អាកាសធាតុនៅ ទីក្រុងសេអ៊ូល ចុះត្រជាក់ខ្លាំងដល់ -១៨ អង្សាសេ

បើយោងតាមរបាយការណ៍របស់ទីភ្នាក់ងារអាកាសធាតុកូរ៉េខាងត្បូងបានឲ្យដឹងថា អាកាសធាតុនៅទីក្រុងសេអ៊ូលកាលពីថ្ងៃអាទិត្យបានចុះត្រជាក់រហូតដល់ -១២.៤ អង្សាសេ ខណៈនៅ​ថ្ងៃចន្ទនេះចុះត្រជាក់​មកនៅចន្លោះពី -១៨ ទៅ -៣ អង្សាសេ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាកាសធាតុចុះត្រជាក់ខ្លាំងបែបនេះត្រូវគេរំពឹងថា នឹងបន្តកើតឡើងពេញមួយសប្តាហ៍ ខណៈកម្រិតត្រជាក់ទាបនៅពេលព្រឹកនៅទូទាំងប្រទេស អាចនឹងធ្លាក់ចុះចន្លោះពី -១៧ អង្សាសេ និង ២ អង្សាសេ ។

ទន្ទឹមនោះ ឥទ្ធិពលនៃការចុះ​ត្រជាក់នេះ បានគ្រប់ដណ្តប់ទៅ​លើតំបន់សេអ៊ូល ប៊ូសាន ដាជុន និង​ដេហ្គូ នៅ​ម៉ោង ៩ យប់​កាលពីថ្ងៃ​អាទិត្យ ខណៈអាជ្ញាធរក៏បានព្រមានពីការធ្លាក់ព្រិលខ្លាំងសម្រាប់តំបន់ភាគកណ្តាល និងភាគខាងលិចរបស់ប្រទេសផងដែរ ។

ស្របពេលជាមួយគ្នានេះ ក៏មានការដាក់ចេញសេចក្តីណែនាំ និងឲ្យពលរដ្ឋប្រុងប្រយ័ត្នផងដែរ ប​ន្ទាប់ពីសីតុណ្ហភាពនៅពេលព្រឹកក្នុងទីក្រុងសេអ៊ូលធ្លាក់ចុះដល់ -១២ អង្សាសេក្នុងរយៈពេល ២ ថ្ងៃជាប់ៗគ្នា ខណៈសេចក្ដីណែនាំក៏ព្រមានឲ្យមានការប្រុងប្រយ័ត្ននៅសីតុណ្ហភាព ​ចន្លោះពី ១០ អង្សាសេទៅ -៣ អង្សាសេ ។

គួរបញ្ជាក់ថា ការចុះត្រជាក់​ខ្លាំងបែបនេះ បានផ្អាកការហោះហើររបស់កូរ៉េខាងត្បូងជាង ២១១ ជើង ហើយវាក៏បង្កការខូចខាតមួយចំនួនផងដែរនៅស្ថានីយ៍​រថភ្លើង ខណៈក្នុងចំណោមនោះមាន ២៨ ករណី គឺកើតមានឡើង ដោយសារតែខ្យល់បក់ខ្លាំង៕

ប្រែសម្រួល៖ នាង រតនៈ

ប្រភព៖ CNA