ព័ត៌មានអន្ដរជាតិ

លោក Zelensky អំពាវនាវដល់ អាមេរិក និងចិន ជួយរកសុខសន្តិភាពឲ្យ អ៊ុយក្រែន

បានផុស

២ years មុន

នៅ

ថ្ងៃចន្ទ ២៧ ឧសភា ២០២៤

ដោយ

ប្រធានាធិបតីអ៊ុយក្រែនលោក Volodymyr Zelensky បានអំពាវនាវឲ្យសហរដ្ឋអាមេរិក និងចិនចូលរួមក្នុងសន្និសីទសន្តិភាពអន្តរជាតិនាពេលខាងមុខ ជាពិសេសលោកប្រធានាធិបតីទទូចសុំឲ្យថ្នាក់ដឹកនាំទាំងនេះបង្ហាញផ្លូវសន្តិភាពពិតប្រាកដដល់អ៊ុយក្រែន ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters កាលពីថ្ងៃទី២៦ ខែឧសភាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ លោក Zelensky បានហៅចំៗទៅដល់ឈ្មោះលោកប្រធានាធិបតី Joe Biden និងលោកប្រធានាធិបតី Xi Jinping ហើយបានស្នើដល់មេដឹកនាំនៃមហាអំណាចទាំងពីរជួយជំរុញឲ្យមានសុខសន្តិភាពពិតប្រាកដ ពោលមិនមែនគ្រាន់តែហារមាត់និយាយឲ្យផ្អាកការវាយប្រហារប៉ុណ្ណឹងទេ ។

លោក Zelensky បានព្យាយាមឈ្មុសឈ្មុលប្រើប្រាស់កិច្ចប្រជុំដែលនឹងរៀបចំឡើងនៅប្រទេសស្វីសនាខែក្រោយដើម្បីសម្រេចផែនការសន្តិភាពរបស់លោក ជាពិសេសគឺការដង្ហើយហៅទៅកាន់មេដឹកនាំជាង ៨០ ប្រទេសនៅលើពិភពលោកដែលនៅតែឈរប្រកៀកស្មាជាមួយអ៊ុយក្រែនក្នុងកិច្ចខិតខំប្រឹងប្រែងជាសកលក្នុងកិច្ចប្រជុំកំពូលមួយនេះ ។

ចំណែកប្រធានបទដែលប្រធានាធិបតីអ៊ុយក្រែនចង់លើកមកដាក់តុពិភាក្សាក្នុងជំនួបកំពូលនោះរួមមានការដោះដូរអ្នកទោសជាមួយរុស្ស៊ី បញ្ហាថាមពល និងសន្តិសុខនុយក្លេអ៊ែរ ក៏ដូចជាការបញ្ជូនកុមារទៅកាន់ប្រទេសរុស្ស៊ីវិញជាដើម ស្របពេលដែលរុស្ស៊ីនៅតែបន្តវាយប្រហារលើទីក្រុង Kharkiv ដែលជាទីក្រុងធំទី ២ នៅភាគខាងកើតអ៊ុយក្រែន ។

គួរបញ្ជាក់ថា ប្រសិនបើមិនមានអ្វីប្រែប្រួលទេនោះ កិច្ចប្រជុំកំពូលស្ដីពីសុខសន្តិភាពនៅអ៊ុយក្រែននឹងរៀបចំឡើងនៅថ្ងៃទី១៥ ដល់ថ្ងៃទី១៦ ខែមិថុនា ឆ្នាំ២០២៤ លើតំបន់ភ្នំ Burgenstock ក្នុងទីក្រុង Nidwalden នៃប្រទេសស្វីស ខណៈព្រឹត្តិការណ៍នេះទៀតសោតមានគោលបំណងកសាងរូបមន្តសន្តិភាពសម្រាប់លោក Zelensky រួមជាមួយសំណើផ្សេងទៀតដោយផ្អែកលើធម្មនុញ្ញអង្គការសហប្រជាជាតិ និងគោលការណ៍សំខាន់ៗនៃច្បាប់អន្តរជាតិ ៕

ដោយ ៖ សុខ ជីវ័ន្ត

ចុចអាន ៖ សម្ព័ន្ធមិត្តចាក់ទឹកមិនលិចរបស់ រុស្ស៊ី ចោទ អាមេរិក ជាអ្នកបង្កឲ្យធ្លាក់ឧទ្ធម្ភាគចក្រ ស្លាប់ប្រធានាធិបតី អ៊ីរ៉ង់