Connect with us

ព័ត៌មានអន្ដរជាតិ

ឆ្នាំមុន អាមេរិក កើបលុយច្រើនសន្ធឹក ពីការលក់សព្វាវុធ

បានផុស

នៅ

ព្រោះតែតម្រូវការហក់ឡើងខ្ពស់ពេក ដោយសារសង្គ្រាមរុស្ស៊ី-អ៊ុយក្រែន បានធ្វើឲ្យការលក់ចេញសព្វាវុធរបស់អាមេរិកកាលពីឆ្នាំមុន ឈានដល់កម្រិតកំណត់ត្រាជាមួយទំហំទឹកប្រាក់២៣៨ពាន់លានដុល្លារអាមេរិក។ នេះបើតាមការចុះផ្សាយរបស់ BBC កាលពីថ្ងៃអង្គារទី៣០ខែមករា។

(រូបថត៖ Getty Images)
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីក្រសួងការបរទេស រដ្ឋាភិបាលទីក្រុងវ៉ាស៊ីនតោន បានចរចាលក់អាវុធដោយផ្ទាល់ក្នុងទំហំទឹកប្រាក់៨១ពាន់លានដុល្លារ ពោលគឺកើនឡើង៥៦% បើធៀបនឹងឆ្នាំ២០២២ ខណៈចំនួននៅសល់ គឺជាការលក់ផ្ទាល់ ដោយក្រុមហ៊ុនការពារជាតិអាមេរិកទៅឲ្យបរទេស។

បច្ចុប្បន្ន អ្នកជិតខាងរបស់អ៊ុយក្រែនគឺប្រទេសប៉ូឡូញ កំពុងខិតខំធ្វើទំនើបកម្មយោធារបស់ខ្លួន ហើយបានក្លាយជាអ្នកទិញធំបំផុតរបស់អាមេរិក។

(រូបថត៖ PA Media)

តាមរបាយការណ៍របស់ក្រសួង, ប៉ូឡូញបានទិញឧទ្ធម្ភាគចក្រ Apache ក្នុងតម្លៃ១២ពាន់លានដុល្លារ ហើយថែមទាំងចំណាយ ១០ពាន់លានដុល្លារសម្រាប់ប្រព័ន្ធបាញ់កាំភ្លើងធំ HIMARS និង ៣.៧៥ពាន់លានដុល្លារសម្រាប់រថក្រោះ M1A1 Abrams ទៀតផង។ ទីក្រុងវ៉ាសូវី ក៏ចំណាយ៤ពាន់លានដុល្លារលើប្រព័ន្ធបញ្ជាការប្រយុទ្ធដែនអាកាស និងមីស៊ីលផងដែរ។

ទន្ទឹមនោះ ប្រទេសអាល្លឺម៉ង់ បានចំណាយប្រាក់៨.៥ពាន់លានដុល្លារទិញឧទ្ធម្ភាគចក្រ Chinook រីឯប៊ុលហ្គារី ចាយ១.៥ពាន់លានដុល្លារទិញរថពាសដែក Stryker ចំណែកន័រវែស ទិញឧទ្ធម្ភាគចក្រពហុមុខងារតម្លៃ១ពាន់លានដុល្លារ ខណៈសាធារណរដ្ឋឆែក ទិញយន្តហោះចម្បាំង F-35 អស់ប្រាក់៥.៦ពាន់លានដុល្លារ។

(រូបថត៖ Space Bar)

រដ្ឋបាលរបស់ប្រធានាធិបតី ចូ បៃដិន អះអាងហើយអះអាងទៀតថា ការគាំទ្ររបស់អាមេរិកចំពោះអ៊ុយក្រែន បានជួយជំរុញសេដ្ឋកិច្ចក្នុងស្រុក តាមរយៈការលក់សព្វាវុធ។ យ៉ាងណា សមាជិកសភាអាមេរិកមួយចំនួនបានបង្ហាញឆន្ទៈ ឲ្យទីក្រុងវ៉ាស៊ីនតោនបញ្ចប់ការគាំទ្រដោយផ្ទាល់ចំពោះអ៊ុយក្រែន ហើយងាកមកគិតគូរបញ្ហាអន្តោប្រវេសន៍វិញ។

សូមបញ្ជាក់ ក្រៅ​ពី​អឺរ៉ុប របាយការណ៍​អាវុធ​របស់អាមេរិកក៏បង្ហាញដែរ​ថា កូរ៉េ​ខាង​ត្បូង​បាន​ចំណាយប្រាក់ ៥ពាន់​លាន​ដុល្លារទិញ​យន្តហោះ F-35 ហើយ​អូស្ត្រាលី​ចំណាយ ៦.៣ពាន់​លាន​ដុល្លារទិញ ​យន្តហោះ C130J-30 Super Hercules ចំណែកជប៉ុន បានឈានដល់កិច្ចព្រមព្រៀងតម្លៃ១ពាន់លានដុល្លារសម្រាប់យន្តហោះស៊ើបការណ៍ E-2D Hawkeye៕

អត្ថបទ៖ សុខ សុវណ្ណ

ចុចអាន៖ លោក ចូបៃដិន ប្តេជ្ញាបន្តផ្គត់ផ្គង់សព្វាវុធជួយ អ៊ុយក្រែន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម