ព្យុះកាចមួយទៀតវាយប្រហារអាស៊ី ខណៈ៣ប្រទេស ចេញការព្រមាន

បន្ទាប់ពីព្យុះ យ៉ាកជី កន្លងផុត ពេលនេះមានព្យុះកាចមួយទៀត ចូលខ្លួនមកវាយប្រហារទ្វីបអាស៊ីម្តង នោះគឺព្យុះ ប៊ីប៊ីនកា ខណៈចិន ហ្វីលីពីន និងជប៉ុន បានចេញការព្រមានជាបន្ទាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋបាលបរិយាកាស ភូមិសាស្ត្រ និងតារាសាស្ត្រហ្វីលីពីន (PAGASA) បានប្រកាសកាលពីថ្ងៃព្រហស្បតិ៍ទី១២ខែកញ្ញាឆ្នាំ២០២៤ថា ព្យុះទីហ្វុង ប៊ីប៊ីនកា បច្ចុប្បន្នស្ថិតនៅចម្ងាយ  ១៩៧៥ គីឡូម៉ែត្រ ភាគខាងកើតកោះ Luzon។

ស្របពេលជាមួយគ្នានោះ កាសែត Rappler រាយការណ៍ថា ព្យុះនេះ កំពុងរំកិលខ្លួនទៅភាគខាងជើងជាមួយល្បឿនខ្យល់បក់អតិបរមា ៩៥គីឡូម៉ែត្រក្នុងមួយម៉ោង និងខ្យល់កន្ត្រាក់ខ្លាំងរហូតដល់១១៥គីឡូម៉ែត្រក្នុងមួយម៉ោង ហើយ ប៊ីប៊ីនកា ត្រូវ​គេ​ព្យាករ​ថា ​នឹងពង្រីកខ្លួនក្លាយ​ជា​ព្យុះ​សង្ឃរានៅ​ល្ងាច​ថ្ងៃ​ទី១៣ខែ​កញ្ញា។

ត្បិតតែបច្ចុប្បន្ន ប៊ីប៊ីនកា នៅឆ្ងាយពីដីគោកហ្វីលីពីនក៏ពិតមែន ប៉ុន្តែព្យុះនេះ ក៏អាចបង្អុរភ្លៀងធ្លាក់ខ្លាំងនៅតាមតំបន់មួយចំនួនផងដែរ។

ដោយឡែក នៅជប៉ុនឯណោះវិញ ទីភ្នាក់ងារឧតុនិយមប្រទេសនេះ ប្រកាសថា ព្យុះប៊ីប៊ីនកា នឹងបោកបក់នៅភាគខាងត្បូងកោះ Okinawa និង Amami នាចុងសប្តាហ៍នេះ។ ក្នុងនាមជាព្យុះទីហ្វុងទី១៣ដែលវាយប្រហារប្រទេសជប៉ុននៅឆ្នាំ២០២៤ ប៊ីប៊ីនកា អាចនាំមកនូវខ្យល់បក់ខ្លាំងនិងរលកសមុទ្រធំៗនៅតំបន់មួយចំនួន ព្រមទាំងបង្កហានិភ័យនៃគ្រោះទឹកជំនន់ និងបំណាក់ដីផងដែរ។

លើសពីនេះ ប្រជាពលរដ្ឋ​ត្រូវ​ណែនាំ​កុំចេញ​ក្រៅ​បើ​មិន​ចាំបាច់ និង​នៅឲ្យ​ឆ្ងាយ​ពី​បង្អួច ​ពេលស្នាក់នៅ​ក្នុងផ្ទះ ព្រោះ​ខ្យល់​ខ្លាំង​អាចបោកផ្តួល​បង្គោល​ភ្លើង និងបំផ្លាញអគារ។

ចំណែកនៅចិន ព្យុះទីហ្វុង ប៊ីប៊ីនកា ត្រូវគេព្យាករថា នឹងវាយប្រហារឆ្នេរសមុទ្រភាគខាងកើតរវាងខេត្តចឺជាំងនិងខេត្តហ្វូចៀន នៅព្រឹកព្រលឹមថ្ងៃទី១៦ខែកញ្ញា។

បើនិយាយពីកម្ពុជាវិញ តាមសេចក្តីប្រកាសរបស់ក្រសួងធនធានទឹកនិងឧតុនិយម កាលពីព្រឹកថ្ងៃទី១២ ខែកញ្ញា ឆ្នាំ២០២៤, ព្យុះ ប៊ីប៊ីនកា ក៏នឹងជះឥទ្ធិពលមកលើព្រះរាជាណាច្រកម្ពុជាផងដែរ ចាប់ពីថ្ងៃទី១២ ដល់ថ្ងៃទី១៤ ខែកញ្ញា ឆ្នាំ២០២៤៕

អត្ថបទ៖ សុខ សុវណ្ណ

ចុចអាន៖ ផុតពីព្យុះ យ៉ាកជី ព្យុះទី១៣ឈ្មោះ ប៊ីប៊ីនកា បានចូលមកបន្ត កម្ពុជា ក៏ត្រូវរងឥទ្ធិពលផងដែរចាប់ពីថ្ងៃទី១២ ដល់ទី១៤កញ្ញានេះ