ករណីកម្រ ស្ត្រី​អាមេរិកម្នាក់មានស្បូន ២ ពពោះកូនភ្លោះ

ស្ត្រីម្នាក់នៅរដ្ឋ Alabama នៃសហរដ្ឋអាមេរិកមានស្បូនចំនួន ២ ពីកំណើត ហើយថែមទាំងពពោះកូនភ្លោះទៀតផង ខណៈគ្រូពេទ្យរបស់ស្ត្រីរូបនោះបានលើកឡើងថា នេះគឺជាករណីដ៏កម្របំផុត ។

អ្នកស្រី Kelsey Hatcher ជាម្ដាយកូន ៣ នាក់ ដែលមានទាំងស្បូន និងមាត់ស្បូនចំនួន ២ ពីកំណើត ក៏មិននឹកស្មានថាខ្លួនឯងអាចពពោះកូនភ្លោះបាននោះដែរ ។

លោក Richard Davis អ្នកជំនាញខាងមានផ្ទៃពោះនៅមន្ទីរពេទ្យ University of Alabama-Birmingham បានឲ្យដឹងថា “មានស្រ្តីតិចជាង ១ ភាគរយ ឬប្រហែល ៣ នាក់ប៉ុណ្ណោះក្នុងចំណោម ១,០០០ នាក់ ដែលមានទាំងស្បូន និងមាត់ស្បូន ២ ដូច្នេះការមានកូនភ្លោះពិតជាកម្រណាស់” ។

នៅពេលដែល Hatcher សម្រាលកូន លោក Davis បានដាស់តឿនថា គ្រូពេទ្យត្រូវតែមានការប្រុងប្រយ័ត្នខ្ពស់ក្នុងការត្រួតពិនិត្យស្បូននីមួយៗ និងកំណត់ថាតើមួយណាកន្ត្រាក់មុន ឬកន្ត្រាក់ម្ដងទាំងពីរ ដើម្បីចៀសវាងគ្រោះថ្នាក់ ៕

ប្រែសម្រួល៖ វារី

ប្រភព៖ Insider

ចុចអាន៖ មកស្គាល់ស្បូនសិប្បនិម្មិត ជួយសម្រួលស្ត្រីមិនឲ្យពិបាកសម្រាលកូន