រដ្ឋ Florida ប្រកាសអាសន្ន គ្រោះទឹកជំនន់

តាមសេចក្តីរាយការណ៍របស់ ABC News នៅថ្ងៃព្រហស្បតិ៍ទី១៣ខែមិថុនា, អភិបាលរដ្ឋ Florida លោក Ron DeSantis បានប្រកាសអាសន្ន និងព្រមានអំពីគ្រោះថ្នាក់នៅក្នុងតំបន់មួយចំនួន ដោយសារតែការជន់លិច បណ្តាលមកពីភ្លៀងធ្លាក់ខ្លាំង ខណៈតំបន់ដែលរងគ្រោះធ្ងន់ មានដូចជា Broward, Collier, Lee, Miami-Dade និង Sarasota។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីនាយកដ្ឋានអាកាសធាតុជាតិក្នុងទីក្រុង Miami បានឲ្យដឹងថា ក្រុងមួយចំនួននៅក្នុងតំបន់ Broward និង Miami-Dade ដូចជា Hallandale និង Hollywood កំពុងរងការវាយប្រហារធ្ងន់ធ្ងរដោយគ្រោះទឹកជំនន់គំរាមកំហែងដល់អាយុជីវិត ប៉ះពាល់ដល់ផ្ទះសម្បែង អាជីវកម្មនិងផ្លូវថ្នល់។

ទឹកភ្លៀងកម្រិតរហូតដល់ ១៧៧មិល្លីម៉ែត្រ បានធ្លាក់ជញ្ជ្រំនៅទូទាំងតំបន់ Broward និង Miami-Dade គិតត្រឹមរសៀលថ្ងៃពុធ ហើយគេព្យាករថា ភ្លៀងធ្លាក់ក្នុងកម្រិតធ្ងន់ធ្ងរជាងនេះ នឹងវាយប្រហារជាបន្តទៀត។

ដោយឡែក អត្រាភ្លៀងធ្លាក់នៅ Fort Lauderdale/Hollywood បានឈានដល់ ១០១មិល្លីម៉ែត្រក្នុងមួយម៉ោងនៅថ្ងៃដដែលនោះ ខណៈ Sarasota ក៏មានអត្រាភ្លៀងធ្លាក់ជិត ១០០មិល្លីម៉ែត្រក្នុងមួយម៉ោងផងដែរ។

ទោះបីជាយ៉ាងណាក៏ដោយ មិនទាន់មានសេចក្តីរាយការណ៍អំពីមនុស្សបាត់ខ្លួនឬបាត់បង់ជីវិតក្នុងគ្រោះធម្មជាតិនេះទេ។

សូមបញ្ជាក់ថា ច្បាប់គ្រាអាសន្ននេះ នឹងអូសបន្លាយពេល៦០ថ្ងៃអាស្រ័យលើស្ថានភាពជាក់ស្តែង ហើយបើទឹកជំនន់មិនធូរស្រាលទេនោះ ច្បាប់នេះនឹងពង្រីកបន្ថែមទៀត៕

អត្ថបទ៖ សុខ សុវណ្ណ

ចុចអាន៖ មនុស្សរាប់លាននាក់ប្រាប់ឲ្យជម្លៀស ខណៈព្យុះសង្ឃរា Ian ជិតមកដល់រដ្ឋ Florida