អតីតមហាសេដ្ឋីអចលនទ្រព្យវៀតណាម ជាប់គុក​២១ឆ្នាំ ពីបទឆបោកប្រាក់ ១៤៦លានដុល្លារ

តាមការចុះផ្សាយរបស់ CNA កាលពីថ្ងៃចន្ទទី៥ខែសីហាឆ្នាំ២០២៤, អតីតមហាសេដ្ឋីអចលនទ្រព្យនិងអាកាសចរណ៍វៀតណាមឈ្មោះ Trinh Van Quyet ត្រូវបានកាត់ទោសឲ្យជាប់ពន្ធនាគាររយៈពេល២១ឆ្នាំ ពីបទឆបោកប្រាក់និងរៀបចំទីផ្សារភាគហ៊ុនដែលមានតម្លៃ ១៤៦លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសាលក្រម តុលាការប្រជាជនទីក្រុងហាណូយប្រកាសថា «តាមរយៈទីផ្សារភាគហ៊ុន ចុងចោទបានធ្វើការក្លែងបន្លំ នាំឲ្យមានភាពមិនទុកចិត្តចំពោះអ្នកវិនិយោគនិងទីផ្សារភាគហ៊ុន បង្កជាកំហឹងនៅក្នុងសង្គម។ ដូច្នេះ​ការ​ដាក់​ទណ្ឌកម្ម​ពាក់ព័ន្ធ​ គឺត្រូវ​បាន​ទាមទារដាច់ខាត»។

តុលាការបានឲ្យដឹងថា លោក Quyet គឺជាម្ចាស់ក្រុមហ៊ុន FLC ដែលរមណីយដ្ឋានប្រណីត ទីលានវាយកូនហ្គោល និងក្រុមហ៊ុនដឹកជញ្ជូន Bamboo Airways ហើយការដែលគាត់ត្រូវបានកាត់ទោសធ្ងន់ធ្ងរបំផុតបែបនេះ គឺដោយសារតែគាត់ជាមេខ្លោងនៃការឆបោក រួមជាមួយមនុស្សចំនួន៤៩នាក់ផ្សេងទៀត។

មនុស្ស៤៩នាក់ផ្សេងទៀត រួមទាំងបងប្អូនស្រីរបស់ Quyet ពីរនាក់និងមន្ត្រីផ្សារហ៊ុន៤នាក់ផងនោះ គឺត្រូវបានកាត់ទោសឲ្យជាប់ពន្ធនាគារចន្លោះ១៥ខែដល់១៤ឆ្នាំ។ ពួកគេត្រូវបានចោទប្រកាន់ពីបទក្លែងបន្លំ រៀបឧបាយកលទីផ្សារភាគហ៊ុន រំលោភអំណាច និងការបោះពុម្ពផ្សាយព័ត៌មានទីផ្សារភាគហ៊ុនមិនត្រឹមត្រូវ។

តុលាការ​​និយាយ​ថា ត្រឹមចន្លោះ​ឆ្នាំ ២០១៧ ដល់ឆ្នាំ ២០២២ លោក Quyet បានញាត់លុយចូល​ហោប៉ៅ​ដោយ​ខុស​ច្បាប់​ជាង ១៤៦ លាន​ដុល្លារខណៈជនរងគ្រោះក្នុងករណីក្លែងបន្លំនេះ មានរហូតដល់ទៅ២៥ ០០០នាក់ឯណោះ៕

អត្ថបទ៖ សុខ សុវណ្ណ

ចុចអាន៖ ផ្ដន្ទាទោសស្ត្រីហាយសូ២នាក់ដាក់ពន្ធនាគារក្នុងសំណុំរឿងឆបោកប្រាក់