មន្ទីរពេទ្យនៅភាគខាងជើង អ៊ីស្រាអែល យកចំណតរថយន្តក្រោមដីធ្វើជា​បន្ទប់ព្យាបាលអ្នកជំងឺ

មន្ទីរពេទ្យមួយកន្លែងនៅទីក្រុង Haifa ភាគខាងជើងប្រទេសអ៊ីស្រាអែលបានប្រែក្លាយកន្លែងចតរថយន្តក្រោមដីទៅជាបន្ទប់ព្យាបាលអ្នកជំងឺ ក្នុងគោលបំណងដើម្បីបញ្ចៀសការវាយប្រហារដែលអាចកើតមានពីសំណាក់ក្រុមសកម្មប្រយុទ្ធនិកាយ Shia ហេសបូឡាដែលមានមូលដ្ឋាននៅប្រទេសលីបង់ ។

ទីតាំងរបស់បន្ទប់ព្យាបាលបណ្ដោះអាសន្ននេះអាចដាក់គ្រែបានចំនួន ២,០០០ គ្រែ ហើយបុគ្គលិកពេទ្យក៏បានត្រៀមខ្លួនរួចជាស្រេចផងដែរក្នុងការព្យាបាលអ្នកជំងឺជាមួយឧបករណ៍ទាំងអស់ដែលមានស្រាប់នៅទីនោះក្នុងរយៈពេលប្រហែល ៥០ ម៉ោង ។

ពាក់ព័ន្ធនឹងបញ្ហានេះ នាយករងមន្ទីរពេទ្យបាននិយាយថា ឧបករណ៍សង្គ្រោះបន្ទាន់ និងអុកស៊ីសែនត្រូវបានដំឡើងនៅលើជញ្ជាំងរួចរាល់អស់ហើយ ហើយមន្ទីរពេទ្យក៏មានគ្រែបម្រុងប្រមាណ ១០០ គ្រែសម្រាប់សង្គ្រោះបន្ទាន់ដល់ទាហាន និងជនស៊ីវិលដែលរងរបួសផងដែរ ។ នាយករងមន្ទីរពេទ្យបានសង្កត់ធ្ងន់ថា ជនស៊ីវិលជាច្រើននឹងត្រូវស្លាប់ ប្រសិនបើការប្រយុទ្ធគ្នានៅតែបន្តឡើងកម្ដៅខ្លាំងបែបនេះ ។

ការប្រយុទ្ធគ្នារវាងភាគីទាំងពីរនៅតំបន់ភាគខាងជើងក៏កំពុងក្ដៅគគុកផងដែរ ស្របពេលដែល​យោធា​អ៊ីស្រាអែល​បង្កើន​ការវាយប្រហារ ក៏ដូចជាបុកទម្លុះខែលការពារ​ប្រឆាំង​នឹង​ក្រុមប្រដាប់អាវុធប៉ាឡេស្ទីនហាម៉ាសនៅព្រំដែន​ភាគ​ខាង​ត្បូងនៃតំបន់ហ្គាហ្សាស្រ្ទីប​ ។

ប្រព័ន្ធផ្សព្វផ្សាយក្នុងស្រុកបាននិយាយថា ក្នុងការប្រតិបត្តិការបុកទម្លុះចូលនៅភាគខាងជើងតំបន់ហ្គាហ្សា មានទាហានអ៊ីស្រាអែល ៧ នាក់បានបាត់បង់ជីវិត ខណៈក្រុមសកម្មប្រយុទ្ធហេសបូឡាប្រហែល ៥០ នាក់ត្រូវបានសម្លាប់ដោយកងកម្លាំងការពារជាតិអ៊ីស្រាអែល (IDF) ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ីស្រាអែល ចោទ ក្រុមហាម៉ាស ថា យកស្ត្រី និងកុមារជាង ១០០ នាក់ធ្វើជា​ខែលការពារ