ពូទីន លែងចរចាជាមួយអ៊ុយក្រែន ក្រោយការវាយលុកចូលដី រុស្ស៊ី

ក្នុងកិច្ចប្រជុំជាមួយមន្ត្រីជាន់ខ្ពស់កាលពីថ្ងៃចន្ទទី១២ខែសីហាឆ្នាំ២០២៤ ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានប្រកាសថា លែងមានកិច្ចពិភាក្សាសន្តិភាពជាមួយអ៊ុយក្រែន ទៀតហើយ បន្ទាប់ពីកងទ័ពទីក្រុងបើកការវាយប្រហារលើជនស៊ីលនៅតំបន់ព្រំដែន Kursk និងការគំរាមដល់រោងចក្រនុយក្លេអ៊ែរ Zaporozhye។ នេះបើតាមការចុះផ្សាយរបស់ RT។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការលើកឡើងរបស់លោក សកម្មភាព​ថ្មីៗ​របស់​អ៊ុយក្រែនបែបនេះ គឺ​បង្ហាញឲ្យឃើញច្បាស់​ពី​មូលហេតុ​ដែល​ខ្លួន​​បដិសេធពិនិត្យ​សំណើ​​ដោះស្រាយ​ជម្លោះរបស់​រុស្ស៊ី ឬ​គោលការណ៍​ដែលដាក់ជូន​ដោយ​ភាគី​អព្យាក្រឹត។

លោកនិយាយថា «ជាក់ស្តែង! ខ្មាំង​ដែល​ពឹង​លើ​ជំនួយ​ពី​ចៅហ្វាយនាយ​លោក​ខាង​លិច​របស់ពួកគេ កំពុង​ព្យាយាមផ្លាស់ប្តូរជំហរ​ចរចានា​ពេល​អនាគត ប៉ុន្តែតើឲ្យយើងនិយាយអំពីការចរចាជាមួយអ្នកដែលវាយប្រហារដោយមិនរើសមុខលើជនស៊ីវិល ហេដ្ឋារចនាសម្ព័ន្ធស៊ីវិល ឬព្យាយាមគំរាមកំហែងរោងចក្រថាមពលនុយក្លេអ៊ែរដោយរបៀបណាទៅ? គោលដៅសំខាន់របស់ទីក្រុងកៀវនៅតំបន់ Kursk គឺបង្វែរការយកចិត្តទុកដាក់ពី Donbass ដែលជាកន្លែងកងកម្លាំងរុស្ស៊ី ទទួលជោគជ័យជាបន្តបន្ទាប់ក្នុងរយៈពេលប៉ុន្មានខែថ្មីៗនេះ»។ 

ជាចុងក្រោយ លោកពូទីន អះអាងថា គោលដៅចម្បងរបស់ទីក្រុងមូស្គូក្នុងដំណាក់កាលនេះ គឺត្រូវកម្ចាត់កងកម្លាំងអ៊ុយក្រែន ចេញឲ្យអស់ពីទឹកដីរុស្ស៊ី។ សត្រូវនឹងទទួលបានការឆ្លើយតបដ៏សក្តិសម។ ​

សូមបញ្ជាក់ អ៊ុយក្រែនបានបើកការវាយប្រហារនៅតំបន់ Kursk កាលពីសប្តាហ៍មុន ដែលនោះជាការវាយលុកឆ្លងដែនទ្រង់ទ្រាយធំបំផុតចាប់តាំងពីសង្គ្រាមនេះផ្ទុះឡើង។

ត្បិតអ៊ុយក្រែនអះអាងទទួលបានផ្លែផ្កាសមប្រកបក្នុងការវាយលុកក៏ពិតមែន​ប៉ុន្តែក្រសួងការពារជាតិរុស្ស៊ីចេញរបាយការណ៍ថា ខ្លួនបានទប់ស្កាត់ប្រតិបត្តិការនោះ ហើយទីក្រុង​កៀវ​ត្រូវស្លាប់ទាហាន​ប្រហែល ១៦០០ នាក់ និងខ្ទេច​រថពាសដែកអស់ ២០០ គ្រឿង៕

អត្ថបទ៖ សុខ សុវណ្ណ

ចុចអាន៖ រោងចក្រនុយក្លេអ៊ែរធំបំផុតនៅអឺរ៉ុប ត្រូវអគ្គិភ័យឆាបឆេះ