៣១ ៤៨៨ ដុល្លារ ប្រសិន​បើពួកគេមានបទពិសោធន៍បង្រៀន១០ និង ១៥ ឆ្នាំរៀងគ្នា។ លើសពីនេះ ប្រាក់បៀវត្សរ៍ត្រូវបានគេរំពឹងថានឹងឡើងដល់កំពូល ១២៤ ៩០២ ៤០ដុល្លារ បន្ទាប់ពីរយៈពេល៣០ឆ្នាំ ដែលមានន័យថា ៥៤ ៥៧៩ ២០ ដុល្លារអាមេរិក កើនឡើងពីប្រាក់ខែដំបូងរបស់ពួកគេ។ គ្រូ​បង្រៀនដែលមានសញ្ញាប័ត្រអនុបណ្ឌិត​ ត្រូវបានគេរំពឹងថានឹងទទួលបានប្រាក់ខែខ្ពស់ជាងអ្នកកាន់​សញ្ញាបត្រ។

តាម​រយៈ​ការ​មើល​និន្នាការ​ប្រាក់​បៀវត្សរ៍​បង្ហាញ​ថា ប្រទេសមួយនេះ​​ដំឡើង​ប្រាក់​ខែ ​គឺ​ផ្អែក​លើ​ការ​អប់រំ​និង​បទពិសោធន៍។

២ ប្រទេស​ស្វីស

ប្រទេសស្វីសជាប់ចំណាត់ថ្នាក់ក្នុង​ចំណោម​ប្រទេស​ដែល​មាន​ប្រាក់ខែ​គ្រូបង្រៀន​ខ្ពស់​បំផុត​ក្នុង​ពិភពលោក។ យោងតាមប្រភពព័ត៌មាន គ្រូបង្រៀននៅវិទ្យាល័យម្នាក់មាន​សិទ្ធិទទួល​បានសំណងចំនួន ៧៣ ៦៤៦ ៩៣ ដុល្លារអាមេរិក នៅពេល​ចាប់ផ្តើម​អាជីពរបស់ពួកគេ រួមទាំងប្រាក់រង្វាន់ ប្រាក់បន្ថែមម៉ោង និងគន្លឹះផ្សេងៗ។ ម្យ៉ាងវិញទៀត គ្រូបង្រៀនដែលមានបទពិសោធន៍ ១០ ទៅ ១៩ឆ្នាំ នៅក្នុងប្រទេសត្រូវបានគេរំពឹងថា​នឹងទទួលបានប្រាក់ខែ ៩៤ ៧២២ ២០ ដុល្លារអាមេរិក ដោយផ្អែកលើប្រាក់ខែទី១៣។ លើស​ពីនេះ គ្រូ​បង្រៀន​មាន​សិទ្ធិ​ទទួល​បាន​សំណង​ចំនួន ៩៥ ៥៩១ ២៧ ដុល្លារ​អាមេរិក ប្រសិន​បើពួកគេ​មាន​បទពិសោធន៍​លើស​ពី ២០ឆ្នាំឡើងទៅ។

ប្រទេសមួយនេះ បានប្រើប្រាស់កម្រិតបទពិសោធន៍ និង​គុណវុឌ្ឍិ​នៃការអប់រំដើម្បីកំណត់ប្រាក់ខែគ្រូបង្រៀន។ ពិសេស អ្នកកាន់បរិញ្ញាបត្រជាន់ខ្ពស់នឹងទទួលបានប្រាក់បៀវត្សរ៍ខ្ពស់ជាងអ្នកដែលមានបរិញ្ញាបត្រ។ ដូច្នេះអ្នក គួរមានបរិញ្ញាបត្រផ្នែកអប់រំ ដើម្បីមានលក្ខណៈគ្រប់គ្រាន់​ជាគ្រូបង្រៀននៅវិទ្យាល័យក្នុងប្រទេស។

