ដឹងមូលហេតុ ដែលការដោះដូរចំណាប់ខ្មាំង និងអ្នកទោស អ៊ីស្រាអែល-ហាម៉ាស ត្រូវពន្យារពេល

ប្រភពពីខាងប៉ាឡេស្ទីនបានបញ្ជាក់ថា ការដោះលែងចំណាប់ខ្មាំងដែលត្រូវឃុំខ្លួននៅតំបន់ហ្គាហ្សា គឺត្រូវពន្យារពេល ២៤ ម៉ោង ដោយសារតែអ៊ីស្រាអែល និងក្រុមហាម៉ាស មិនឯកភាពគ្នាទៅលើថាតើចំណាប់ខ្មាំង ឬអ្នកទោសណាត្រូវដោះលែងមុន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ីស្រាអែល បានយល់ព្រមលើកិច្ចព្រមព្រៀងដែលនឹងដោះដូរអ្នកទោសប៉ាឡេស្ទីន និងចំណាប់ខ្មាំងចំនួន ៥០ នាក់ជាមួយក្រុមហាម៉ាស ខណៈដំបូងឡើយ ដំណើរការនៃការដោះលែងគ្រោងចាប់ផ្តើមនៅម៉ោង ១០ ព្រឹកថ្ងៃព្រហស្បតិ៍ ទី២៣ ខែវិច្ឆិកា ប៉ុន្តែក្រុមមន្ត្រីនិយាយថា មិនមានការដោះលែងចំណាប់ខ្មាំងណាម្នាក់នោះទេ រហូតដល់ថ្ងៃសុក្រ ។

តាមការបញ្ជាក់ពីមន្ត្រីប៉ាឡេស្ទីន, បទឈប់បាញ់ត្រូវបានពន្យារពេល ដោយសារអ៊ីស្រាអែល និងក្រុមហាម៉ាស មិនព្រមព្រៀងគ្នាទៅលើថាតើ ចំណាប់ខ្មាំងណានឹងត្រូវដោះលែងមុន និងត្រូវដោះលែងដោយរបៀបណា ខណៈភាគីទាំងសងខាង បានផ្លាស់ប្តូរបញ្ជីឈ្មោះអ្នកដែលត្រូវដោះលែងរួចទៅហើយ ។

គួររម្លឹកឡើងវិញថា កាលពីថ្ងៃពុធ ទី២២ ខែវិច្ឆិកា គណៈរដ្ឋមន្ត្រី​របស់​អ៊ីស្រាអែល ​បាន​អនុម័តក្នុងសំឡេងភាគច្រើនលើ​កិច្ចព្រមព្រៀង​មួយ ​ដែល​នឹងនាំឲ្យ​មាន​ការ​ដោះលែង​ចំណាប់ខ្មាំង​ខ្លះ​ពី​តំបន់​ហ្គាហ្សា ។

គណៈរដ្ឋមន្ត្រីអ៊ីស្រាអែល បានបោះឆ្នោតលើផែនការ ដែលនឹងផ្អាកការវាយលុករបស់ខ្លួននៅហ្គាហ្សា រយៈពេលច្រើនថ្ងៃ ជាថ្នូរនឹងការដោះលែងចំណាប់ខ្មាំងប្រហែល ៥០ នាក់ក្នុងចំណោមចំណាប់ខ្មាំងទាំង ២៤០ នាក់ដែលកំពុងស្ថិតនៅក្នុងដៃក្រុមហាម៉ាស ។

ក្រោយមក អ៊ីស្រាអែលក៏បានបញ្ចេញបញ្ជីឈ្មោះជនជាតិប៉ាឡេស្ទីនចំនួន ៣០០ នាក់ដែលអាចនឹងដោះលែងតាមដំណាក់កាលក្រោមកិច្ចព្រមព្រៀងនេះ ខណៈបញ្ជីនោះមានបង្ហាញទាំងឈ្មោះ អាយុ និងបទល្មើសរបស់អ្នកដែលនឹងត្រូវដោះលែងទៀតផង ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ការដោះដូរចំណាប់ខ្មាំងនិងអ្នកទោស រវាងអ៊ីស្រាអែល ជាមួយក្រុមហាម៉ាស ត្រូវពន្យារពេល