ឥទ្ធិពលលើកលែងទិដ្ឋាការរបស់ ថៃ កំពុងទាញទេសចរ ចិន ជិះជិតពេញៗយន្តហោះចូលមកលេងប្រទេស

ក្រុមហ៊ុន Thai Airways International Pcl បាននិយាយថា ជើងហោះហើរពីប្រទេសចិនចូលមកកាន់ប្រទេសថៃ មានទេសចរជិះជិតពេញៗរហូតដល់​ ៩០ ភាគរយ បន្ទាប់ពីប្រទេសសេដ្ឋកិច្ចធំទីពីររបស់អាស៊ីអាគ្នេយ៍មួយនេះបានបន្ធូរបន្ថយច្បាប់ទិដ្ឋាការជាបណ្តោះអាសន្នសម្រាប់អ្នកទេសចរចិន ។

លោក Korakot Chatasingha ប្រធានផ្នែកពាណិជ្ជកម្មរបស់ក្រុមហ៊ុនអាកាសចរណ៍បានប្រាប់ទូរទស្សន៍ Bloomberg នៅថ្ងៃចន្ទនេះថា ក្រុមហ៊ុនអាកាសចរបានឃើញកំណើន​ទេសចរចិនគួរឲ្យកត់សម្គាល់ចូលមកកម្សាន្តប្រទេសថៃ ។

បច្ចុប្បន្នថៃកំពុងតែរីករាយស្វាគមន៍ភ្ញៀវ​ទេសចរ​ចិន​ចូលមកលេងកម្សាន្តនៅក្នុងប្រទេស ដោយសារតែការលើកលែងទិដ្ឋាការ​ ខណៈ​ការ​កែប្រែ​គោលនយោបាយ និង​ហេដ្ឋារចនាសម្ព័ន្ធ​អាកាសយានដ្ឋាន​ថ្មី​ កំពុងជួយ​ជំរុញ​ប្រទេស​ដែល​ពឹង​ផ្អែក​លើ​វិស័យ​ទេសចរណ៍មួយនេះ ។

ពាក់ព័ន្ធនឹងបញ្ហានេះដែរ ក្រុមហ៊ុន Thai Airways ក៏គ្រោងនឹងបង្កើនជើងហោះហើររបស់ខ្លួនទៅកាន់ទីក្រុងចំនួន ៥ របស់ប្រទេសចិន ដល់ ៥៦ ដងក្នុងមួយសប្តាហ៍ ពោលកើនឡើងពី ៤៩ ដង ចាប់ពីថ្ងៃទី១ ខែធ្នូ ឆ្នាំ ២០២៣ តទៅ ។

គួរបញ្ជាក់ថា ភ្ញៀវទេសចរ​ចិនអាចរីករាយជាមួយកម្មវិធីលើកលែងទិដ្ឋាការ​ ចាប់ពីថ្ងៃទី២៥ ខែកញ្ញា ដល់ថ្ងៃទី២៩ ខែកុម្ភៈ​ ឆ្នាំ២០២៤ ។​ ទន្ទឹមនឹងនេះ លោក Korakot ក៏បាននិយាយដែរថា ៨ ខែក្នុងឆ្នាំ ២០២៣ ការមកដល់របស់ទេសចរចិនមានត្រឹមតែ ៥០ ភាគរយប៉ុណ្ណោះនៃបរិមាណសរុបក្នុងឆ្នាំ ២០១៩ ។

ជាចុងក្រោយលោក Korakot បន្ថែមថា លោកនៅតែមានទំនុកចិត្តលើការងើបឡើងវិញរយៈពេលវែងនៃប្រភពទេសចរបរទេសដ៏ធំបំផុតរបស់ប្រទេសថៃ ហើយក្រុមហ៊ុនកំពុងថ្លឹងថ្លែងបង្កើនជើងហោះហើរពីចិនបន្ថែមទៀត ដើម្បីឲ្យទេសចរ​កើនដល់កម្រិតឆ្នាំ ២០១៩ ៕

ប្រែសម្រួល៖ នាង រតនៈ

ប្រភព៖ Bangkok Post

ចុចអាន៖ ព្រះមហាក្សត្រ ថៃ ឡាយព្រះហស្ថលេខាត្រាស់បង្គាប់តែងតាំងអគ្គស្នងការ នគរបាលជាតិថ្មី