៣ ប្រទេស អាល្លឺម៉ង់

ប្រទេសអាល្លឺម៉ង់ជាប់ចំណាត់ថ្នាក់លេខ ២ បន្ទាប់ពីលុចសំបួក្នុងបញ្ជី OECD នៃប្រទេសដែលមានប្រាក់ខែគ្រូបង្រៀនខ្ពស់បំផុត។ យោងតាមប្រភព ប្រាក់ខែ​គ្រូបង្រៀននៅប្រទេស​អាល្លឺម៉ង់​មាន​កម្រិត​ទាបបំផុត ១ ៣៦៤ ៤៨ ដុល្លារអាមេរិក​ សម្រាប់​គ្រូបង្រៀនដំបូង និង ៤ ៧២៣ ២០ ដុល្លារ​អាមេរិក សម្រាប់គ្រូបង្រៀន​ដែល​មាន​បទពិសោធន៍។ ម្យ៉ាង​ទៀត គ្រូ​ត្រូវ​បាន​ប្រាក់​បៀវត្សរ៍​អាស្រ័យ​លើ​កម្រិត​បទពិសោធន៍​របស់​ពួក​គេ។

ជាងនេះទៅទៀត គ្រូបង្រៀនចាប់ផ្តើមមានបទពិសោធន៍ត្រឹមតែ ២ ឆ្នាំ​ ទទួលបានរហូតដល់ ១ ៥៥៣ ៤១ ដុល្លារអាមេរិកក្នុងមួយខែ។ ម្យ៉ាងវិញទៀត គ្រូបង្រៀនដែលមានបទពិសោធន៍ពី ២ ទៅ ៥ ឆ្នាំគួរតែទទួលបានប្រហែល ២ ០៧៨២១ ដុល្លារអាមេរិក។

៤ ប្រទេស អា​ព្រិច​ខាងត្បូង

ប្រាក់ខែគ្រូបង្រៀននៅអាហ្វ្រិកខាងត្បូងអាចប្រែប្រួលយ៉ាងខ្លាំងអាស្រ័យលើកត្តាផ្សេងៗ ដូចជាលក្ខណៈសម្បត្តិ បទពិសោធន៍ និងប្រភេទនៃសាលា (វិស័យសាធារណៈ ឬឯកជន)។ ប្រាក់ខែគ្រូបង្រៀនជាមធ្យមនៅអាហ្វ្រិកខាងត្បូងគឺប្រហែល ៥៧ ៨៩០ដុល្លារក្នុងមួយឆ្នាំ។ វាត្រូវបានគេចាត់ទុកថា ជាប្រទេសដែលមានប្រាក់បៀវត្សរ៍គ្រូបង្រៀនជាមធ្យមខ្ពស់បំផុតនៅអាហ្វ្រិក។

៥ ប្រទេស ដាណឺម៉ាក

ប្រាក់ខែគ្រូបង្រៀននៅប្រទេសដាណឺម៉ាកជាទូទៅប្រែប្រួល វាអាស្រ័យលើកត្តាដូចជាបទពិសោធន៍ និងកម្រិតអប់រំ។
ប្រទេសដាណឺម៉ាកយកចិត្តទុកដាក់លើការអប់រំយ៉ាងខ្លាំង ខណៈដែលគ្រូបង្រៀន​ក៏​ទទួល​បាន​ប្រាក់​សំណង​ល្អ​ដែរ​ បើ​ធៀប​នឹង​វិជ្ជាជីវៈ​ដទៃ​ទៀត​ក្នុង​ប្រទេស។​ ប្រាក់ខែគ្រូបង្រៀនជាមធ្យមនៅប្រទេសដាណឺម៉ាកគឺ ៥៤ ១៣០ ដុល្លារ ក្នុងមួយឆ្នាំ៕

ប្រែសម្រួល៖ សាង ស្រីល័ក្ខ

ចុចអាន៖ប្រទេស ៥ ជាប់ឈ្មោះថា មានតម្លៃរស់នៅខ្ពស់បំផុតក្នុងឆ្នាំ ២០២៣