ព័ត៌មានអន្ដរជាតិ

លោកស្រី ហារីស ក្លាយជាបេក្ខភាពប្រធានាធិបតីផ្លូវការរបស់បក្សប្រជាធិបតេយ្យ

បានផុស

៨ ខែ មុន

នៅ

ថ្ងៃសៅរ៍ ២៧ កក្កដា ២០២៤

ដោយ

Chheang

លោកស្រី កាម៉ាឡា ហារីស បានប្រកាសជាផ្លូវការនូវបេក្ខភាពរបស់លោកស្រីនៅក្នុងគណបក្សប្រជាធិបតេយ្យចំពោះការប្រជែងតំណែងជាប្រធានាធិបតី សម្រាប់ការបោះឆ្នោតថ្នាក់ជាតិរបស់សហរដ្ឋអាមេរិក ដែលនឹងប្រព្រឹត្តទៅនៅថ្ងៃទី៥ខែវិច្ឆិកាខាងមុខ។

លោកស្រី កាម៉ាឡា ហារីស (រូបភាព៖ គណនី X របស់លោកស្រី ហារីស)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីអនុប្រធានាធិបតីអាមេរិក បានបង្ហោះសារនៅលើបណ្ដាញសង្គម X ថា៖ «ថ្ងៃនេះ ខ្ញុំបានចុះហត្ថលេខាលើទម្រង់បែបបទប្រកាសជាផ្លូវការនូវបេក្ខភាពប្រធានាធិបតីសហរដ្ឋអាមេរិករបស់ខ្ញុំ។ ខ្ញុំនឹងខិតខំប្រឹងប្រែងរកសម្លេងគាំទ្រ។ ហើយនៅខែវិច្ឆិកា យុទ្ធនាការគាំទ្រដោយប្រជាជនរបស់យើង នឹងយកឈ្នះ»។

ការជ្រើសតាំងបេក្ខភាពថ្មីរបស់គណបក្សប្រជាធិបតេយ្យ ធ្វើឡើងបន្ទាប់ពីលោក ចូ បៃដិន ប្រធានាធិបតីអាមេរិក បានប្រកាសដកបេក្ខភាពឈរឈ្មោះបោះឆ្នោតកាលពីសប្តាហ៍មុន ហើយបង្ហាញការគាំទ្រពេញទំហឹងទៅលើលោកស្រីអនុប្រធានាធិបតី កាម៉ាឡា ហារីស។ ចំណែកឯអតីតប្រធានាធិបតីទី៤៤របស់អាមេរិកលោក បារ៉ាក់ អូបាម៉ា ក៏បានយល់ស្របក្នុងការរើសយកលោកស្រី ហារីស ជាបេក្ខភាពប្រធានាធិបតីផងដែរ ដើម្បីប្រកួតប្រជែងជាមួយលោក ដូណាល់ ត្រាំ ដែលជាបេក្ខភាពមកពីគណបក្សសាធារណរដ្ឋ។

សូមបញ្ជាក់ថា បេក្ខភាពរបស់លោកស្រី កាម៉ាឡា ហារីស កំពុងទទួលបានសន្ទុះនៃការគាំទ្រភ្លូកទឹកភ្លូកដីពីសមាជិកបក្សប្រជាធិបតេយ្យ ហើយមិនត្រឹមប៉ុណ្ណឹង តារាល្បីៗរបស់អាមេរិក និងស្រ្តីស្បែកខ្មៅរាប់ម៉ឺននាក់ ក៏ចេញមកគាំទ្រផងដែរ។

កាម៉ាឡា ហារីស គឺជាស្ត្រីជនជាតិស្បែកខ្មៅ ឬអ្នកមានដើមកំណើតអាស៊ីខាងត្បូង ដំបូងគេ ដែលឡើងឋានៈជាអនុប្រធានាធិបតីអាមេរិក ហើយប្រសិនបើលោកស្រី ក្លាយជាបេក្ខនារីដែលនឹងត្រូវតែងតាំងខាងគណបក្សប្រជាធិបតេយ្យ រួចឈានទៅដល់ការផ្តួលលោក ដូណាល់ ត្រាំ ក្នុងការបោះឆ្នោតខែវិច្ឆិកាមែននោះ ហារីស នឹងក្លាយជាស្ត្រីទីមួយដែលកាន់តំណែងជាប្រធានាធិបតីសហរដ្ឋអាមេរិក៕

ដោយ៖ ឈាង

ចុចអាន៖ ត្រួសៗអំពីលោកស្រី កាម៉ាឡា ហារីស ដែលលោក បៃដិន គាំទ្រជាបេក្ខភាពប្រធានាធិបតីអាមេរិក