ណាមីប៊ីគ្រោងសម្លាប់សត្វព្រៃជាង៧០០​ក្បាល ដើម្បី​បន្ថយ​សម្ពាធបរិស្ថាន​និង​ខ្វះស្បៀង​​

ប្រទេសណាមីប៊ី គ្រោងនឹងសម្លាប់សត្វព្រៃជាង៧០០ក្បាល រួមមាន​ សត្វដំរី សេះបង្កង់ និងដំរីទឹកដើម្បីចែកចាយសាច់ដល់ប្រជាជនដែលកំពុងជួបបញ្ហាអសន្តិសុខស្បៀង ខណៈដែលប្រទេសនេះជួបគ្រោះរាំងស្ងួតដ៏អាក្រក់បំផុតក្នុងរយៈពេល១០០ឆ្នាំមកនេះ។ នេះបើយយោងតាមការចេញផ្សាយរបស់សារព័ត៌មាន CNN នៅថ្ងៃទី២៩ខែសីហានេះ។

ក្រសួងបរិស្ថាន រុក្ខាប្រមាញ់ និងទេសចរណ៍របស់ប្រទេសនេះបានប្រកាសកាលពីថ្ងៃចន្ទថា សត្វដែលនឹងត្រូវសម្លាប់រួមមានដំរីចំនួន ៨៣ក្បាល ដំរីទឹក៣០ក្បាល ក្របី៦០ក្បាល ក្ដាន់៥០ក្បាល សត្វគោព្រៃ១០០ក្បាល និងសេះបង្កង់ចំនួន ៣០០ក្បាល ដែលយកមកពីឧទ្យានជាតិ និងតំបន់សហគមន៍នានាហើយនឹងត្រូវបានសម្លាប់ដោយអ្នកប្រមាញ់អាជីព។

គោលបំណងនៃការសម្លាប់នេះគឺដើម្បីជួយសម្រាលផលប៉ះពាល់នៃគ្រោះរាំងស្ងួតនៅក្នុងប្រទេសអាហ្វ្រិកភាគនិរតីនេះ។

ក្រសួង​បាន​និយាយ​ថា​ កម្មវិធី​នេះ​នឹងកាត់បន្ថយសម្ពាធ​ចេញ​ពី​ធនធាន​ទឹក​ដោយ​កាត់​បន្ថយ​សត្វ​ព្រៃ​នៅ​ក្នុង​តំបន់​ដែល​ចំនួន​របស់​វា​លើសពីស្មៅនឹងទឹកដែលមាន។ ជាមួយគ្នានេះវាក៏មានគោលបំណងកាត់បន្ថយសក្តានុពលនៃជម្លោះរវាងសត្វដំរី និងមនុស្ស ដែលអាចកើនឡើងក្នុងអំឡុងពេលគ្រោះរាំងស្ងួត នៅពេលដែលសត្វស្វែងរកអាហារ និងទឹកអាចនាំឱ្យពួកវាមានទំនាក់ទំនងជាមួយមនុស្ស។

សត្វដំរីចំនួន៨៣ក្បាលមកពីតំបន់ជម្លោះដែលត្រូវបានកំណត់អត្តសញ្ញាណ នឹងត្រូវបានសម្លាប់ ហើយសាច់នឹងត្រូវបានបែងចែកទៅឱ្យកម្មវិធីសង្គ្រោះគ្រោះរាំងស្ងួត។ លើសពីនេះក៏នឹងមានសត្វផ្សេងទៀតដែលនឹងត្រូវសម្លាប់ក៏នឹងត្រូវចែកចាយដល់អ្នកដែលជួបការស្រេកឃ្លានផងដែរ ជាពិសេសប្រជាពលរដ្ឋដែលរស់នៅតំបន់ជនបទ។

ប្រទេសណាមីប៊ីបានប្រកាសដាក់ប្រទេសក្នុងភាពអាសន្នកាលពីខែឧសភា ដោយសារផលប៉ះពាល់នៃគ្រោះរាំងស្ងួតកាន់តែអាក្រក់​មិន​ធ្លាប់​មាន​​។ ប្រជាជនប្រមាណ១ ,៤លាននាក់ ប្រហែលពាក់កណ្តាលនៃចំនួនប្រជាជន ត្រូវបានគេរំពឹងថានឹងប្រឈមមុខនឹងអសន្តិសុខអាហារធ្ងន់ធ្ងរ។

អាហ្រ្វិកខាងត្បូងគឺជាបន្ទាយដ៏រឹងមាំសម្រាប់សត្វដំរី ដែលមានចំនួនជាង២០ម៉ឺន​ក្បាល។ សត្វទាំងនេះក៏រងផលប៉ះពាល់អវិជ្ជមានដោយគ្រោះរាំងស្ងួតផងដែរ ដោយសត្វដំរីរាប់រយក្បាលបានស្លាប់នៅទូទាំងប្រទេសកាលពីឆ្នាំមុន ដោយសារប្រភពទឹករីងស្ងួត៕

អត្ថបទ៖ ប៊ុន សុភាព