ព័ត៌មានអន្ដរជាតិ

កុមារនៅ កូឡុំប៊ី ប្រថុយជីវិតឆ្លងទឹកទន្លេដែលមានក្រពើ ដើម្បីទៅសាលារៀន

បានផុស

២៣ នាទី មុន

នៅ

ថ្ងៃសុក្រ ៣ វិច្ឆិកា ២០២៣

ដោយ

សិស្សជាង ៧០ នាក់មកពី Villa Leidy នៅជិតទីក្រុងឆ្នេរសមុទ្រ Santa Marta ប្រទេសកូឡុំប៊ី បានប្រថុយជីវិតរបស់ពួកគេជារៀងរាល់ថ្ងៃដើម្បីទៅសាលារៀន ខណៈកុមារត្រូវឆ្លងកាត់ស្ពានបណ្តោះអាសន្នមួយឆ្លងកាត់ទន្លេ Gaira ពោរពេញដោយសត្វក្រពើ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី Dorisa Fadul ជាអ្នកភូមិម្នាក់បានប្រាប់សារព័ត៌មានថា ឪពុកម្តាយបានសំណូមពរដល់អាជ្ញាធរដែលទទួលខុសត្រូវក្នុងការថែរក្សាទីក្រុងឲ្យសាងសង់ស្ពានសុវត្ថិភាពសម្រាប់សិស្សានុសិស្សធ្វើដំណើរទៅសាលារៀន។ ប៉ុន្តែសំណើនេះត្រូវបានគេមិនអើពើ។

ស្រ្តីដដែលរូបនេះបានបញ្ចាក់ទៀតថា “មុននេះ មានស្ពានឈើមួយ ដែលយើងសាងសង់ដោយខ្លួនឯង។ ប៉ុន្តែវាបានចាប់ផ្តើមទ្រពទ្រោមក្នុងខែមករាឆ្នាំនេះ និងបានបែកបាក់នៅថ្ងៃទី ០១ ខែកក្កដាកន្លងទៅ”។

ពេលឆ្លងកាត់ស្ពានខ្សែពួរនេះ សិស្សជាង ៧០ នាក់មិនត្រឹមតែប្រឈមមុខនឹងហានិភ័យនៃការត្រូវបានទឹកនាំទៅនៅពេលណាក៏បាន។ ប៉ុន្តែក្មេងៗទាំងនោះក៏អាចនឹងធ្លាក់ទៅជាចំណីរបស់សត្វក្រពើជាច្រើន នៅក្នុងទន្លេ Kaira ផងដែរ។

លោក Eduardo Fadul ដែលបានជួយសាងសង់ស្ពានទីមួយនៅក្នុងតំបន់នេះ ធ្លាប់បានគោះទ្វារការិយាល័យអភិបាលក្រុងជាច្រើនដង។ លោកក៏បានស្នើសុំការសាងសង់ស្ពានថ្មី និងជូនដំណឹងដល់ការិយាល័យគ្រប់គ្រងហានិភ័យក្រុង ដើម្បីចង់ដឹងពីសភាពការណ៍យ៉ាងណាក៏ដោយ រហូតមកដល់ពេលនេះប្រជាពលរដ្ឋនៅមិនទាន់មានភ្នាក់ងារណាប្រាប់ឲ្យដឹងនៅឡើយទេ អំពីគម្រោងសាងសង់ស្ពានសម្រាប់កុមារ។

លោក Fadul បាននិយាយថា “នៅពេលដែលទឹកមានកម្រិតទាប ប្រជាជនអាចប្រើក្បូនដើម្បីឆ្លងកាត់តំបន់នេះ។ ដែលត្រូវបានចាត់ទុកថាមានគ្រោះថ្នាក់ខ្លាំងផងដែរ។ ប៉ុន្តែពេលទឹកឡើង ប្រជាជនមិនអាចប្រថុយអាយុជីវិតបានទេ ហើយក្មេងៗក៏គ្មានជម្រើសក្រៅពីឆ្លងស្ពានទឹកទៅរៀនដែរ”៕