ព័ត៌មានអន្ដរជាតិ

ស្រូវជាង១លានតោន ត្រូវបានបំផ្លាញដោយសារទឹកជំនន់នៅបង់ក្លាដែស

បានផុស

២ years មុន

នៅ

ថ្ងៃចន្ទ ២១ តុលា ២០២៤

ដោយ

Chheang

តម្លៃអាហារនៅក្នុងប្រទេសបង់ក្លាដែស បានហក់ឡើងយ៉ាងខ្លាំង បន្ទាប់ពីផលដំណាំស្រូវប្រមាណ ១,១លានតោន ត្រូវបានបំផ្លិចបំផ្លាញដោយសារតែគ្រោះទឹកជំនាន់។ នេះបើយោងតាមការប្រកាសរបស់ក្រសួងកសិកម្មបង់ក្លាដែស កាលពីថ្ងៃទី២០ខែតុលា។

ក្រសួងកសិកម្ម បានប្រាប់ថា ទឹកជំនន់ឆ្នាំនេះ បានធ្វើឲ្យសង្វាក់ផលិតកម្មស្រូវខូចខាតខ្លាំង ដោយជាការឆ្លើយតប រដ្ឋាភិបាលត្រូវនាំចូលស្រូវចំនួន ៥០ម៉ឺនតោនឲ្យបានឆាប់រហ័ស ខណៈបច្ចុប្បន្នតម្លៃអាហារនៅក្នុងប្រទេសនេះបានកើនឡើងស្ទើរតែ ២០ភាគរយ កាលពីពេលថ្មីៗកន្លងទៅ។

ទឹកជំនន់ក៏បានប៉ះពាល់យ៉ាងធ្ងន់ធ្ងរដល់ផលិតផលកសិផលផ្សេងទៀតផងដែរ ក្នុងនោះមានបន្លែជាង២០ម៉ឺនតោន។ ការខាតបង់កសិកម្មសរុបទូទាំងប្រទេសបង់ក្លាដែសដោយសារទឹកជំនន់ ត្រូវបានប៉ាន់ប្រមាណថាមានតម្លៃប្រហែល ៣៨០លានដុល្លារ។

បង់ក្លាដែស រងការវាយប្រហារដោយទឹកជំនន់ធំៗចំនួន២លើកនៅក្នុងឆ្នាំ២០២៤ គឺនៅខែសីហា និងខែតុលា ដែលបណ្ដាលឲ្យមនុស្សយ៉ាងណាស់ ៧៥នាក់បានស្លាប់ និងមនុស្សរាប់លាននាក់រងផលប៉ះពាល់ ជាពិសេសនៅតំបន់ភាគកើត និងភាគខាងជើង។

បង់ក្លាដែស ដែលជាប្រទេសផលិតអង្ករធំជាងគេលំដាប់ទី៣របស់ពិភពលោក ជាធម្មតាផលិតអង្ករជិត ៤០លានតោនក្នុងមួយឆ្នាំៗ ដើម្បីចិញ្ចឹមប្រជាជនរបស់ខ្លួនចំនួន ១៧០លាននាក់។ ទោះជាយ៉ាងណាក៏ដោយ គ្រោះមហន្តរាយធម្មជាតិតែងតែផ្ដល់ផលរំខានដល់ផលិតកម្ម និងធ្វើឲ្យបង់ក្លាដែសត្រូវពឹងផ្អែកច្រើនលើការនាំចូល៕

ដោយ៖ ឈាង