ទីបំផុត មេទ័ពមីយ៉ាន់ម៉ា ចេញមុខបញ្ជាក់ច្បាស់ៗជាលើកដំបូងបន្ទាប់ពីរដ្ឋប្រហារ

មេដឹកនាំរដ្ឋប្រហារនៅប្រទេសមីយ៉ាន់ម៉ា បានថ្លែងសុន្ទរកថាតាមទូរទស្សន៍ជាលើកដំបូងដោយព្យាយាមបង្ហាញពីភាពត្រឹមត្រូវរបស់ខ្លួនស្របពេលមានបាតុកម្មទ្រង់ទ្រាយធំ។

លោក Min Aung Hlaing បាននិយាយថា ការបោះឆ្នោតកាលពីខែវិច្ឆិកាដែលឈ្នះភ្លូកទឹកភ្លូកដីដោយគណបក្សរបស់លោកស្រី ស៊ូជី គឺមិនយុត្តិធម៌ទេ។

សុន្ទរកថារបស់ឧត្តមសេនីយ៍ Min Aung Hlaing បានផ្តោតសំខាន់លើហេតុផលនៃការធ្វើរដ្ឋប្រហារ និងមិនសូវផ្តោតលើការគំរាមកំហែងដល់ក្រុមបាតុករទេ។

លោកនិយាយថា គណៈកម្មការរៀបចំការបោះឆ្នោត បានខកខានក្នុងការស៊ើបអង្កេតអំពីភាពមិនប្រក្រតីទាក់ទងនឹងបញ្ជីឈ្មោះអ្នកបោះឆ្នោតនៅក្នុងការបោះឆ្នោតខែវិច្ឆិកា ហើយមិនបានអនុញ្ញាតឲ្យមានយុទ្ធនាការឃោសនាបោះឆ្នោតដោយយុត្តិធម៌ឡើយ។

ទោះបីជាយ៉ាងណាក៏ដោយ គណៈកម្មការនេះនិយាយថា មិនមានភ័ស្តុតាងណាមួយ គាំទ្រការអះអាងនៃអំពីការក្លែងបន្លំនេះទេ។

ស្របពេលជាមួយគ្នានោះ លោកឧត្ដមសេនីយ៍ Min Aung Hlaing បានសន្យាថា នឹងមានបោះឆ្នោតថ្មីហើយនឹងប្រគល់អំណាចដល់អ្នកឈ្នះ។ គណៈកម្មការបោះឆ្នោតដែលធ្វើកំណែទម្រង់ថ្មីមួយ នឹងត្រួតពិនិត្យការបោះឆ្នោតនោះ។

លោកក៏បាននិយាយផងដែរថា ការគ្រប់គ្រងរបស់លោកនឹងខុសពីអ្វីដែលជាការក្តោបក្តាប់អំណាចយោធារយៈពេល៤៩ឆ្នាំ ដែលគេមើលឃើញមានការបង្ក្រាបយ៉ាងឃោរឃៅក្នុងឆ្នាំ១៩៨៨និង២០០៧។

លោកក៏បានប្រាប់ពលរដ្ឋផងដែរឲ្យទទួលស្គាល់ការពិត ហើយកុំធ្វើតាមអារម្មណ៍ខ្លួនឯង។

លោកឧត្តមសេនីយ៍មិនបានគំរាមដោយផ្ទាល់ដល់អ្នកតវ៉ាទេ ដោយគ្រាន់តែនិយាយថា គ្មាននរណាម្នាក់នៅពីលើច្បាប់ឡើយ៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ តំបន់មួយចំនួនក្នុងប្រទេសមីយ៉ាន់ម៉ា ប្រកាសច្បាប់អាជ្ញាសឹក