អ៊ីស្រាអែល រកឃើញផ្លូវរូងក្រោមដីថ្មីរបស់ក្រុមហាម៉ាស ប្រវែង ៥៥ ម៉ែត្រ

កងទ័ព​អ៊ីស្រាអែល​កាលពីថ្ងៃអាទិត្យបានអះអាងរកឃើញផ្លូវរូងក្រោមដីមួយកន្លែងទៀតនៅក្រោមមន្ទីរពេទ្យដែលកំពុងខ្ទេចខ្ទាំ Al-Shifa ភាគខាងជើងតំបន់ហ្គាហ្សា ដោយសារតែការទម្លាក់គ្រាប់បែកមិនប្រណីដៃពីសំណាក់កងកម្លាំងការពារជាតិអ៊ីស្រាអែល (IDF) ក្នុងរយៈពេលជិតមួយសប្ដាហ៍កន្លងមកនេះ ។

នៅក្នុងសេចក្តីថ្លែងការណ៍មួយបានឲ្យដឹងថា កងទ័ពបានរកឃើញផ្លូវរូងក្រោមដីប្រវែង ៥៥ ម៉ែត្រ និងជម្រៅ ១០ ម៉ែត្រ នៅក្រោមកន្លែងព្យាបាលដ៏ធំបំផុតរបស់តំបន់ហ្គាហ្សា ដែលកំពុងស្ថិតនៅក្នុងការឡោមព័ទ្ធដោយទាហានអ៊ីស្រាអែលអស់រយៈពេលជាច្រើនថ្ងៃ ។

យោធាបាននិយាយថា “ការរកឃើញនេះបង្ហាញយ៉ាងច្បាស់ពី អគារជាច្រើននៅក្នុងបរិវេណមន្ទីរពេទ្យត្រូវបានប្រើប្រាស់ដោយក្រុមហាម៉ាស ធ្វើជាទីតាំងសម្រាប់ការពារហេដ្ឋារចនាសម្ព័ន្ធ និងសកម្មភាពភេរវកម្ម ហើយនេះគឺជាព័ស្តុតាងបន្ថែមទៀតនៃការប្រព្រឹត្តអំពើឃោរឃៅរបស់ក្រុមហាម៉ាស ជាពិសេសគឺការប្រើប្រាស់ពលរដ្ឋនៅតំបន់ហ្គាហ្សាស្ទ្រីបធ្វើជាខែលការពារមនុស្ស” ។

អ្នកនាំពាក្យយោធាអ៊ីស្រាអែល លោក Daniel Hagari បានប្រាប់អ្នកយកព័ត៌មានថា ច្រកចូលនៃផ្លូវរូងក្រោមដីត្រូវបានរកឃើញ បន្ទាប់ពីគ្រឿងចក្រឈូសឆាយរបស់យោធាកំពុងធ្វើសកម្មភាពបុកផ្ដួលជញ្ជាំងនៅខាងក្រៅអគារមន្ទីរពេទ្យ ហើយថែមទាំងប្រទះឃើញជណ្តើររង្វង់ដែកនៅក្នុងផ្លូវរូងដែលមានជម្រៅ ១០ ម៉ែត្រនោះផងដែរ ។

លោក Hagari បាននិយាយថា “វាជាជណ្តើរដែកដ៏ធំមួយ ហើយនៅពេលយើងដើរចុះទៅ រូងនោះមានប្រវែង ៥៥ ម៉ែត្រ ខណៈកងទ័ពក៏បានប្រទះឃើញរថយន្តមួយគ្រឿងផ្ទុកទៅដោយអាវុធជាច្រើន រួមមានគ្រឿងផ្ទុះ និងកាំភ្លើងប្រភេទ Kalashnikov ជាពិសេសរូងនោះក៏មានទ្វារការពារគ្រឿងផ្ទុះដ៏រឹងមាំមួយ ហើយថែមទាំងមានរន្ធចុះសម្រាប់បាញផងដែរ ។ ទោះជាយ៉ាងណា កងទ័ពមិនទាន់ហ៊ានបើកទ្វារនោះនៅឡើយទេ ដោយសារតែខ្លាចជាប់អន្ទាក់” ។

អ៊ីស្រាអែលបានចាត់ទុកមន្ទីរពេទ្យ Al-Shifa ជាចំណុចស្នូលនៃប្រតិបត្តិការវាយលុករបស់ខ្លួន ចាប់តាំងពីកងទ័ពបានវាយឆ្មក់ចូលបរិវេណរបស់មន្ទីរពេទ្យកាលពីថ្ងៃទី១៥ ខែវិច្ឆិកា ដោយលើកហេតុផលថា ក្រុមហាម៉ាសមានមជ្ឈមណ្ឌលបញ្ជាការ និងមូលដ្ឋានយោធា ក៏ដូចជាលាក់ចំណាប់ខ្មាំងដែលពួកគេចាប់ឃុំខ្លួននៅក្រោមមន្ទីរពេទ្យធំប្រចាំតំបន់ហ្គាហ្សាមួយនេះ ។

រហូតមកដល់ពេលនេះ អ៊ីស្រាអែលនៅតែបន្តធ្វើការវាយប្រហារទាំងតាមផ្លូវអាកាស និងផ្លូវគោកដោយមិនប្រណីដៃលើតំបន់ហ្គាហ្សាស្ទ្រីប រួមទាំងមន្ទីរពេទ្យ កន្លែងស្នាក់នៅ និងវិហារឥស្លាមផងដែរ ចាប់តាំងពីក្រុមហាម៉ាសប៉ាឡេស្ទីនបើកការរវាយប្រហារឆ្លងព្រំដែនកាលពីថ្ងៃទី៧ ខែតុលា និងបានចាប់ចំណាប់ខ្មាំងប្រហែល ២៤០ នាក់ ។

យោងតាមក្រសួងសុខាភិបាលនៅតំបន់ហ្គាហ្សាបានឲ្យដឹងថា ចាប់តាំងពីពេលនោះមក ជនស៊ីវិលលើស ១៣,០០០ នាក់ រួមទាំងកុមារ និងស្ត្រីជាង ៩,០០០ នាក់ត្រូវបានសម្លាប់ ខណៈខាងអ៊ីស្រាអែលវិញមានមនុស្សជិត ១,២០០ នាក់បានបាត់បង់ជីវិត ។

ក្រៅ​ពី​ចំនួន​អ្នក​ស្លាប់ដ៏ច្រើនសន្ធឹកសន្ធាប់នេះ ក្រសួងសុខាភិបាលដែលគ្រប់គ្រងដោយក្រុមហាម៉ាសបាននិយាយថា ការវាយប្រហារសងសឹករបស់អ៊ីស្រាអែលលើតំបន់ហ្គាហ្សា ក៏បានបណ្ដាលឲ្យមនុស្សលើស ៣០,០០០ នាក់ រងរបួសផងដែរ ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ គ្រាប់ផ្លោងជាច្រើនបាញ់រះចេញពី លីបង់ ហោះទៅកាន់ អ៊ីស្រាអែល