លោក Lee Hsien Loong នឹងលាលែងពីតំណែងជានាយករដ្ឋមន្ត្រី សិង្ហបុរី

ប្រទេសសិង្ហបុរីនឹងធ្វើការផ្លាស់ប្ដូរនាយករដ្ឋមន្ត្រីជាលើកដំបូងក្នុងរយៈពេលជិត ២ ទស្សវត្សរ៍ ពោលលោក Lee Hsien Loong នឹងលាលែងពីតំណែង ហើយប្រគល់អំណាចទៅឲ្យលោកឧបនាយករដ្ឋមន្ត្រី Lawrence Wong នៅខែឧសភាខាងមុខនេះ ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters កាលពីថ្ងៃទី១៥ ខែមេសាកន្លងទៅ ។

លោក Lee Hsien Loong បានប្រកាសនៅលើប្រព័ន្ធផ្សព្វផ្សាយសង្គមកាលពីថ្ងៃចន្ទថា លោកនឹងលាឈប់ពីតំណែងជានាយករដ្ឋមន្ត្រីនៅថ្ងៃទី១៥ ខែឧសភា ហើយលោក Wong ក៏នឹងស្បថចូលកាន់តំណែងនៅថ្ងៃនោះតែម្ដង ។ ទន្ទឹមនោះ លោក Lee Hsien Loong ក៏បានស្នើឲ្យប្រជាជនសិង្ហបុរីទាំងអស់ផ្តល់ការគាំទ្រពេញទីទៅឲ្យលោក Wong ដើម្បីនាំនាវាសិង្ហបុរីឆ្ពោះទៅរកអនាគតដ៏ភ្លឺស្វាង ។

នៅក្នុងសេចក្តីថ្លែងការណ៍តាមរយៈវីដេអូ លោក Wong បាននិយាយថា “ខ្ញុំទទួលយកទំនួលខុសត្រូវនេះ ហើយនឹងដាក់ចិត្តដាក់កាយបំពេញកាតព្វកិច្ចដោយស្មោះអស់ពីដួងចិត្ត ។ ខ្ញុំសន្យានឹងផ្តល់ឲ្យអ្នករាល់គ្នានូវកិច្ចការងារទាំងអស់របស់ខ្ញុំ” ។

គួរបញ្ជាក់ថា លោក Lee Hsien Loong ដែលមានវ័យ ៧២ ឆ្នាំគឺជាកូនប្រុសច្បងរបស់នាយករដ្ឋមន្ត្រីទីមួយនៃប្រទេសសិង្ហបុរីគឺលោក Lee Kuan Yew ហើយលោក Lee Hsien Loong បានស្បថចូលកាន់តំណែងជានាយករដ្ឋមន្ត្រីទីបីរបស់ប្រទេសក្នុងឆ្នាំ ២០០៤ ហើយបានដឹកនាំសិង្ហបុរីក្លាយប្រទេសមួយក្នុងចំណោមប្រទេសដែលមានជាងគេបំផុតនៅអាស៊ីក្នុងរយៈពេលជិត ២០ ឆ្នាំនេះ ខណៈលោក Wong ត្រូវបានមនុស្សជាច្រើនចាត់ទុកជាអ្នកដឹកនាំជំនាន់ក្រោយសម្រាប់សិង្ហបុរី ៕

អត្ថបទ៖ សាង ស្រីល័ក្ខ

ចុចអាន៖ថៃ កំពុងប្រារព្ធពិធីបុណ្យសង្ក្រាន្តចូលឆ្នាំថ្មីក្រោមមេឃក្ដៅចង់ខ្លោច