សភា សេណេហ្គាល់ ពន្យារពេលបោះឆ្នោតដល់ចុងឆ្នាំ ក្រោយផ្ទុះភាពច្របូកច្របល់

សភារបស់ប្រទេសសេណេហ្គាល់បានពន្យារពេលការបោះឆ្នោតជ្រើសរើសប្រធានាធិបតីរហូតដល់ថ្ងៃទី១៥ ខែធ្នូ បន្ទាប់ពីផ្ទុះភាពច្របូកច្របល់ បន្ទាប់ពីសមាជិកសភាបក្សប្រឆាំងត្រូវបានដកចេញពីសភា ។ នេះបើយោងតាមការចេញផ្សាយរបស់សារពត៌មាន Al Jazeera កាលពីទី​៦ ខែកុម្ភៈ ។

ពាក់ព័ន្ធនឹងបញ្ហានេះដែរថា ប្រធានាធិបតីសេណេហ្គាល់លោក Macky Sall បានប្រកាសកាលពីពេលថ្មីៗនេះថា ការបោះឆ្នោតដែលគ្រោងធ្វើនៅថ្ងៃទី២៥ ខែកុម្ភៈ នឹងត្រូវពន្យារពេល ដែលបង្កឲ្យមានការតវ៉ាដោយហិង្សានៅពេញប្រទេស ។

ការពន្យារពេលរបស់សភានេះបានកើតឡើងកាលពីល្ងាចថ្ងៃចន្ទ នៅពេលដែលសមាជិកសភាចំនួន ១០៥ នាក់ក្នុងចំណោម ១៦៥ អាសនៈបានបោះឆ្នោតគាំទ្រចំពោះវិធានការនេះ មានន័យថា ការបោះឆ្នោតនឹងពន្យារពេលរហូតដល់ខែធ្នូ ហើយនឹងរក្សាលោក Sall ឲ្យនៅកាន់តំណែងដដែលរហូតដល់រកឃើញអ្នកស្នងតំណែងថ្មី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា ការពន្យារពេលបោះឆ្នោតនេះ ទំនងជាអាចប្រឈមនឹងភាពចលាចលកាន់តែខ្លាំង ខណៈពេលដែលសមាជិកសភាបានពិភាក្សាលើសេចក្តីព្រាងច្បាប់នេះកាលពីថ្ងៃចន្ទ ហើយក៏មានក្រុមបាតុករជាច្រើនបានប្រមូលផ្តុំគ្នានៅខាងក្រៅសភាក្នុងទីក្រុង Dakar ដោយដុតសំបកកង់រថយន្ត និងរិះគន់លោក Sall ផងដែរ ខណៈលោកប្រធានាធិបតីរូបនេះធ្លាប់​បាន​និយាយ​ថា លោក​មិន​មាន​គម្រោង​បន្ត​អាណត្តិ​នោះ​ទេ ប៉ុន្តែ​ក្រុម​អ្នក​តវ៉ា​នៅតែមាន​ការ​សង្ស័យ ស្របពេលដែលមេដឹកនាំគណបក្សប្រឆាំងក៏បានថ្កោលទោសចំពោះការពន្យារពេលនេះផងដែរ ៕

អត្ថបទ ៖ ប៊ុន សុភាព