គ្រោះទឹកជំនន់កាចសាហាវ ប្រល័យជីវិតមនុស្ស ២២៨នាក់ នៅ កេនយ៉ា

តាមសេចក្តីរាយការណ៍របស់ AFP កាលពីថ្ងៃអាទិត្យទី៥ខែឧសភា, តួលេខមនុស្សស្លាប់ដោយសារភ្លៀងធ្លាក់ខ្លាំងក្លានិងគ្រោះទឹកជំនន់ដ៏ប្រល័យនៅប្រទេសកេនយ៉ា នារយៈពេលប៉ុន្មានសប្តាហ៍មកនេះ បានកើនដល់២២៨នាក់ហើយ ខណៈជិត ២០៥ ០០០នាក់ត្រូវរងផលប៉ះពាល់ និង៧២នាក់ កំពុងបាត់ខ្លួននៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះដែរ ទិន្នន័យពីសមាគមកាកបាទក្រហមកេនយ៉ា បានបង្ហាញថា សត្វពាហនៈជាង ៨ ០០០ក្បាលត្រូវងាប់, ផ្ទៃដីដំណាំជាង ១៤ ០០០ហិកតានិងផ្លូវចំនួន៤៦ខ្សែរងការខូចខាត ចំណែកអាជីវកម្មខ្នាតតូចជាង៦០០ សាលារៀន៣៩ និងមណ្ឌលសុខភាពចំនួន១៣ ក៏រងគ្រោះផងដែរ។

ទន្ទឹមនោះ អាជ្ញាធរផ្លូវជាតិកេនយ៉ា បានបិទផ្លូវសំខាន់ៗមួយចំនួន ព្រោះតែត្រូវខូចខាតដោយសារទឹកជំនន់ ជាហេតុបង្កឧបសគ្គដល់ការដឹកជញ្ជូន និងប៉ះពាល់ដល់ការផ្គត់ផ្គង់ស្បៀងអាហារ។

លោកប្រធានាធិបតី William Ruto កាលពីចុងសប្តាហ៍ ក៏បានចេញបញ្ជាឲ្យក្រសួងអប់រំ ពន្យារពេលបើកសាលារៀនឡើងវិញនៅឆមាសទី២ផងដែរ ដោយសារតែទឹកជំនន់ ហើយត្រូវរង់ចាំរហូតដល់មានការជូនដំណឹង។

សូមបញ្ជាក់ គ្រោះធម្មជាតិនេះ គឺបណ្តាលមកពីព្យុះ Hidaya ហើយត្បិតតែព្យុះ ហាក់ថមថយកម្លាំងក៏ពិតមែន ប៉ុន្តែឥទ្ធិពលរបស់វានៅតែបង្កឲ្យមានបំណាក់ដី ខណៈប្រទេសកេនយ៉ា នៅតែប្រុងជើងការខ្ពស់ទប់ទល់នឹងស្ថានភាពអាក្រក់ណាមួយដែលអាចកើតឡើងជាបន្តទៀត៕

អត្ថបទ៖ សុខ សុវណ្ណ

ចុចអាន៖ បាក់ទំនប់ទឹក ផ្តាច់ជីវិតមនុស្ស ៣៥នាក់ នៅកេនយ៉ា