ប្រជាជនបង់ក្លាដែស ធ្វើពិធីបួងសួងសុំទឹកភ្លៀង​ ព្រោះមេឃក្តៅខ្លាំង បង្កទុក្ខវេទនា

ស្របពេលដែលរលកកម្តៅកំពុងវាយប្រហារខ្លាំងក្លា ប្រជាជនបង់ក្លាដែសរាប់ពាន់នាក់នៅសប្តាហ៍នេះ បាននាំគ្នាធ្វើពិធីបួងសួងសុំទឹកភ្លៀង ព្រោះថា ពួកគេកំពុងរងទុក្ខវេទនា។ 

យោងតាមការិយាល័យអាកាសធាតុបង់ក្លាដែស, សីតុណ្ហភាពអតិបរិមាក្នុងរដ្ឋធានីដាក្កា កាលពីសប្តាហ៍កន្លងទៅបានហក់ឡើងដល់កម្រិតកំពូល ៤៥អង្សាសេ ជាហេតុបង្ខំឲ្យអាជ្ញាធរ ត្រូវបិទសាលារៀនដើម្បីសុវត្ថិភាពសិស្ស។

តាមការចុះផ្សាយរបស់សារព័ត៌មាន TOI, អ្នកថ្វាយបង្គំមូស្លីមបានប្រមូលផ្តុំគ្នា ក្នុងវិហារក្រុង និងនៅតាមវាលស្រែ ដើម្បីបួងសួងសុំទឹកភ្លៀង ចៀសផុតពីកម្តៅដ៏ក្តៅគគុកនេះ។

លោក Muhammad Abu Yusuf បព្វជិតសាសនាឥស្លាម ដែលដឹកនាំពិធីអធិស្ឋានពេលព្រឹកសម្រាប់មនុស្ស១ ០០០នាក់នៅកណ្តាលក្រុងដាក្កា បានប្រាប់ AFP ថា “ពិធីបួងសួងសុំទឹកភ្លៀង គឺជាប្រពៃណីរបស់យើង។ ជីវិតមនុស្ស​មិន​អាច​ទ្រាំទ្រ​បានឡើយ ​ដោយ​សារ​តែគ្មាន​ភ្លៀង ហើយជាពិសេសប្រជាជនក្រីក្រ កំពុងរងទុក្ខវេទនាសឹងស្លាប់”។

ស្របពេលជាមួយគ្នានោះដែរ មន្ត្រីប៉ូលិសអះអាងថា ពិធីបួងសួងទ្រង់ទ្រាយប្រហាក់ប្រហែលគ្នានេះ គឺត្រូវបានធ្វើឡើងនៅកន្លែងផ្សេងទៀតក្នុងប្រទេសបង់ក្លាដែស សូម្បីគណបក្សឥស្លាមនិយមដ៏ធំបំផុតរបស់ប្រទេសគឺ Jamaat-e-Islami ក៏បានចេញសេចក្តីថ្លែងការណ៍ ប្រកូកប្រកាសឲ្យសមាជិករបស់ខ្លួន ចូលរួមការអធិស្ឋានផងដែរ។

សូមជម្រាបថា ជាធម្មតា ខែមេសាគឺជាខែក្តៅបំផុតនៅក្នុងប្រទេសបង់ក្លាដែស ប៉ុន្តែឆ្នាំនេះ កម្តៅខែមេសាបានហក់ឡើងខ្ពស់ជាប្រវត្តិសាស្រ្ត មិនធ្លាប់មានសោះចាប់តាំងពីប្រទេសបង់ក្លាដែស ទទួលបានឯករាជ្យក្នុងឆ្នាំ១៩៧១មក៕

អត្ថបទ៖ សុខ សុវណ្ណ