ប៉ូលិសក្រុងញូវយ៉ក សម្រុកចូលសាកលវិទ្យាល័យ Columbia ចាប់ខ្លួនបាតុករជានិស្សិត ច្រើននាក់

តាមសេចក្តីរាយការណ៍របស់ CNN នៅថ្ងៃទី១ខែឧសភា មន្ត្រីប៉ូលិសក្រុងញូវយ៉កមួយចំនួនធំ បានសម្រុកចូលទៅក្នុងបរិវេណសាកលវិទ្យាល័យ Columbia ដើម្បីបង្ក្រាបបាតុកម្មគាំទ្រតំបន់ហ្គាហ្សា ដែលបានអង្រួនតាមបណ្តាសាកលវិទ្យាល័យរាប់សិបកន្លែង ភាគច្រើននៅសហរដ្ឋអាមេរិកតែម្តង។

នាយកដ្ឋានប៉ូលិសញូវយ៉កបានសម្រេចអនុវត្តវិធានការបែបនេះ ក្រោយទទួលបានការបើកភ្លើងខៀវពីសាកលវិទ្យាល័យ Columbia ឲ្យចាត់វិធានការភ្លាមៗ ហើយប៉ូលិសបានចាប់ខ្លួនបាតុករជាច្រើននាក់ទៀតផងដែរ។

តាមសេចក្តីរាយការណ៍ ប៉ូលិសបានឆ្មក់ចូលទៅក្នុងបរិវេណសាលានៅតំបន់ Manhattan ខាងលើ ដែលជាចំណុចស្នូលបាតុកម្មរបស់និស្សិត ប្រឆាំងសង្រ្គាមរបស់អ៊ីស្រាអែលនៅតំបន់ហ្គាហ្សា ដោយគិតត្រឹមពេលនេះ ប្រជាជនប៉ាឡេស្ទីនចំនួន ៣៤ ៥៣៥នាក់ហើយ ត្រូវបានសម្លាប់។

បន្ទាប់ពីទៅដល់ក្នុងបរិវេណសាលា ប៉ូលិសមួយចំនួនបានចូលទៅជិតសាល Hamilton Hall ជាកន្លែងដែលនិស្សិតចាប់ផ្តើមកាន់កាប់នៅព្រឹកថ្ងៃអង្គារ បន្ទាប់ពីអ្នកគ្រប់គ្រងនិយាយថា ខ្លួនចាប់ផ្តើមដាក់ពិន័យសិស្ស ដែលមិនព្រមបំបែកហ្វូងតាមការកំណត់។

ក្នុងសន្និសីទសារព័ត៌មានពេលល្ងាច មុនពេលប៉ូលិសចូលទៅក្នុងបរិវេណសាលា អភិបាលក្រុង Eric Adams និងមន្រ្តីប៉ូលិស បានស្តីបន្ទោសថា អ្នកដែលកាន់កាប់នៅសាល Hamilton Hall គឺត្រូវបានញុះញង់ដោយអ្នកខាងក្រៅ ដែលខ្វះទំនាក់ទំនងជាមួយសាកលវិទ្យាល័យ Columbia ខណៈបាតុករជានិស្សិតមួយចំនួន មិនបានដឹងច្បាស់ជនអុកឡុកនៅខាងក្រៅទេ។

លោកប្រកាសថា “យើងមិនអាច និងមិនអនុញ្ញាតឲ្យការជួបជុំគ្នាដោយសន្តិវិធី ប្រែក្លាយទៅជាទស្សនីយភាពដ៏ឃោរឃៅបានឡើយ ហើយយើងក៏មិនអាចរង់ចាំរហូតដល់ស្ថានភាពនេះកាន់តែធ្ងន់ធ្ងរទៅៗបានដែរ។ រឿងនេះត្រូវតែបញ្ចប់ភ្លាមៗ”។

សូមបញ្ជាក់ថា សាកលវិទ្យាល័យនានានៅទូទាំងសហរដ្ឋអាមេរិក កំពុងប្រឈមមុខនឹងការតវ៉ាទ្រង់ទ្រាយធំដំណាលៗគ្នា ទាំងដែលពួកគេត្រៀមរៀបចំសម្រាប់ពិធីបញ្ចប់ការសិក្សានៅចុងឆ្នាំ។

កាលពីថ្ងៃអង្គារ ប៉ូលិសក៏បានបាញ់ឧស្ម័នបង្ហូរទឹកភ្នែកទៅលើនិស្សិតដែលជួបជុំគ្នាដើម្បីបង្ហាញសាមគ្គីភាពជាមួយតំបន់ហ្គាហ្សា នៅសាកលវិទ្យាល័យ Southern Florida ក្នុងទីក្រុង Tampa ផងដែរ៕

សូមទស្សនាវីដេអូ៖

អត្ថបទ៖ សុខ សុវណ្ណ

ចុចអាន៖ ប៉ូលិសអាមេរិក ប្រើវិធានការក្តៅ ចាប់ខ្លួនបាតុករគាំទ្រប៉ាឡេស្ទីន នៅសាកលវិទ្យាល័យ