ព័ត៌មានអន្ដរជាតិ

របបយោធាមីយ៉ាន់ម៉ា អនុវត្តវិធីបំបិទសំឡេងអ្នកប្រឆាំងការបោះឆ្នោត

បានផុស

៧ ខែ មុន

នៅ

ថ្ងៃអង្គារ ៧ តុលា ២០២៥

ដោយ

របបយោធាដែលកំពុងកាន់អំណាចរបស់ប្រទេសមីយ៉ាន់ម៉ាបានបង្កើនការបង្រ្កាបលើអ្នករិះគន់ការបោះឆ្នោតនាពេលខាងមុខ ដោយបានកាត់ទោសមនុស្សចំនួន ៦៤នាក់ ចាប់តាំងពីច្បាប់ការពារការបោះឆ្នោតចូលជាធរមានកាលពីថ្ងៃទី ២៩ ខែកក្កដា។ នេះបើយោងតាមការចេញផ្សាយរបស់សារព័ត៌មាន The Irrawaddy កាលពីថ្ងៃទី០៦ខែតុលា។

ឧត្តមសេនីយ៍ មីន អ៊ុងឡាំង មេដឹកនាំរបបយោធាមីយ៉ាន់ម៉ា

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ច្បាប់នេះមានទោសធ្ងន់ធ្ងរចាប់ពីដាក់គុកបីឆ្នាំរហូតដល់ទោសប្រហារជីវិតចំពោះអ្នកណាដែលនិយាយប្រឆាំង ឬព្យាយាមជ្រៀតជ្រែកក្នុងការបោះឆ្នោត។ រដ្ឋមន្ត្រីក្រសួងមហាផ្ទៃ លោក ឧត្តមសេនីយ៍ឯក Tun Tun Naung បាននិយាយថា គិតត្រឹមថ្ងៃទី ៣០ ខែកញ្ញា មានសំណុំរឿងចំនួន ២៤ ត្រូវបានបញ្ជូនទៅតាមច្បាប់ ហើយបានសន្យាថា អាជ្ញាធរនឹងបន្តចាត់វិធានការលើមនុស្សដែលផ្សព្វផ្សាយសារប្រឆាំងការបោះឆ្នោត។

សកម្មភាពរបស់របបនេះបានទាញការថ្កោលទោសពីរដ្ឋាភិបាលលោកខាងលិច និងក្រុមគាំទ្រលទ្ធិប្រជាធិបតេយ្យរបស់ប្រទេសមីយ៉ាន់ម៉ា ដោយបរិហារការបោះឆ្នោតដែលគ្រោងធ្វើឡើងនៅថ្ងៃទី ២៨ខែធ្នូចុងឆ្នាំនេះ ថាជាការបោកប្រាស់ដើម្បីធ្វើឱ្យការគ្រប់គ្រងយោធាក្លាយជាស្របច្បាប់។ នៅទីក្រុង Yangon និង Mandalay សកម្មជនបន្តប្រឆាំងរបបយោធា ដោយបានចែកខិត្តប័ណ្ណអំពាវនាវឱ្យធ្វើពហិការក្រោមពាក្យស្លោក «No Votes Under Guns»។

នៅក្នុងករណីមួយគួរឱ្យកត់សម្គាល់ លោក Ko Nay Thway អាយុ ៣៦ ឆ្នាំមកពីរដ្ឋ Shan បានក្លាយជាមនុស្សដំបូងគេដែលជាប់ពន្ធនាគារក្រោមច្បាប់ថ្មីនេះ ដែលត្រូវកាត់ទោសឱ្យជាប់គុកប្រាំពីរឆ្នាំពីបទរិះគន់ការបោះឆ្នោតនៅលើប្រព័ន្ធផ្សព្វផ្សាយសង្គម។

គួរបញ្ជាក់ថាការបោះឆ្នោតគ្រោងនឹងធ្វើឡើងនៅក្នុងសង្កាត់ចំនួន ១០២ ដែលគ្រប់គ្រងដោយរដ្ឋាភិបាល ភាគច្រើននៅក្នុងទីក្រុងYangonនិងទីក្រុងNaypyitaw ខណៈដែលរដ្ឋភាគច្រើនក្នុងនៅតែជាប់គាំងនៅក្នុងជម្លោះ ឬស្ថិតក្រោមការគ្រប់គ្រងរបស់ក្រុមប្រដាប់អាវុធប្រឆាំងយោធា៕