EU៖ ដូចជាមិនមើលឃើញសញ្ញាថា អ៊ុយក្រែន អាចឈ្នះរុស្ស៊ី សោះ

ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បាននិយាយកាលពីថ្ងៃសៅរ៍ទី១១ខែវិច្ឆិកាថា ហាក់ដូចជាមិនទាន់ឃើញមានសញ្ញាដែលថា អ៊ុយក្រែន ឈ្នះសោះនៅក្នុងជម្លោះជាមួយរុស្ស៊ី។ លោកបន្ថែមថា ប្លុកនេះត្រូវតែត្រៀមខ្លួនឲ្យរួចជាស្រេច ដើម្បីគាំទ្រដល់ទីក្រុងកៀវសម្រាប់រយៈពេលដ៏យូរ និងលទ្ធភាពនៃការឈប់ពឹងផ្អែកលើជំនួយយោធារបស់សហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថាជាវីដេអូទៅកាន់សមាជនៃគណបក្សសង្គមនិយមអឺរ៉ុប (PES) នៅទីក្រុង Malaga នៃប្រទេសអេស្ប៉ាញ, លោក Borrell ប្រកាសថា ជម្លោះអ៊ុយក្រែន គឺអូសបន្លាយពេលយូរពេក ហើយត្រូវទទួលស្គាល់ថា ទីក្រុងកៀវ នឹងមិនអាចប្រឈមជាមួយយោធារុស្ស៊ីបានទេ បើគ្មានការគាំទ្រពីលោកខាងលិច។

លោក Borrell និយាយថា បណ្តាប្រទេស EU ក៏គួរតែមានឆន្ទៈនយោបាយ ដើម្បីបន្តគាំទ្រគោ​លនយោបាយជំនួយអ៊ុយក្រែនរបស់ប្លុកនេះផងដែរ។ អ្នកការទូតរូបនេះ ក៏បានក្រើនរំលឹកផងដែរថា EU ប្រហែលជាត្រូវអន្តរាគមន៍រឿងជំនួយ បើការជួយរបស់សហរដ្ឋអាមេរិក ថយចុះ។

ថ្វីបើ EU និងសមាជិករបស់ខ្លួន បានចំណាយលើសសហរដ្ឋអាមេរិក ជិតទ្វេដងលើជំនួយផ្នែកយោធា ហិរញ្ញវត្ថុ និងមនុស្សធម៌សរុបដល់អ៊ុយក្រែនក៏ដោយ ប៉ុន្តែទីក្រុងវ៉ាស៊ីនតោន នៅតែជាអ្នកឧបត្ថម្ភយោធាដ៏ធំបំផុតតែមួយគត់របស់ទីក្រុងកៀវ។ 

ទិន្នន័យបានបង្ហាញថា គ្រាន់តែសហរដ្ឋអាមេរិកម្នាក់ឯង បានចំណាយប្រហែល៤៥ពាន់លានដុល្លារទៅហើយ លើជំនួយយោធាសម្រាប់អ៊ុយក្រែន បន្ទាប់មកគឺប្រទេសអាល្លឺម៉ង់ ដែលជួយប្រាក់១៨.២ពាន់លានដុល្លារ៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី៖ មេដឹកនាំលោកខាងលិច ដឹងច្បាស់ហើយថា អ៊ុយក្រែន កំពុងលួចលុយពួកគេ