តុលាការ ICC កំពុងតាមចាប់ចំណុចឧក្រិដ្ឋកម្មសង្គ្រាមរបស់ អ៊ីស្រាអែល នៅតំបន់ហ្គាហ្សា

ប្រធានរដ្ឋអាជ្ញារបស់តុលាការឧក្រិដ្ឋកម្មអន្តរជាតិ (ICC) លោក Karim Khan បាននិយាយកាលពីថ្ងៃព្រហស្បតិ៍ថា ប្រសិនបើអ៊ីស្រាអែលពិតជាមានចេតនាក្នុងការរារាំងមិនឲ្យមានការផ្ដល់ជំនួយទៅដល់ដៃជនស៊ីវិលនៅក្នុងតំបន់ហ្គាហ្សាស្ទ្រីបមែននោះ តុលាការ ICC ក៏អាចចាត់ទុកចំណុចនេះជាឧក្រិដ្ឋកម្មសង្គ្រាមផងដែរ ។

លោក Karim Khan បាននិយាយនៅលើបណ្ដាញសង្គម X ថា ច្បាស់ណាស់ វានឹងក្លាយជាឧក្រិដ្ឋកម្មសង្គ្រាម ប្រសិនបើអ៊ីស្រាអែលពិតជាមានចេតនារារាំងជំនួយមនុស្សធម៌មិនឲ្យទៅដល់ដៃជនស៊ីវិលនៅតំបន់ហ្គាហ្សាមែននោះ ដូច្នេះវានឹងសម្លាប់ពលរដ្ឋនៅទីនោះជាក់ជាមិនខាន ព្រោះពួកគេពិតជាត្រូវការជំនួយជាបន្ទាន់ ។

ស្របពេលជាមួយគ្នានេះ ការអះអាងរបស់លោក Karim Khan ក៏មិនខុសគ្នាពីការលើកឡើងរបស់អគ្គលេខាធិការអង្គការសហប្រជាជាតិលោក Antonio Guterres នោះទេ ពោលលោកអំពាវឲ្យយកមាត្រា ៩៩ នៃធម្មនុញ្ញរបស់អង្គការសហប្រជាជាតិទៅប្រើប្រាស់ក្នុងសង្គ្រាមរវាងអ៊ីស្រាអែល និងក្រុមហាម៉ាស ។

ក្នុងមាត្រា ៩៩ នៃធម្មនុញ្ញរបស់អង្គការសហប្រជាជាតិបានចែងថា នឹងអនុញ្ញាតឲ្យក្រុមប្រឹក្សាសន្តិសុខយកចិត្តទុកដាក់តាមគោលគំនិតរបស់អគ្គលេខាធិការអង្គការសហប្រជាតិចំពោះការការពារមហន្តរាយ ការថែរក្សាសន្តិភាព និងសន្តិសុខពិភពលោក ។ ម្យ៉ាងទៀត មាត្រានេះក៏ខានប្រើអស់រយៈពេលជាច្រើនទសវត្សរ៍មកហើយដែរ ដូច្នេះអាចថា វាជាពេលវេលាស័ក្កិសមក្នុងការប្រើប្រាស់សម្រាប់ក្នុងដំណាក់កាលសង្គ្រាមមួយនេះ ។

ភាពតានតឹងនៅមជ្ឈិមបូព៌ាបានផ្ទុះឡើងសាជាថ្មី បន្ទាប់ពីក្រុមប្រដាប់អាវុធប៉ាឡេស្ទីនហាម៉ាសបានបើកការវាយប្រហារដោយបាញ់គ្រាប់រ៉ុកកែតយ៉ាងសន្ធាប់ និងគួរឲ្យភ្ញាក់ផ្អើលចេញពីតំបន់ហ្គាហ្សាស្ទ្រីបមកលើទឹកដីនៃប្រទេសអ៊ីស្រាអែលដោយបានសម្លាប់មនុស្សប្រមាណ ១,២០០ នាក់ ។

ជាការឆ្លើយតប អ៊ីស្រាអែលបានបើកការវាយប្រហារទាំងតាមផ្លូវអាកាស និងផ្លូវគោកដោយមិនប្រណីដៃទៅលើតំបន់ហ្គាហ្សាស្ទ្រីប ក៏ដូចជាធ្វើការបិទតំបន់នោះទាំងស្រុងផងដែរ ហើយថែមទាំងកាត់ផ្តាច់ទឹក អគ្គិសនី ស្បៀងអាហារ ថ្នាំសង្កូវ និងជំនួយមនុស្សធម៌ផ្សេងៗមិនដល់ដៃជនស៊ីវិលឡើយ ។

រហូតមកដល់ពេលនេះ ជនស៊ីវិលជាង ១៧,១០០ នាក់ត្រូវបានសម្លាប់ ដោយក្នុងនោះភាគច្រើនជាកុមារ និងស្ត្រី ខណៈក្រៅ​ពី​ចំនួន​អ្នក​ស្លាប់ដ៏ច្រើនសន្ធឹកសន្ធាប់នេះ ក្រសួងសុខាភិបាលដែលគ្រប់គ្រងដោយក្រុមហាម៉ាសបាននិយាយថា ការវាយប្រហារសងសឹករបស់អ៊ីស្រាអែលលើតំបន់ហ្គាហ្សា ក៏បានបណ្ដាលឲ្យមនុស្សជាង ៤៦,០០០ នាក់ រងរបួសផងដែរ ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ លម្អិតសង្គ្រាម អ៊ីស្រាអែល-ហាម៉ាស ក្នុងរយៈពេល ២ ខែមកនេះ