រុស្ស៊ី ឆ្លើយតបខ្លាំងៗចំពោះផែនការ បង្កើតតំបន់យោធាពិសេស “Schengen” របស់ ណាតូ

អ្នកនាំពាក្យវិមានក្រឹមឡាំង លោក Dmitry Peskov និយាយថា សេចក្តីថ្លែងការណ៍របស់អង្គការណាតូ ទាក់ទងនឹងលទ្ធភាពនៃការបង្កើតតំបន់យោធាពិសេស “Schengen” នឹងធ្វើឲ្យស្ថានការណ៍នៅទ្វីបអឺរ៉ុបកាន់តែក្តៅគគុក ហើយអាចនាំឲ្យមានការកើនឡើងនៃទំនាក់ទំនងដ៏តានតឹងជាមួយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអត្ថាធិប្បាយនេះធ្វើឡើង បន្ទាប់ពីប្រធានផ្នែកព័ស្តុភារអឺរ៉ុបរបស់អង្គការណាតូ លោកឧត្តមសេនីយ៍ឯក Alexander Sollfrank បានអំពាវនាវឲ្យបណ្តាប្រទេសអឺរ៉ុប ត្រូវបន្ធូរបន្ថយបទប្បញ្ញត្តិកម្រិតជាតិ ដើម្បីអនុញ្ញាតឲ្យមានការចល័តកងទ័ព គ្រឿងបរិក្ខារ និងគ្រាប់រំសេវឲ្យបានលឿន ក្នុងព្រឹត្តិការណ៍ផ្ទុះសង្គ្រាមជាមួយរុស្ស៊ី។

លោក Peskov ថ្លែងបែបនេះ ទៅកាន់អ្នកសារព័ត៌មានកាលពីថ្ងៃសុក្រទី២៤ខែវិច្ឆិកា នៅពេលត្រូវបានសួរថាតើ វិមានក្រឹមឡាំង ចាត់ទុកការលើកឡើងរបស់មន្ត្រីអង្គការណាតូថា ជាការប្រថុយប្រថានបង្កជម្លោះប្រដាប់អាវុធរវាងរុស្ស៊ីនិងអឺរ៉ុប ឬការប្រឈមមុខដាក់គ្នារបស់សម្ព័ន្ធមិត្តដឹកនាំដោយសហរដ្ឋអាមេរិកជាមួយរុស្ស៊ី មែនឬទេ។

អ្នកនាំពាក្យវិមានក្រឹមឡាំងលើកឡើងថា “សេចក្តីថ្លែងការណ៍របស់លោក Sollfrank ទំនងជាបង្ហាញពីការប្រឈមមុខដាក់គ្នាកាន់តែខ្លាំងឡើងរបស់ណាតូជាមួយរុស្ស៊ី។ ឥឡូវរឿងរ៉ាវ បានបង្ហាញកាន់តែច្បាស់ហើយថា សម្ព័ន្ធភាពនេះ តែងតែចាត់ទុកប្រទេសរបស់យើងជាសត្រូវ”។

លោក Peskov សង្កត់ធ្ងន់ថា “នេះគ្មានអ្វីក្រៅពីការប៉ុនប៉ង បង្កើនភាពតានតឹងនៅអឺរ៉ុប ដែលនឹងបង្កផលវិបាកនោះទេ។ រុស្ស៊ី មិននៅស្ងៀមឡើយ បើកអង្គការណាតូពង្រីកខ្លួនមែន”។

សូមបញ្ជាក់ជាថ្មី បច្ចុប្បន្ន ណាតូ មាន​ទាហាន ១០០០០នាក់ ​ក្នុង​ក្រុម​សមរភូមិ​ចំនួន៨ ដែល​ឈរជើង​នៅ​ទូទាំង​អឺរ៉ុប​ខាងកើត។

អគ្គលេខាធិការ Jens Stoltenberg បានប្រកាសកាលពីឆ្នាំមុនថា លោកមានបំណងបន្ថែមកងទ័ពបម្រុងកម្រិតខ្ពស់ចំនួន ៣០០០០០នាក់ទៀត ដើម្បីទៅជួយពួកគេនាពេលអនាគត។ នៅក្រោមផែនការរបស់ Stoltenberg, កងទ័ពចំនួន ១០០០០០នាក់ នឹងអាចទៅដល់សមរភូមិក្នុងរយៈពេលមួយសប្តាហ៍ ខណៈអ្នកនៅសល់នឹងទៅដល់នៅមួយខែក្រោយ៕

ប្រែសម្រួល៖ Vann Vann

ប្រភព៖ RT

ចុចអាន៖ ណាតូ គ្រោងបង្កើតតំបន់យោធាពិសេស ដើម្បីធ្វើប្រតិបត្តិការ ករណីផ្ទុះសង្គ្រាមជាមួយ រុស្ស៊ី