ក្រុមហ៊ូទី បើកការវាយប្រហារលើកប៉ាល់លោកខាងលិច

ក្រុមហ៊ូទីបានបាញ់គ្រាប់រ៉ុកកែត និងយន្តហោះគ្មានមនុស្សបើកទៅលើកប៉ាល់អង់គ្លេស អាមេរិក និងអ៊ីស្រាអែល ខណៈការបាញ់រះនេះគឺជាប្រតិបត្តិការចុងក្រោយបំផុតក្នុងការវាយប្រហារលើផ្លូវដឹកជញ្ជូនដើម្បីគាំទ្រដល់ប្រជាជនប៉ាឡេស្ទីនក្នុងសង្គ្រាមនៅតំបន់ហ្គាហ្សា ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី៨ ខែមេសានេះ ។

ក្រុមហ៊ូទីបានបើកការវាយប្រហារលើកប៉ាល់អង់គ្លេស និងនាវាចម្បាំងអាមេរិកមួយចំនួននៅក្នុងសមុទ្រក្រហម ខណៈនៅក្នុងសមុទ្រអារ៉ាប់ និងមហាសមុទ្រឥណ្ឌាឯណោះវិញបានវាយប្រហារនាវាអ៊ីស្រាអែល ២ គ្រឿងដែលធ្វើដំណើរទៅកាន់កំពង់ផែអ៊ីស្រាអែល ។

ការវាយប្រហារនេះបានធ្វើឡើងក្នុងអំឡុងពេល ៧២ ម៉ោងចុងក្រោយនេះ ប៉ុន្តែមិនបានផ្តល់ព័ត៌មានលម្អិតអំពីការវាយប្រហារនេះនោះទេ ខណៈអង់គ្លេស និង​សហរដ្ឋ​អាមេរិក​ក៏​បាន​និង​កំពុង​បើក​ការ​វាយ​ប្រហារ​សងសឹក​ប្រឆាំង​នឹង​ក្រុមនេះវិញដូចគ្នា ។

យោងតាមទីបញ្ជាការកណ្តាលអាមេរិក (CENTCOM) ឲ្យដឹងថា កងកម្លាំងសហរដ្ឋអាមេរិកបានបំផ្លាញប្រព័ន្ធមីស៊ីលបាញ់ពីដីទៅអាកាសនៅក្នុងតំបន់ដែលគ្រប់គ្រងដោយក្រុមហ៊ូទីនៃប្រទេសយេម៉ែនកាលពីថ្ងៃសៅរ៍ ។ លើសពីនេះកងកម្លាំងសហរដ្ឋអាមេរិកក៏បានបាញ់ទម្លាក់យន្តហោះគ្មានមនុស្សបើកនៅលើសមុទ្រក្រហមផងដែរ ប៉ុន្តែមិនមានអ្នក​រង​របួស​ ឬ​ការ​ខូច​ខាត​ណាមួយត្រូវ​បាន​គេ​រាយការណ៍នោះទេ ​។

គួរបញ្ជាក់ថា ការវាយប្រហាររបស់ក្រុមហ៊ូទី បានរំខានដល់ការដឹកជញ្ជូនទូទាំងពិភពលោក ដោយបង្ខំឲ្យក្រុមហ៊ុនដឹកជញ្ជូនផ្លាស់ប្តូរផ្លូវទៅកាន់ការធ្វើដំណើរតាមដែនទឹកដែលមានចម្ងាយឆ្ងាយជាង និងថ្លៃជាងនៅជុំវិញអាហ្វ្រិកខាងត្បូង ៕

អត្ថបទ ៖​ ប៊ុន សុភាព