រកឃើញសាកសពជិត ២០០ នាក់កប់ក្នុងផ្នូរដ៏ធំនៅបរិវេណមន្ទីរពេទ្យតំបន់​ហ្គាហ្សា

ក្រុមការពារជនស៊ីវិលប៉ាឡេស្ទីនបានរកឃើញផ្នូរដ៏ធំមួយដែលដាក់សាកសពចំនួន ១៨០ នាក់ក្នុងទីក្រុង Khan Younis នៃតំបន់ហ្គាហ្សា ខណៈរយៈពេលជាង ៦ ខែមកនេះ អ៊ីស្រាអែលនៅតែបន្តទម្លាក់គ្រាប់បែកមិនប្រណីដៃមកលើតំបន់មួយនេះ ។ នេះបើយោងតាមការចេញផ្សាយរបស់សារត៌មាន Al Jazeera កាលថ្ងៃទី២១ ខែមេសាកន្លងទៅ ។

សាកសពចំនួន ១៨០ នាក់ត្រូវបានរកឃើញនៅក្នុងទីធ្លាមន្ទីរពេទ្យ Al-Shifa ក្នុងទីក្រុង Khan Younis កាលពីដើមសប្តាហ៍នេះ ខណៈសាក្សីជាច្រើននាក់អះអាងថា ត្រូវបានកប់ដោយយោធាអ៊ីស្រាអែល ហើយការរកឃើញនេះទៀតសោតកើតឡើង បន្ទាប់ពីយោធាអ៊ីស្រាអែលបានដកកងទ័ពរបស់ខ្លួនចេញពីទីក្រុងភាគខាងត្បូងកាលពីថ្ងៃទី៧ ខែមេសាកន្លងទៅ ។

នេះគឺជាផ្នូរដ៏ធំមួយក្នុងចំណោមផ្នូរធំៗជាច្រើនដែលត្រូវបានរកឃើញនៅមន្ទីរពេទ្យ Al-Shifa ជាកន្លែងព្យាបាលដ៏ធំបំផុតនៅក្នុងតំបន់នេះ ។ សាកសពទាំងនោះរួមមានស្ត្រីវ័យចំណាស់ កុមារ និងបុរសវ័យក្មេង ខណៈដែលប្រតិបត្តិការទាញយកសាកសពនឹងធ្វើឡើងជាបន្តបន្ទាប់ ដោយសារតែមានចំនួនច្រើនពេក ។

អ៊ីស្រាអែលក៏បានសន្យាថានឹងពង្រីកការវាយលុករបស់ខ្លួនទៅកាន់ទីក្រុងនៅតាមព្រំដែនជាមួយអេហ្ស៊ីបផងដែរ បើទោះបីជាមានការអំពាវនាវជាអន្តរជាតិ ជាពិសេសពីសំណាក់សហរដ្ឋអាមេរិកឲ្យមានការអត់ធ្មត់ក៏ដោយ ។ អំពាវនាវក៏ពិតមែន ប៉ុន្តែទីក្រុងវ៉ាស៊ីនតោននៅតែបន្តផ្តល់កញ្ចប់សព្វាវុធដល់អ៊ីស្រាអែល ដោយកាល​ពី​ថ្ងៃ​សៅរ៍ សភា​​អាមេរិកបាន​អនុម័ត​កញ្ចប់​ជំនួយ​សន្តិសុខចំនួន ៩៥ ពាន់​លាន​ដុល្លារ​ទៅដល់​អ៊ុយក្រែន អ៊ីស្រាអែល និង​តៃវ៉ាន់ផងដែរ ។

គួរបញ្ជាក់ថា អ៊ីស្រាអែលបានចាប់ផ្តើមសង្រ្គាមរបស់ខ្លួនលើតំបន់ហ្គាហ្សា បន្ទាប់ពីក្រុមហាម៉ាស និងក្រុមប៉ាឡេស្ទីនផ្សេងទៀតបានធ្វើការវាយប្រហារនៅក្នុងទឹកដីអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣ កន្លងទៅ ដោយបានសម្លាប់មនុស្សប្រហែល ១,១៣៩ នាក់ និងចាប់មនុស្សជាង ២០០ នាក់ជាឈ្លើយសឹក ខណៈខាងប៉ាឡេស្ទីនវិញមានមនុស្សជាង ៣៤,០០០ នាក់បានស្លាប់បាត់បង់ជីវិត ៕

អត្ថបទ ៖ ប៊ុន សុភាព