នាវាដឹកជញ្ជូនយក្ស Maersk ត្រៀមប្រតិបត្តិការនៅសមុទ្រក្រហមឡើងវិញ​

ក្រុមហ៊ុនដឹកជញ្ជូនដ៏ធំ Maersk របស់ប្រទេសដាណឺម៉ាក ​បានផ្តើមដឹកជញ្ជូនតាមសមុទ្រក្រហមនិងឈូងសមុទ្រ​ Aden ឡើងវិញ​ បន្ទាប់ពីអាមេរិកដាក់ពង្រាយ​យោធា​ដើម្បីរក្សា​សុវត្ថិភាពពាណិជ្ជកម្មនៅក្នុងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន Maersk ​បានផ្អាកដឹកជញ្ជូនឆ្លងកាត់ច្រកសមុទ្រ​ Babel-Mandeb កាលពីដើមខែធ្នូ ដោយសារការវាយប្រហារប្រឆាំងនឹងនាវារបស់ខ្លួន។ ការវាយប្រហារនោះ បានធ្វើឱ្យប្រឡាយ Suez ដែលជាគន្លឹះនៃពាណិជ្ជកម្មសកល មិនអាចប្រើបានសម្រាប់ផ្លូវភាគច្រើន។

ទន្ទឹមនោះទៀតសោត កាលពីសប្តាហ៍មុនអាមេរិកបញ្ជាក់ថា កំពុងរៀបចំធ្វើប្រតិបតិ្តការចម្រុះជាតិសាសន៍ ដើម្បីការពារពាណិជ្ជកម្មនៅសមុទ្រក្រហមពីពួកសកម្មប្រយុទ្ធយេម៉ែនគាំទ្រដោយអ៊ីរ៉ង់ ដែលបានបាញ់យន្តហោះគ្មានមនុស្សបើក និងមីស៊ីលលើនាវាអន្តរជាតិជាច្រើនតាំងពីខែមុន។​

ដោយឡែកនៅថ្ងៃទី ២៤ ខែធ្នូ គំនិតផ្តួចផ្តើមសន្តិសុខពហុជាតិត្រូវបានបង្កើតឡើងជាផ្លូវការ​ និងដាក់ពង្រាយដើម្បីអនុញ្ញាតឱ្យពាណិជ្ជកម្មតាមសមុទ្រឆ្លងកាត់សមុទ្រក្រហម ឈូងសមុទ្រ Aden និងការ​ត្រលប់ទៅប្រើប្រាស់ប្រឡាយ Suez ជាច្រកផ្លូវរវាងអាស៊ី និងអឺរ៉ុបម្តងទៀត។

គួរបញ្ជាក់ឱ្យដឹងថា ក្រុមហ៊ុនដឹកជញ្ជូនជាច្រើនផ្សេងទៀតបានបញ្ឈប់ការឆ្លងកាត់សមុទ្រក្រហមដោយសារការព្រួយបារម្ភអំពីសុវត្ថិភាពក្នុងប៉ុន្មានសប្តាហ៍ថ្មីៗនេះ ដោយ​ក្នុងនោះ រួមមានក្រុមហ៊ុនដឹកប្រេង BP ជាដើម៕

ប្រែសម្រួល៖ នាង រតនៈ

ប្រភព៖ CNBC