ព័ត៌មានអន្ដរជាតិ

អាមេរិក ប្រាប់អ៊ីស្រាអែល កុំឲ្យលេងធ្ងន់ដៃដាក់លីបង់ដូចនៅហ្គាហ្សា

បានផុស

២ years មុន

នៅ

ថ្ងៃព្រហស្បតិ៍ ១០ តុលា ២០២៤

ដោយ

Chheang

សហរដ្ឋអាមេរិក បានចេញសារព្រមានកាលពីថ្ងៃទី៩ខែតុលាថា អ៊ីស្រាអែលមិនត្រូវប្រើប្រាស់ប្រតិបត្តិការយោធានៅលីបង់ដូចអ្វីដែលខ្លួនធ្លាប់ធ្វើនៅតំបន់ហ្គាហ្សានោះទេ។ ការព្រមាននេះ ធ្វើឡើងមួយថ្ងៃបន្ទាប់ពីលោក Benjamin Netanyahu នាយករដ្ឋមន្ត្រីអ៊ីស្រាអែល បានគំរាមវាយកម្ទេចក្រុមហេសបូឡាដែលមានមូលដ្ឋាននៅលីបង់ឲ្យដូចទៅនឹងការប្រយុទ្ធនៅតំបន់ហ្គាហ្សាអ៊ីចឹងដែរ។

ក្រោយការទម្លាក់គ្រាប់បែករបស់អ៊ីស្រាអែលនៅក្នុងទីក្រុងបេរូត ថ្ងៃទី២ខែតុលាឆ្នាំ២០២៤ (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ចូ បៃដិន ប្រធានាធិបតីអាមេរិក បានប្រាប់លោក Netanyahu ឲ្យធ្វើយ៉ាងណាកាត់បន្ថយការប៉ះពាល់ដល់ជនស៊ីវិលនៅលីបង់ ជាពិសេសគឺនៅតំបន់ប្រជុំជនមានមនុស្សរស់នៅច្រើនក្នុងទីក្រុងបេរូត។

លោក Matthew Miller អ្នកនាំពាក្យក្រសួងការបរទេសអាមេរិក បានប្រកាសប្រាប់អ្នកកាសែតថា៖ «មិនគួរមានសកម្មភាពយោធាណាមួយនៅក្នុងប្រទេសលីបង់ ដែលមើលទៅស្រដៀងនឹងអ្វីដែលនៅហ្គាហ្សា និងបង្កជាលទ្ធផលដូចនៅហ្គាហ្សាទេ»។

បើទោះជាមានការព្រមានបែបនេះក្ដី មេបញ្ជាការប្រដាប់អាវុធអ៊ីស្រាអែល លោក Herzi Halevi បានប្រកាសប្ដេជ្ញាបន្តទម្លាក់គ្រាប់បែកទ្រង់ទ្រាយធំនៅលើគោលដៅពួកហេសបូឡា ដោយធ្វើយ៉ាងណាឲ្យក្រុមសកម្មប្រយុទ្ធដែលមានការគាំទ្រដោយអ៊ីរ៉ង់នេះងើបមុខមិនរួច។

គួររំឭកថា លោក Benjamin Netanyahu កាលពីថ្ងៃទី៨ខែតុលាបានព្រមានចំៗទៅកាន់ប្រជាជនលីបង់ឲ្យបណ្ដេញក្រុមសកម្មប្រយុទ្ធហេសបូឡាចេញ ជៀសវាងរងការបំផ្លិចបំផ្លាញ និងការឈឺចាប់ដូចអ្វីដែលបានកើតឡើងនៅឯតំបន់ហ្គាហ្សា ខណៈអ៊ីស្រាអែលកំពុងតែបញ្ជូនកងកម្លាំងរាប់ពាន់នាក់បន្ថែមទៀតសម្រាប់ប្រតិបត្តិការជើងគោកចូលទៅក្នុងតំបន់ថ្មីនៃភាគនិរតីប្រទេសលីបង់។

អរិភាពរវាងភាគីទាំង២បានកើនឡើងជាលំដាប់ ចាប់តាំងពីក្រុមហេសបូឡាបានចាប់ផ្តើមបាញ់រ៉ុកកែតទៅកាន់ភាគខាងជើងអ៊ីស្រាអែល ដើម្បីគាំទ្រដល់ប៉ាឡេស្ទីននៅថ្ងៃទី៨ខែតុលាឆ្នាំ២០២៣ មួយថ្ងៃបន្ទាប់ពីការវាយប្រហារដ៏សាហាវរបស់ក្រុមហាម៉ាសដែលជាសម្ព័ន្ធមិត្តរបស់ខ្លួនទៅលើភាគខាងត្បូងអ៊ីស្រាអែល៕

ដោយ៖ ឈាង

ចុចអាន៖ លោក Netanyahu គំរាមវាយលីបង់ ឲ្យខ្ទេចខ្ទីដូចនៅហ្គាហ្សា