ខណៈអឺរ៉ុប និងមជ្ឈិមបូព៌ាផ្ទុះសង្គ្រាម តើថ្លៃចំណាយក្នុងវិស័យយោធាលើ​លោកមានចំនួនប៉ុន្មានពាន់លានដុល្លារ?

ថ្លៃចំណាយលើវិស័យយោធានៅលើពិភពលោកកាលពីឆ្នាំ ២០២៣ កន្លងទៅបានកើនឡើង ៦.៨ ភាគរយ និងហក់ដល់កំណត់ត្រាខ្ពស់បំផុតក្នុងទំហំទឹកប្រាក់ប្រមាណ ២,៤៤៣ ពាន់លានដុល្លារ ។ នេះបើយោងតាមទិន្នន័យថ្មីដែលចេញផ្សាយដោយវិទ្យាស្ថានស្រាវជ្រាវសន្តិភាពអន្តរជាតិទីក្រុងស្តុកខុល (SIPRI) កាលពីថ្ងៃទី២២ ខែមេសាកន្លងទៅ ។

វិទ្យាស្ថាន SIPRI បានឲ្យដឹងថា ថ្លៃចំណាយលើវិស័យយោធានៅលើពិភពលោកបានកើនឡើងមិនធ្លាប់មានក្នុងរយៈពេល ៩ ឆ្នាំជាប់ៗគ្នាក្នុងទំហំទឹកប្រាក់រហូតដល់ ២,៤៤៣ ពាន់លានដុល្លារ ខណៈការហក់ឡើងនេះទៀតសោត គឺកកើតចេញពីមហាអំណាចធំៗទាំងបីគឺ សហរដ្ឋអាមេរិក ចិន និងរុស្ស៊ីដែលកំពុងជាប់ដៃធ្វើសង្គ្រាមជាមួយអ៊ុយក្រែន ។

សហរដ្ឋអាមេរិកនៅតែជាបងធំចាយលុយច្រើនជាងគេលើវិស័យយោធានៅលើពិភពលោកជាមួយនឹងចំណែក ៣៧ ភាគរយនៃការចំណាយសរុប និងក្នុងទំហំទឹកប្រាក់ ៩១៦ ពាន់លានដុល្លារក្នុងឆ្នាំ ២០២៣ ខណៈតាមពីក្រោយដោយចិន ចូលរួមចំណែក ១២ ភាគរយ និងចំណាយប្រមាណ ២៩៦ ពាន់លានដុល្លារ ។

ចំណែកយោងតាមការចេញផ្សាយដោយសារព័ត៌មាន Sputnik បានឲ្យដឹងដែរថា រុស្ស៊ីក៏ជាមហាអំណាចមួយរូបផងដែរដែលចូលរួមក្នុងការកើនឡើងលើថ្លៃចំណាយនៃវិស័យយោធានៅលើពិភពលោកកាលពីឆ្នាំ ២០២៣ ។ រុស្ស៊ីមានចំណែក ៤.៥ ភាគរយ និងមានទំហំទឹកប្រាក់ប្រមាណ ១០៩ ពាន់លានដុល្លារ ពោលកើនឡើង ២៤ ភាគរយឯណោះ បើប្រៀបធៀបនឹងឆ្នាំ ២០២២ ។

ដោយឡែក អ៊ុយក្រែនដែលកំពុងរកដង្ហើមដកក្នុងភ្លើងសង្គ្រាមជាមួយរុស្ស៊ី គឺជាប្រទេសដែលមានការចំណាយលើវិស័យយោធាធំបំផុតទី ៨ កាលពីឆ្នាំ ២០២៣ ដោយចូលរួមក្នុងចំណែក ៥១ ភាគរយ និងមានទំហំទឹកប្រាក់ ៦៤.៨ ពាន់លានដុល្លារ ស្មើនឹង ៥៨ ភាគរយនៃការចំណាយសរុបរបស់រដ្ឋាភិបាលទីក្រុងកៀវ ។

ស្របពេលជាមួយគ្នានេះ នៅតំបន់មជ្ឈិមបូព៌ាឯណោះវិញក៏មានសន្ទុះហក់ឡើងប្រមាណ ៩ ភាគរយផងដែរ ក្នុងនោះអ៊ីស្រាអែលចូលរួមចំណែកនៃការចំណាយលើវិស័យយោធានៅលើពិភពលោកប្រមាណ ២៤ ភាគរយដែលមានទំហំទឹកប្រាក់ ២៧.៥ ពាន់លានដុល្លារ ចំពេលប្រទេសមួយនេះកំពុងបញ្ចេញចង្កូមខ្លាខាំមិនលែងនៅតំបន់ហ្គាហ្សាស្ទ្រីប ក៏ដូចជាលលេងជាមួយអ៊ីរ៉ង់ ៕

ដោយ ៖ សុខ ជីវ័ន្ត

ចុចអាន ៖ ហេតុអ្វី អ៊ីស្រាអែល បញ្ចេញចង្កូមខាំប៉ុណ្ណឹងហើយ តែ អ៊ីរ៉ង់ ស្ងាត់ច្រៀបមិន ប្រើថ្នាំខ្លាំងសងសឹកទៅវិញ?