មិនត្រឹមទឹកជំនន់ ពេលនេះ ទីក្រុងហាណូយ ចេញការព្រមានអំពីរន្ទះបាញ់ ថែមទៀត

មិនត្រឹមតែទឹកជំនន់និងភ្លៀងធ្លាក់ខ្លាំងទេ ពេលនេះវៀតណាម ក៏បានចេញការព្រមានអំពីរន្ទះបាញ់នៅទីក្រុងហាណូយផងដែរ ដោយអាជ្ញាធរអំពាវនាវឲ្យប្រជាជនមានការប្រុងប្រយ័ត្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ VN Express នៅថ្ងៃពុធទី១១ខែកញ្ញាឆ្នាំ២០២៤, មជ្ឈមណ្ឌលព្យាករធនធានជលសាស្ត្រជាតិ បានព្រមានថា ទីក្រុងហាណូយ អាចជួបប្រទះខ្យល់កន្ត្រាក់ និងរន្ទះបាញ់ ក៏ដូចជាបាតុភូតអាកាសធាតុផ្សេងៗថែមទៀត។

គិតត្រឹមម៉ោង១១:៤០នាទីព្រឹក កម្រិតទឹកភ្លៀងនៅហាណូយ មានចន្លោះ៧.៥ ដល់២៧.៣មិល្លីម៉ែត្រ ខណៈកម្ពស់ទឹកទន្លេក្រហមបានឈានដល់កម្រិតប្រកាសអាសន្នទៅហើយ។

ពាក់ព័ន្ធគ្រោះទឹកជំនន់នេះដែរ គណៈកម្មាធិការប្រជាជនខណ្ឌ Bac Tu Liem បានជម្លៀសមនុស្សរស់នៅតាមបណ្តោយដងទន្លេក្រហមប្រមាណ ៤២៩គ្រួសារ ខណៈខណ្ឌ Hoan Kiem ជូនដំណឹងឲ្យមនុស្ស ៤៦គ្រួសារ ត្រូវរើទៅកាន់កន្លែងសុវត្ថិភាព។

មិនត្រឹមប៉ុណ្ណឹង ខណ្ឌផ្សេងៗ ក៏បានចេញបញ្ជាជម្លៀសប្រជាជនរាប់រយគ្រួសារផងដែរ។

ការព្រមាននេះកើតឡើង ស្របពេលតួលេខមនុស្សស្លាប់ដោយសារឥទ្ធិពលនៃព្យុះ យ៉ាកជី កើនដល់១៥៥នាក់ និងបាត់ខ្លួន១៤១នាក់។

សូមបញ្ជាក់ថា យ៉ាកជី បាននាំមកនូវជាមួយខ្យល់បក់បោកក្នុងល្បឿនជិត១៥០គីឡូម៉ែត្រក្នុងមួយម៉ោង ក្លាយជាព្យុះមានឥទ្ធិពលខ្លាំងបំផុតដែលវាយប្រហារប្រទេសវៀតណាម នារយៈពេល៣០ឆ្នាំចុងក្រោយ៕

អត្ថបទ៖ សុខ សុវណ្ណ

ចុចអាន៖ ចំនួនមនុស្សស្លាប់នៅវៀតណាម ដោយសារព្យុះយ៉ាកជី កើនឡើងយ៉ាងគំហុក ឈានដល់១៤១នាក់