កូរ៉េខាងត្បូង៖ កូនស្រីលោក គីម ជុងអ៊ុន មានភាគរយខ្ពស់ ក្លាយជាអ្នកស្នងតំណែងដឹកនាំ កូរ៉េខាងជើង

យោងតាមទីភ្នាក់ងារចារកម្មកូរ៉េខាងត្បូង, កូនស្រីរបស់មេដឹកនាំកូរ៉េខាងជើងលោក គីម ជុងអ៊ុន ដែលតែងរូមដំណើរគ្នាទៅមើលការសាកល្បងមីស៊ីល និងក្បួនដង្ហែយោធា គឺមានភាគរយខ្ពស់បំផុត ជាអ្នកស្នងតំណែងរបស់គាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះ​ជា​លើក​ទី​មួយ​ហើយ ​ដែល​សេវា​ស៊ើបការណ៍​សម្ងាត់​ជាតិ​ (NIS) ​ទទួល​ស្គាល់កុមារី Kim Ju Ae ជា​អ្នក​ស្នង​មរតក​លោកគីម។ ទោះបីជាយ៉ាងណាក៏ដោយ NIS និយាយថា កូរ៉េខាងជើង ក៏នៅតែកំពុងពិចារណាអំពីលទ្ធភាពគ្រប់បែបយ៉ាង នៅក្នុងផែនការនេះផងដែរ។

NIS និយាយថា “ផ្អែកលើការវិភាគយ៉ាងហ្មត់ចត់លើសកម្មភាពសាធារណៈ និងសម្ទុះនៃការគោរពចំពោះកុមារី Kim Ju Ae ចាប់តាំងពីការបង្ហាញខ្លួនដោយបើកចំហលើកដំបូងកាលពីចុងឆ្នាំ២០២២មក, នាពេលបច្ចុប្បន្ននេះ នាងត្រូវបានគេមើលឃើញថា ជាអ្នកស្នងតំណែងដែលទំនងបំផុត ប៉ុន្តែយើងក៏កំពុងសម្លឹងមើលគ្រប់លទ្ធភាព ព្រោះថា លោក គីម ជុងអ៊ុន នៅក្មេងនិងមាំទាំនៅឡើយ”។

ក្នុងសន្និសីទសារព័ត៌មានមួយកាលពីខែមុន រដ្ឋមន្ត្រីបង្រួបបង្រួមកូរ៉េខាងត្បូងលោក Kim Yung-ho ក៏ផ្តល់ការវាយតម្លៃស្រដៀងគ្នានេះដែរ។

កុមារី Kim Ju Ae ត្រូវបានគេគិតថា ជាកូនទីពីររបស់មេដឹកនាំកូរ៉េខាងជើង ហើយមានអាយុប្រហែល១០ឆ្នាំ។ ថ្មីៗនេះ នាងបានអមដំណើរឪពុក ទៅចូលរួមការបាញ់បង្ហោះមីស៊ីលឆ្លងទ្វីប (ICBM) ដែលជាមីស៊ីលរយៈចម្ងាយឆ្ងាយទំនើបបំផុតនៅក្នុងឃ្លាំងអាវុធរបស់កូរ៉េខាងជើង។

នាងក៏នៅក្បែរឪពុករបស់នាងផងដែរ នៅពេលកូរ៉េខាងជើង បាញ់បង្ហោះផ្កាយរណបស៊ើបការណ៍ Malligyong-1 ចូលទៅគន្លងតារាវិថីកាលពីខែវិច្ឆិកាឆ្នាំមុន។

បើយោងតាមអ្នកវិភាគ, ការណែនាំកុមារី Kim Ju Ae ដល់សាធារណៈជនក្នុងពេលដ៏លឿនបែបនេះ គឺអាចជាមធ្យោបាយរបស់លោក គីម ដើម្បីធានាថា កូនស្រីរបស់គាត់សិក្សាបានជ្រៅជ្រះ និងរឹងដៃរឹងជើងមុនពេលនាងឡើងកាន់អំណាច។

វាក៏អាចជាមធ្យោបាយមួយសម្រាប់លោក គីម ក្នុងការបំបាត់មតិរិះគន់អំពីការរើសអើងនៅក្នុងប្រទេសកូរ៉េខាងជើង ដែលមិនធ្លាប់មានស្រ្តីជាមេដឹកនាំផងដែរ។

សូមបញ្ជាក់ថា លោក គីម បានរៀបការជាមួយលោកស្រី Ri Sol-ju ក្នុងឆ្នាំ២០០៩ ហើយបើតាមសេចក្តីរាយការណ៍ អ្នកទាំងពីរ មានកូន៣នាក់ជាចំណងដៃ៕

ប្រែសម្រួល៖ Vann Vann

ប្រភព៖ BBC

ចុចអាន៖ កូរ៉េខាងជើង បាញ់ផ្លោងកាំភ្លើងធំប្រមាណ ២០០ គ្រាប់ ចំពេល អាមេរិក-កូរ៉េខាងត្បូង កំពុងធ្វើសមយុទ្ធ