កងទ័ពមីយ៉ាន់ម៉ាព្រមានថា បាតុករកំពុងឆ្ពោះទៅរកផ្លូវស្លាប់

កងទ័ពមីយ៉ាន់ម៉ាបានព្រមានក្រុមបាតុករប្រឆាំងនឹងរដ្ឋប្រហារថា ពួកគេអាចនឹងស្លាប់ ប៉ុន្តែមនុស្សរាប់ពាន់នាក់នៅតែបន្តចេញមកប្រមូលផ្តុំគ្នាតាមដងផ្លូវនៅថ្ងៃចន្ទនេះ ខណៈភាពតានតឹងបានកើនឡើងខ្ពស់ ជុំវិញការស្លាប់របស់បាតុករចំនួន៤នាក់។

ប្រទេសមីយ៉ាន់ម៉ាកំពុងច្របូកច្របល់ ដោយសារតែក្រុមឧត្តមសេនីយ៍បានទម្លាក់និងឃុំខ្លួនមេដឹកនាំស៊ីវិល លោកស្រី អ៊ុងសាន ស៊ូជី កាលពី៣សប្តាហ៍មុន។

ការធ្វើបាតុកម្មទ្រង់ទ្រាយធំតាមដងផ្លូវ បានកើតឡើងនៅទូទាំងប្រទេស ខណៈយុទ្ធនាការមិនគោរពច្បាប់ស៊ីវិលបានធ្វើឲ្យរាំងស្ទះដល់ប្រតិបត្តិការជាច្រើនរបស់រដ្ឋាភិបាល ក៏ដូចជាអាជីវកម្មផងដែរ។

សេចក្តីថ្លែងការណ៍មួយនៅលើកញ្ចក់ទូរទស្សន៍ MRTV បាននិយាយថា “ឥឡូវនេះ ក្រុមអ្នកតវ៉ាកំពុងញុះញង់ប្រជាជន ជាពិសេសក្មេងជំទង់និងយុវជនឲ្យឆ្ពោះទៅរកផ្លូវប្រឈមមុខគ្នាមួយ ដែលពួកគេនឹងត្រូវបាត់បង់ជីវិត”។

សេចក្តីថ្លែងការណ៍នោះ បានព្រមានក្រុមអ្នកតវ៉ាប្រឆាំងនឹងការញុះញង់ឲ្យមានកុបកម្ម និងភាពអនាធិបតេយ្យ។

ការព្រមាននេះបានកើតឡើង បន្ទាប់ពីការបង្ហូរឈាមសាហាវបំផុតចាប់តាំងពីរដ្ឋប្រហារ ដោយមនុស្សពីរនាក់ត្រូវបានសម្លាប់នៅពេលកម្លាំងសន្តិសុខ បាញ់ទៅលើក្រុមបាតុករនៅក្នុងទីក្រុង Mandalay និងបុរសទីបីត្រូវបានបាញ់សម្លាប់នៅក្នុងទីក្រុង​ យ៉ាំងហ្គោន។

ស្ត្រីវ័យក្មេងម្នាក់ក៏បានស្លាប់ផងដែរកាលពីថ្ងៃសុក្រ បន្ទាប់ពីត្រូវគេបាញ់ចំក្បាលនៅឯការតវ៉ាមួយ។

ពួកគេគឺជាការស្លាប់ដំបូងនៃការតវ៉ា ហើយនាងបានក្លាយជានិមិត្តរូបដ៏ខ្លាំងក្លានៃចលនាប្រឆាំងនឹងរបបយោធា៕

ប្រែសម្រួលដោយ៖ Vann Vann

ប្រភព៖ Bangkok Post

ចុចអាន៖ កាន់តែខ្លាំងហើយ! បាតុកម្មប្រឆាំងរដ្ឋប្រហារកំពុងផ្ទុះឡើងនៅទូទាំងប្រទេសមីយ៉ាន់ម៉ា

ចុចអាន៖ ស្លាប់បាតុករបន្ថែមក្នុងបាតុកម្មប្រឆាំងរដ្ឋប្រហារយោធានៅមីយ៉ាន់ម៉ា