លោក សេដ្ឋា ជិះរថយន្ត Lexus តម្លៃជាង ២១ ម៉ឺនដុល្លារទៅសួរសុខទុក្ខ​លោក ថាក់ស៊ីន ដល់ភូមិគ្រឹះ

នាយករដ្ឋមន្ត្រីថៃ សេដ្ឋា ថាវីស៊ីន នៅថ្ងៃសៅរ៍នេះបានជិះរថយន្ត Lexus LM 350h តម្លៃជាង ២១ ម៉ឺនដុល្លារអាមេរិក អញ្ជើញទៅជួប និងសួរសុខទុក្ខអតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត្រា ដល់ភូមិគ្រឹះ Ban Chan Song La ក្នុងទីក្រុងបាងកក ។ នេះបើយោងតាមការចេញផ្សាយដោយកាសែត Bangkok Post នៅថ្ងៃទី២៤ ខែកុម្ភៈនេះ ។

លោក សេដ្ឋា បានអញ្ជើញជិះរថយន្ត Lexus កៅអី ៤ ទៅដល់ភូមិគ្រឹះលោក ថាក់ស៊ីន កាលពីវេលាម៉ោង ១២ និង ២០ នាទីថ្ងៃត្រង់ ហើយលោកនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុដែរនោះ បានជួបពិភាក្សា និងទទួលទានអាហារថ្ងៃត្រង់ជាមួយលោក ថាក់ស៊ីន ផងដែររ ។

ថ្លែងបន្ទាប់​ពីជំនួបជាមួយលោក ថាក់ស៊ីន ហើយលោក សេដ្ឋា បាន​ប្រាប់​អ្នក​សារព័ត៌មាន​ថា អតីត​នាយក​រដ្ឋមន្ត្រីថៃដ៏មានប្រជាប្រិយភាពរូបនេះសុខកាយ​សប្បាយ​ចិត្ត និង​មាន​អារម្មណ៍​ល្អ ប៉ុន្តែ​នៅ​​ខ្សោយកម្លាំងបន្តិច ចាប់តាំង​លោកត្រូវបានដោះលែង​ពី​ការ​ឃុំ​ខ្លួន​កាល​ពី​ពេល​ថ្មីៗ​នេះ ។

ស្របពេលជាមួយគ្នានេះ លោកនាយករដ្ឋមន្ត្រីបានបញ្ជាក់ទៀតថា ក្នុងជំនួបជាមួយលោក ថាក់ស៊ីន នេះទៀតសោត លោកក៏​មិន​បាន​និយាយពីរឿងនយោបាយ ឬបញ្ហាអ្វីដែលនាំឲ្យនាយករដ្ឋមន្ត្រីដ៏មានឥទ្ធិពលវ័យ ៧៤ ឆ្នាំរូបនេះជួយប្រទេសជាតិនោះទេ ។

គួរបញ្ជាក់ថា លោក ថាក់ស៊ីន ស៊ីណាវ៉ាត់ត្រា អតីតនាយករដ្ឋមន្រ្តីថៃ ត្រូវបានដោះលែងឲ្យមានសេរីភាពឡើងវិញកាលពីថ្ងៃទី១៨ ខែកុម្ភៈ បន្ទាប់ពីអនុវត្តទោសទណ្ឌបានរយៈពេល ៦ ខែ ដោយសារតែស្ថានភាពរបស់លោកស៊ីទៅនឹងលក្ខខណ្ឌនៃការលើកលែងទោសដូចជា លោកស្ថិតក្នុងចំណោមទណ្ឌិត ៩៣០ ដែលចាត់ទុកជាមនុស្សចាស់ និងមានជំងឺ ឬមានអាយុលើស ៧០ ឆ្នាំ បូករួមទាំងស្នាដៃបម្រើប្រទេសជាតិនៅពេលកន្លងមកផងដែរ ៕

ដោយ ៖ សុខ ជីវ័ន្ត

ចុចអាន ៖ វៀតណាម ចង់ធ្វើដូច ថៃ លើកលែងទិដ្ឋាការភ្ញៀវទេសចរមកពីប្រទេសអ្នកមាន