ប្រេសិត UN ប្រចាំមីយ៉ាន់ម៉ាទទូចឲ្យប្រើមធ្យោបាយចាំបាច់ណាមួយប្រឆាំងនឹងយោធា

ឯកអគ្គរដ្ឋទូតមីយ៉ាន់ម៉ាប្រចាំនៅអង្គការសហប្រជាជាតិ (UN) បានអំពាវនាវឲ្យស្ថាប័នពិភពលោក “ប្រើមធ្យោបាយចាំបាច់ណាមួយ” ប្រឆាំងនឹងយោធាក្នុងប្រទេសរបស់លោកដែលបានឡើងកាន់អំណាចនៅក្នុងរដ្ឋប្រហារកាលពីដើមខែនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Kyaw Moe Tun បាននិយាយបែបនេះកាលពីថ្ងៃសុក្រនៅក្នុងកិច្ចប្រជុំមហាសន្និបាតអង្គការសហប្រជាជាតិ ។ គាត់គឺតំណាងឲ្យរដ្ឋាភិបាលស៊ីវិលដែលត្រូវបានបណ្តេញចេញពីតំណែងរបស់ប្រទេសមីយ៉ាន់ម៉ា ។

គាត់ក៏ជាអ្នកឲ្យប្រើការលើកម្រាមដៃបីផងដែរ ។ កាយវិការនេះត្រូវបានប្រជាជនមីយ៉ាន់ម៉ាប្រើជាសញ្ញានៃការតស៊ូប្រឆាំងនឹងយោធា ។

ចំណែកលោកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិបានទទូចដល់រដ្ឋជាសមាជិកទាំងអស់ឲ្យប្រើប្រាស់បណ្តាញណាដែលមានដើម្បីប្រាប់យោធាថាអំពើហិង្សាប្រឆាំងនឹងប្រជាជនមីយ៉ាន់ម៉ានឹងមិនត្រូវបានអត់ឱនឡើយ ។

ស្របពេលជាមួយគ្នានេះលោកស្រី Christine Schraner Burgener ប្រេសិតពិសេសរបស់អគ្គលេខាធិការអង្គការសហប្រជាជាតិប្រចាំនៅប្រទេសមីយ៉ាន់ម៉ាបាននិយាយថា លោកស្រីកំពុងធ្វើការដើម្បីធ្វើជាស្ពានរវាងយោធា និងមន្ត្រីរដ្ឋាភិបាលជាប់ឆ្នោតតាមបែបប្រជាធិបតេយ្យ ។

លោកស្រីក៏បាននិយាយផងដែរថា លោកស្រីបានស្នើដល់យោធាអនុញ្ញាតឲ្យលោកស្រីទៅជួបមន្រ្តីរួមទាំងមេដឹកនាំដែលត្រូវបានបណ្តេញចេញគឺលោកស្រី អ៊ុងសាន ស៊ូជី ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មីយ៉ាន់ម៉ា ឃុំខ្លួនអ្នកកាសែតបរទេសដំបូងបំផុតចាប់តាំងពីរដ្ឋប្រហារ

ចុចអាន ៖ ក្រុមប្រឆាំង និងគាំទ្ររដ្ឋប្រហារមីយ៉ាន់ម៉ា ប៉ះទង្គិចគ្នាមួយប្រាវ ខណៈការតវ៉ាកាន់តែខ្លាំងឡើង