យន្តហោះដឹកអ្នកដំណើរមួយគ្រឿងទៀតហើយ ជួបបញ្ហា លើកនេះភ្លើងឆេះម៉ាស៊ីន

ថ្មីៗនេះ គេឃើញថា យន្តហោះដឹកអ្នកដំណើរអន្តរជាតិ ជួបបញ្ហាតកន្ទុយគ្នាតែម្តង ហើយចុងក្រោយបំផុតនេះ យន្តហោះ​របស់​ក្រុមហ៊ុន United Airlines បាន​ឆេះ​ម៉ាស៊ីន ខណៈហៀបនឹងហោះឡើងទៅហើយ ជាហេតុនាំឲ្យជើងហោះហើរត្រូវលុបចោលជាបន្ទាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីរដ្ឋបាលអាកាសចរណ៍សហព័ន្ធអាមេរិក (FAA), ហេតុការណ៍​នេះ ​កើតឡើងនា​វេលា​ម៉ោង​២​រសៀល ថ្ងៃចន្ទទី២៧ខែឧសភា នៅអាកាសយានដ្ឋានអន្តរជាតិ O’Hare ក្នុងទីក្រុង Chicago នៃរដ្ឋ Illinois។

អាចនិយាយបានថាជាសំណាងមួយដែរ ព្រោះយន្តហោះ Airbus A320 មួយគ្រឿងនេះ ហៀបនឹងហោះឡើងក្នុងដំណើរឆ្ពោះទៅកាន់ទីក្រុង Seattle ទៅហើយ ប៉ុន្តែត្រូវបានគេឃើញមានភ្លើងឆេះក្នុងម៉ាស៊ីនទាន់។

តាមការបញ្ជាក់ យន្តហោះនេះមានផ្ទុកអ្នកដំណើរ១៤៨នាក់ និងបុគ្គលិកអាកាសយានិក៥នាក់ ប៉ុន្តែគ្មាននរណាម្នាក់រងរបួសឡើយ ហើយអ្នកដំណើរទាំងអស់ត្រូវបានផ្ទេរទៅជិះយន្តហោះផ្សេង ដើម្បីបន្តទៅគោលដៅ។

ទោះបីជាយ៉ាងណាក៏ដោយ មកទល់ពេលនេះ គេ​នៅ​មិន​ទាន់​ដឹង​ច្បាស់​ពី​មូលហេតុ​ដែល​បណ្តាល​ឲ្យ​ម៉ាស៊ីនយន្តហោះឆេះ​ទេ ខណៈអាជ្ញាធរ​កំពុង​ស៊ើបអង្កេត​។

សូមជម្រាបថា បញ្ហានេះកើតឡើងមួយថ្ងៃប៉ុណ្ណោះ បន្ទាប់ពីជើងហោះហើរ QR017 របស់ក្រុមហ៊ុនអាកាសចរណ៍កាតា ដែលធ្វើដំណើរចេញពីទីក្រុង ដូហា ឆ្ពោះទៅកាន់ទីក្រុង ឌុយប្លាំង នៃប្រទេស អៀរឡង់ ជួបឧបទ្ទវហេតុរលាក់ បណ្តាលឲ្យអ្នកដំណើរ៦នាក់ និងបុគ្គលិកអាកាសយានិក ៦នាក់ត្រូវរបួស។

កាលពីសប្តាហ៍មុន ជើងហោះហើររបស់ក្រុមហ៊ុនអាកាសចរណ៍សិង្ហបុរី (SIA) ក៏ជួបឧបទ្ទវហេតុដូចក្រុមហ៊ុនអាកាសចរណ៍កាតាដែរ ដោយបណ្តាលឲ្យបុរសជនជាតិអង់គ្លេសម្នាក់បាត់បង់ជីវិត និងមនុស្សរាប់សិ​បនាក់ រងរបួសធ្ងន់៕

អត្ថបទ៖ សុខ សុវណ្ណ

ចុចអាន៖ យន្តហោះ Qatar Airways ជួបហេតុការណ៍ដូច Singapore Airlines របួសមនុស្សច្រើននាក់